Yi kaRyosil, iꞌ yi wiꞌtz pujul xtisyaꞌ
94
1 Iluꞌ kaRyosil, ẍchajeꞌuꞌ yi na cawunuꞌ.Ticyꞌseꞌuꞌ cꞌuꞌluꞌ scyeꞌj yi eꞌ juchul il.
2 Na iluꞌ yi wiꞌtz pujul xtisyaꞌ.
Cheꞌ cawsajuꞌ bin yi eꞌ yi na cyocsaj quib nim tu cyajtzaꞌkl.
3 Taꞌ, ¿tonaꞌ nin chibisun noc yi eꞌ mal nakaꞌtz?
4 Na cyakil yi eꞌ mal nakaꞌtz, qui na cyek ẍchiꞌ jun, ma na eꞌ cuꞌn tzolol yol.
Ntin na cyocsaj quib nim tu cyajtzaꞌkl.
5 Ntin na chitzan tan chibuchleꞌn yi eꞌ teruꞌ tanumuꞌ Taꞌ.
6 Na na choꞌc tan chibiyleꞌn cuꞌn yi eꞌ xmaꞌlcaꞌn, scyuchꞌ yi eꞌ prow joylajil wunak, yi quiꞌc chinajbil.
Nchaꞌtz yi eꞌ tal meꞌbaꞌ yi quiꞌc chitaj chitxuꞌ, na cheꞌl cuꞌn cyaꞌn swutz.
7 “Qui na koꞌ til Ryos,” cheꞌch.
“Qui na koꞌ til yi Ryosil Jacow,” cheꞌch.
8 Txalpnak yi cyajtzaꞌkl yi eꞌ mal nakaꞌtz. ¿Tonaꞌ nin lpujx cyaꞌn?
9 Yi jun yi nucꞌul te kaẍchin,
¿qui ptzun na tbit chiyol?
Yi jun yi bnol te kawutz,
¿qui ptzun na til yi mbi na chiban?
10 Iẍkaj qui tzunk chicawsij yi eꞌ mal nakaꞌtz tan yi jun yi na oc tan makleꞌn chiwutz cyakil yi eꞌchk nación.
Iẍkaj qui tzunk na el xtxum yi jun yi akꞌol cyajtzaꞌkl cyakil wunak te yi mbi na chitzan tan xtxumleꞌn.
11 Poro yi mero bintzi iꞌtz yi na el xtxum Ryos te cyajtzaꞌkl.
Nin na el xtxum tetz yi quiꞌc xeꞌ yi chitxumuꞌn.
12 Wajcaw, baꞌn cyeri yi eꞌ yi na ocuꞌ tan chinucꞌleꞌn, tu yi eꞌ yi na ocuꞌ tan chichusleꞌn.
13 Na iẍnin na chitzatzin cyeraꞌtz yi na ul cꞌaꞌlaj tiemp ẍchiwutz. Ma yi eꞌ mal nak ja wiꞌt kopxij chijulil cyeraꞌtz.
14 Poro Kataj Ryos quil cheꞌ til cyen yi eꞌ tetz tanum. Nin quil cheꞌ til cyen yi eꞌ yi ateꞌ tkꞌab.
15 Na txant tan tponeꞌn yi kꞌejlal tan cawuneꞌn yi pujul xtisyaꞌ yi chin tzꞌaknak cuꞌn, nin cyakil yi eꞌ balaj nak ẍchixomok teꞌj.
16 Poro, ¿naꞌ ltzꞌoc tan incolcheꞌn ẍchikꞌab yi eꞌ mal nakaꞌtz yi chin juntlen nin eꞌ? Cyaꞌl.
17 Ma na ntin cuꞌn Ryos nchincolon.
Na yi quiꞌk moꞌc Ryos tan wuchꞌeyeꞌn, ten kloꞌ chinquim.
18 At na ban cuꞌnt yi na jeꞌ jiẍp wukan.
Poro na chin ẍchꞌeyajuꞌ Taꞌ, tan yi banl talmaꞌuꞌ swibaj.
19 Yi na noꞌc wutz peꞌm, quiꞌt na pujx yi wajtzaꞌkl waꞌn.
Poro na chin maysajuꞌ, nin na takꞌuꞌ tzatzin swetz.
20 Poro quiꞌc rmeril tan cyamiwil quibuꞌ tu jun juez yi na xom te yi tetz tajtzaꞌkl, nin yi na oc tan contriꞌn te yi teruꞌ caꞌwluꞌ.
21 Na yi eꞌ cyetz, ntin na chijoy puntil tan chibuchleꞌn yi eꞌ yi quiꞌc cyetz quil.
Nin at na bant cuꞌn junawes na chiquim cyaꞌn.
22 Poro yi iluꞌ teruꞌ Taꞌ, iluꞌ colol wetz.
Niꞌcuꞌn iluꞌ tu jun wutzileꞌn cꞌub kale na incol quent wib.
23 Poro yi eꞌ mal nakaꞌtz, iteꞌn nin cyajtzaꞌkl xcyek tan chixiteꞌn cuꞌn.
Na yi ketz kaRyosil stkꞌeꞌ iꞌ amaꞌl tan chicweꞌn xit.