Quil tzeꞌtzax kalmaꞌ, ma na kakꞌeꞌ kakꞌajsbil tetz Ryos
95
1 ¡Chisajkuꞌ!Tzatzin cuꞌn kakꞌeꞌ kakꞌajsbil swutz Kataj Ryos.
Kabitzink swutz iꞌ tan yi tzatziꞌn yi atoꞌ cuꞌn, na iꞌ qꞌuicyꞌlom ketz, nin iꞌ yi colpinl ketz.
2 Katyoẍink tetz, nin kabitzij eꞌchk balaj bitz tan takꞌleꞌn kꞌej iꞌ.
3 Na yi ketz Kataj iꞌ yi wutzileꞌn kaRyosil. Iꞌ yi wiꞌtz Rey squibaj cyakil jilwutz ryos.
4 Iꞌ yi taw cyakil yi amaꞌl yi at wuxtxꞌotxꞌ, yi eꞌchk tziwun tu eꞌchk juꞌwtz.
5 Iꞌ yi taw yi mar na iꞌ bnol tetz. Iꞌ yi taw wuxtxꞌotxꞌ na iꞌ nucꞌul tetz.
6 Chisajkuꞌ bin, kamejek tan lokꞌeꞌn iꞌ. Kamejek kacyakil cuꞌn swutz Kataj, na iꞌ bnol ketz.
7 Iꞌ yi ketz kaRyosil nin yi oꞌ ketz niꞌcuꞌn chi oꞌ-k cneruꞌ yi na chiwan le tetz cojbil.
Chaꞌstzun te quibiteꞌuꞌ yi mbi na tal iꞌ. Na je yol iꞌeꞌj:
8 “Quil tzeꞌtzax italmaꞌ chi banakeꞌ yi eꞌ imam iteꞌ le amaꞌl tzꞌinunin tuꞌ yi na biꞌaj Meriba tu Masah.
9 Na yaꞌtz eꞌ oqueꞌt tan impileꞌn, wech na nsken quil yi eꞌchk milawr yi bnix waꞌn.
10 Caꞌwunak yob chiꞌchnak incꞌuꞌl scyeꞌj yi jun wekl wunakaꞌtz, itzun waltz: ‘Yi eꞌ wunakeꞌj chichuc na chipaꞌcaꞌp, na qui na cyaj lchoꞌc cꞌulutxum jakꞌ incaꞌwl.’
11 Chaꞌstzun te walol scyetz: ‘Jun cuꞌn yol cyaꞌl jun tzitetz yi nink tzꞌopon tan ujleꞌn le amaꞌl yi insuknak tzitetz.’ ”