Yi tokꞌeꞌn Luwiy swutz Ryos tan jakleꞌn ẍchꞌeybil tetz
69
1 Wajcaw, yi iluꞌ inRyosil, chin colpeꞌl tzajuꞌ na txant tan imbekꞌxeꞌn.2 Na txant tan imbeneꞌn mulkꞌuj xe jun aꞌ.
Txant tan imbeneꞌn mulkꞌuj tul snep. Cyaꞌl na cweꞌt wukan.
Ja wiꞌt chincopon jalen xeꞌ aꞌ cuꞌn.
Ja wiꞌt chimben tan tojkbil aꞌ.
3 Elk bin kꞌajabuꞌ sweꞌj Wajcaw, na nternin soꞌyt inkul tan sichꞌ, tan jakleꞌn ẍchꞌeybil wetz teruꞌ.
Nin ja kꞌeꞌxij inwutz tan xmayeꞌn ko at tulbiluꞌ tan incolpeꞌn.
4 Na wiꞌnin chijaleꞌn yi eꞌ yi na chiꞌch chicꞌuꞌl sweꞌj.
Mas tcuꞌn cyajlal swutz yi xiꞌil inwiꞌ.
Tunin na chiꞌch tuꞌ chicꞌuꞌl sweꞌj. Wech na quiꞌc wetz wil.
Nchaꞌtz na chitzan tan jakleꞌn xel yi eꞌchk takleꞌn yi qui nwalkꞌaj.
5 Iluꞌ inRyosil, sak swutzuꞌ yi quiꞌc nin muꞌẍ skojal walmaꞌ,
na quiꞌc rmeril tan wewal yi wil swutzuꞌ.
6 Wajcaw, iluꞌ inRyosil yi jun yi cyaꞌl na xcyeꞌ quen teꞌj.
Quiꞌk tzꞌel chitxꞌix yi eꞌ yi kꞌuklij chicꞌuꞌl teꞌjuꞌ tan impaj.
Iluꞌ kaRyosil, yi oꞌ xonl Israel, quiꞌk cabej chicꞌuꞌl yi eꞌ yi nternin na el cyalmaꞌ tan joyleꞌnuꞌ, tan wetz impaj.
7 Tan paj yi xomchin teꞌjuꞌ Taꞌ, na icyꞌpon wiꞌnin jisbil wetz waꞌn.
Ej nin na el intxꞌix tan paj.
8 Na niꞌcuꞌn in tu jun awer nak ẍchixoꞌl yi eꞌ witzꞌun.a
9 Ej nin na jeꞌ tzinwutz, yi qui na cyakꞌ wunak kꞌej yi caꞌluꞌ.
Nchaꞌtz yi na oc jisleꞌnuꞌ, choꞌn na baj tinwiꞌ.
10 Na yi na noꞌc tan mucꞌleꞌn weꞌj, nin tan oꞌkl, tan takꞌleꞌn kꞌejuꞌ, na choꞌc tan xbajtziꞌiꞌn sweꞌj.
11 Ej nin tircuꞌn na chitzeꞌen sweꞌj, yi na oc eꞌchk beꞌchok sweꞌj yi na ẍchaj yi na chimbisun tan wil.
12 Tircuꞌn eꞌ, na chitzan tan inyolcheꞌn.
Nicyꞌt nin eꞌ kbarel na choꞌc tan xbajtziꞌiꞌn sweꞌj.
13 Choꞌn na cuꞌ inwutz teruꞌ Taꞌ. Chin ẍchꞌeyajuꞌ.
Chin ẍchꞌeyajuꞌ tan yi banl talmaꞌuꞌ.
Chin colpeꞌuꞌ, na ilenin na el kꞌajabuꞌ sweꞌj.
14 Quil takꞌuꞌ amaꞌl tan imbeneꞌn tul il.
Chin coleꞌuꞌ ẍchikꞌab yi eꞌ yi na chiꞌch chicꞌuꞌl sweꞌj.
Nin quil takꞌuꞌ amaꞌl tan imbeneꞌn mulkꞌuj xe aꞌ taneꞌn.
15 Quil takꞌuꞌ amaꞌl tan weleꞌn wi aꞌ taneꞌn.
Quil takꞌuꞌ amaꞌl tan imbeneꞌn tan yi tojkbil tzanlaꞌ.
16 Wajcaw, elk kꞌajabuꞌ sweꞌj, na na cuꞌ inwutz teruꞌ.
Nin na el intxum tetz, yi wiꞌnin banl talmaꞌuꞌ, nin yi na pekꞌuꞌ sweꞌj.
Sajk binuꞌ tan wuchꞌeyeꞌn, tan tuꞌ yi banl talmaꞌuꞌ.
17 Qui bin stew tibuꞌ tzinwutz, na na chimbisun, na atin tul sotzaj cꞌuꞌlal.
Chaꞌstzun te elk kꞌajabuꞌ sweꞌj.
18 Sajk binuꞌ tan wuchꞌeyeꞌn.
Chin coleꞌuꞌ ẍchikꞌab yi eꞌ incontr.
19 Sak swutzuꞌ yi mbi na chiban sweꞌj.
Sak swutzuꞌ yi ja el inkꞌej cyaꞌn.
Nin na el xtxumuꞌ tetz yi naꞌ scyetz eꞌ incontraꞌtz.
20 Ej nin tan yi eꞌchk takleꞌnaꞌtz, yi na bajij sweꞌj, na bisun walmaꞌ, nin quiꞌct inwalor at tan paj.
Tech tunin na chintzan tan joyleꞌn ẍchꞌeybil wetz, poro cyaꞌl na pekꞌ tan wuchꞌeyeꞌn.
21 Ja cuꞌ wenen cyakꞌun te yi inwaꞌ.
Nin yi inquimeꞌn tan sak tziꞌ ja cyakꞌ vinagre swetz.b
22 Ma jaluꞌ Taꞌ, cyakil yi eꞌchk balaj waꞌaꞌn yi na chitzan cyetz tan xtxumleꞌn, nink xcon tan chicuꞌseꞌn.
Nink xcon tetz jun tramp ẍchiwutz.
23 Nink choꞌc moyiꞌẍ tanuꞌ.
Ej nin tunink lucnecuꞌn quikan.
24 Ticyꞌseꞌuꞌ cꞌuꞌluꞌ scyeꞌj yi incontraꞌtz. Takꞌeꞌ chicaws.
25 Elk cuꞌn chinajbil swutz.
Cyaꞌlk najeꞌ tul. Chin tzꞌinunin tuꞌ tulejuꞌ.
26 Na na chitzan tan chibiyleꞌn yi eꞌ yi na chibisun.
Ej nin na chitzeꞌen scyeꞌj.
27 Takꞌuꞌ chicaws, na chin juchul il nin eꞌ.
Quiꞌk tzꞌel kꞌajabuꞌ scyeꞌj.
28 Tzajscunuꞌ chibiꞌ tul planiy kale tzꞌibaneꞌt chibiꞌ yi eꞌ yi ẍchicambok te yi itzꞌajbil.
Quil cuꞌ chibiꞌ tanuꞌ kale atiteꞌt chibiꞌ yi eꞌ balaj.
29 Poro elk bin kꞌajabuꞌ sweꞌj wetz Taꞌ.
Na na sotz incꞌuꞌl, nin na chimbisun.
Chaꞌstzun te chin ẍchꞌeyajuꞌ nin chin coleꞌuꞌ.
30 Swakꞌeꞌ inkꞌajsbil teruꞌ, iluꞌ inRyosil.
Swakꞌeꞌ inkꞌajsbil tetz cuꞌn walmaꞌ.
31 Na mas na tzatzinuꞌ yi na kakꞌ kꞌajsbil teruꞌ, swutz yi na kapat jun chin mam tor tetz katxꞌixwatz.
Nka yi na kapat jun neꞌẍ wacẍ tuml yi tucꞌ tu yi eꞌchk pacꞌ.
32 Ej nin yil quil cyakil yi eꞌ tal prow yi na chibisun, yi na tzatzinuꞌ te yi inkꞌajsbil yi na chintzan tan takꞌleꞌn teruꞌ, squiwixk chicꞌuꞌl tan chixomeꞌn mas teꞌjuꞌ.
33 Na tzꞌelepon chitxum tetz, yi na tbituꞌ chitziꞌ chikul yi eꞌ tal prow meꞌbaꞌ yi na chibisun, nin yi at ninuꞌ-tz tan quichꞌeyeꞌn yi eꞌ teruꞌ, yi ateꞌ pres.
34 Cyakꞌeꞌuꞌ bin chikꞌajsbiluꞌ tetz Kataj, cyakil yi eꞌuꞌ yi ateꞌuꞌ wuxtxꞌotxꞌ.
Nin cyakil yi eꞌuꞌ yi ateꞌuꞌ tcyaꞌj, tuml yi eꞌuꞌ yi ateꞌuꞌ xe mar, tajweꞌn tan cyakꞌoluꞌ len chikꞌejuꞌ tetz kaRyosil.
35 Na tzꞌocopon Ryos tan colcheꞌn yi amaꞌl Sión, nin jepon xtxicbal iꞌ junt tir yi eꞌchk tnum cwent Judá.
36 Nin cyakil chixonl yi eꞌ ẍchakumuꞌ scyetzajeꞌ yi amaꞌlaꞌtz.
Cyetz sbneꞌ, nin choꞌn ẍchinajank tul.
Na yi eꞌ yi chocopon tan takꞌleꞌn kꞌej iꞌ, yaꞌstzun yi eꞌ yil chinajank tul.