Yi ketz Kataj chin tzꞌaknak cuꞌn iꞌ
96
1 Chibitzijuꞌ jun acꞌaj bitz tetz Kataj.Chibitzinkuꞌ cyakil yi eꞌuꞌ yi najlcheꞌuꞌ beneꞌn tziꞌn wi munt.
2 Cyakꞌeꞌuꞌ chikꞌajsbiluꞌ tetz tan takꞌleꞌn kꞌej iꞌ.
Ilenin chitxoleꞌuꞌ yi at rmeril yil kaclax taꞌn.
3 Cyaleꞌuꞌ scyetz cyakil wunak yi at kꞌej iꞌ.
Cyaleꞌuꞌ yi baꞌn na bnix eꞌchk milawr taꞌn.
4 Na yi ketz Kataj, wiꞌnin tetz kꞌej, nin tajweꞌn tan kakꞌol kakꞌajsbil tetz.
Nchaꞌtz tajweꞌn tan kekal ẍchiꞌ iꞌ, na ntin iꞌ Ryos.
5 Ẍchiwutz yi eꞌ mas wunak at mas ryos, poro quiꞌc chixac, na banij cuntuꞌ quitaneꞌn.
Ma yi ketz Kataj iꞌ bnol tetz yi tcyaꞌj.
6 Ej nin solteꞌj iꞌ, wiꞌnin pakꞌpuchaxeꞌn tan yi tetz porer.
Nchaꞌtz taneꞌn yi amaꞌl yi chin xan nin.
Chin yubeꞌn nin tan yi tetz porer.
7 Chaꞌstzun te, cyakil yi eꞌuꞌ yi najlcheꞌuꞌ beneꞌn tziꞌn wi munt, cyakꞌuꞌ kꞌej iꞌ.
8 Cyakꞌeꞌuꞌ kꞌej, na chumbalaj nin iꞌ.
Quicyꞌaj tzajuꞌ eꞌchk oy tan toyeꞌn tetz.
9 Chimejekuꞌ swutz, yil quiluꞌ yi pakꞌpuchal tu yi xanil iꞌ.
Chixobokuꞌ tetz, cyakil yi eꞌuꞌ yi najlcheꞌuꞌ beneꞌn tziꞌn wi munt.
10 Cyaleꞌuꞌ scyetz cyakil jilwutz wunak:
“Yi ketz Kataj iꞌ yi wiꞌtz rey.”
Iꞌ bnol tetz yi munt, nin quiꞌc rmeril tan xcyeweꞌn junt tan yuqueꞌn.
Nin tzꞌocopon tan cawuꞌn squibaj cyakil wunak, nin quil jeꞌ kꞌab twiꞌ jun.
11 Chitzatzink cyakil yi at tcyaꞌj.
Nchaꞌtz cyakil yi at wuxtxꞌotxꞌ, scyuchꞌ cyakil yi at xe mar.
12 Nin tzatzink cyakil yi eꞌchk cojbil beneꞌn tziꞌn.
Ej nin cyakil eꞌchk jilwutz tzeꞌ chitzatzink.
13 Na ẍchitzatzink swutz Kataj yil tzꞌul tzaj iꞌ tan cawuꞌn tzoneꞌj wuxtxꞌotxꞌ.
Na scawunk iꞌ squibaj cyakil jilwutz tnum yi at beneꞌn tziꞌn wi munt.
Nin yil cawun iꞌ chin tzꞌaknak cuꞌn sbneꞌ, nin quil jeꞌ kꞌab twiꞌ jun.