Yi na oc Kataj tan oyintziꞌ na xcyeꞌ iꞌ te cyakil
68
1 Yi na xeꞌtij Kataj tan oyintziꞌ na cheꞌl ojk yi eꞌ contr iꞌ swutz. Nchaꞌtz na chiban yi eꞌ yi na chiꞌch chicꞌuꞌl teꞌj.2 Ej nin yi eꞌ contraꞌtz, choꞌn cunin na chiban chi na ban sib yi na ben tan cyekꞌekꞌ, nka chi na ban muꞌẍ xcab yi na oc tkꞌakꞌ, na yi eꞌ juchul ilaꞌtz, quiꞌc muꞌẍ chixac swutz Ryos.
3 Poro yi eꞌ balaj, ẍchitzatzink cyeraꞌtz.
Nin ẍchitzꞌitpunk tan yi tzatzin yi ateꞌ cuꞌnt.
4 Chaꞌstzun te kakꞌeꞌ kakꞌajsbil tetz Ryos.
Kabitzij balaj bitz tetz iꞌ, na yi iꞌ tetz choꞌn na xon tibaj sbakꞌ.
Katzatzink bin tkꞌab Kataj.
Katzatzink tan takꞌleꞌn kꞌej iꞌ.
5 Choꞌn najlij yi ketz kaRyosil xe tetz caꞌl, yi wiꞌnin xanil.
Ej nin iꞌ yi chitaj yi eꞌ meꞌbaꞌ yi quiꞌc chitaj.
Nin nchaꞌtz iꞌ chꞌeyl cyetz yi eꞌ xmaꞌlcaꞌn.
6 Nchaꞌtz yi eꞌ, yi chichuc ateꞌ, na takꞌ iꞌ amaꞌl scyetz tan chinajeweꞌn scyuchꞌ jun najal.
Ej nin na oc iꞌ tan chicolpeꞌn yi eꞌ pres, nin na jal tzatzin scyetz.
Poro yi eꞌ mal wunak, choꞌn ẍchaꞌtok cyeraꞌtz le eꞌchk amaꞌl tzꞌinunin tuꞌ.
7 Kataj, yi bajxeꞌnuꞌ ẍchiwutz yi eꞌ tanumuꞌ, yi cyeleꞌn tzaj Egipto nin yi chixoneꞌn le amaꞌl tzꞌinunin tuꞌ,
8 ja chucan yi wuxtxꞌotxꞌ swutzuꞌ, nin ja saj jun chin wutzileꞌn aꞌbal tanuꞌ.
Ej nin yi wiꞌwtz Sinaí, ja chucan swutzuꞌ.
Ja chucan tan yi teruꞌ poreruꞌ, yi iluꞌ kaRyosil yi oꞌ xonl Israel.
9 Ja saj wiꞌnin aꞌbal tanuꞌ, tan tacꞌseꞌn yi eꞌchk amaꞌl skajwutz, nin ja ult yos tuchꞌ.
10 Ej nin yi eꞌ teruꞌ tanumuꞌ, choꞌn chicyajeꞌn cyentz le eꞌchk amaꞌlaꞌtz.
Nin tan yi teruꞌ poreruꞌ, ja takꞌuꞌ yi tajweꞌn scyetz.
11 KaRyosil ncawun. Nin ja katxꞌacon.
Ej nin wiꞌnin xnaꞌn eꞌ ul tan talcheꞌn stziblal.
Nin je chiyoleꞌj:
12 “Ja cheꞌl ojk cyakil kacontr.
Ja cheꞌl ojk chibajxom tuml yi cyetz chisanlar,” cheꞌch yi eꞌ xnaꞌnaꞌtz ban.
Nin cyakil yi eꞌ xnaꞌn yi ateꞌ cyentz, eꞌ octz tan jatxleꞌn cuꞌn yi eꞌchk takleꞌn yi nchicambaj yi eꞌ sanlar scyeꞌj yi chicontr.
13 Yi axwok itetz ja itew itib tulak eꞌchk picy, nin chin tzꞌil nin axwok mban.
Ma jaluꞌ apart itaneꞌnwok, na niꞌcuꞌn axwok jaluꞌ chi taneꞌn jun plomẍ yi na litzꞌun yi xicyꞌ tan sakal tu balaj oro.
14 Na yi toqueꞌn Kataj, yi na xcyeꞌ te cyakil, tan chixiteꞌn chiryosil icontraꞌtz, eꞌ el xit, chi na el num yi kꞌab cheꞌw wiꞌwtz Salmón.
15 Chin wutz tkan nin yi eꞌchk wiꞌwtz cwent Basán.
Nin chin txicl nin taneꞌn.
16 Mbi xac na chiꞌch icꞌuꞌl te yi wiꞌwtz kale najleꞌt Kataj.
Na choꞌn snajank iꞌ wi jun wiꞌwtzaꞌtz tetz ben kꞌej ben sak.
17 Jat loꞌ millón careꞌt tetz oyintziꞌ at tu kaRyosil, nin xomcheꞌ teꞌj, yi sajeꞌn le wiꞌwtz Sinaí tan tuleꞌn xe tetz caꞌl.
18 Ej nin yi tajeꞌn tcyaꞌj, eꞌ aj tcyꞌal wiꞌnin eꞌ yi ateꞌ pres.
Ej nin yi ntaxk aj, ja cyakꞌ wunak eꞌchk oy tetz.
Nin nchaꞌtz yi eꞌ mal nak, eꞌ oc jakꞌ caꞌwl iꞌ.
19 Ntyoẍ tetz Kataj, yi cyakil nin kꞌej list iꞌ tan tekeꞌn nin yi kektz taneꞌn, na iꞌ yi colol ketz.
20 Na yi ketz Kataj, iꞌtz jun Ryos yi baꞌn na kaclax taꞌn, nin yi list tan kacolcheꞌn tkꞌab quimichil.
21 Tzꞌocopon Ryos tan cabseꞌn chiwiꞌ yi eꞌ tetz contr, yi eꞌ yi chꞌinchꞌuj eꞌ tan juchleꞌn quil.
22 Je yol Katajeꞌj:
“Cxpakxokwok waꞌn, pe tzun choꞌnk atixwok le amaꞌl Basán.
Cxpakxokwok waꞌn, mpe choꞌnk atixwok xe mar.
23 Cxonkwok tul chiẍchꞌel yi eꞌ icontr.
Nin sbajk chiẍchꞌel cyakꞌun itxꞌiꞌ.”
24 Iluꞌ kaRyosil, iluꞌ kaReyil, wiꞌnin procesión na bajij xe caꞌluꞌ tan takꞌleꞌn kꞌejuꞌ.
25 Na ilenin na chicham quib cyakil wunak tan takꞌleꞌn kꞌejuꞌ.
Bajxcheꞌ yi eꞌ aj bitz ẍchiwutz.
Ma yi eꞌ aj kbetzum xomcheꞌ wutz chicoc.
Ej nin nicyꞌal, xomcheꞌ cobox xun, yi na chitzan len tan tocseꞌn eꞌchk pandereta.
26 Kakꞌeꞌ bin kakꞌajsbil tetz Kataj yi kaRyosil.
Na cyakil yi oꞌ, yi oꞌ xonl Israel, ja kamol kib tan takꞌleꞌn kꞌej iꞌ.
27 Ej nin ẍchixoꞌl cyakil yi eꞌ wunakaꞌtz, bajxij Benjamín yi ẍchꞌiꞌp Jacow.
Nchaꞌtz xomij Judá, tu cobox tetz bajxom.
Nchaꞌtz xomcheꞌ Zabulón tu Neftalí.
28 Iluꞌ kaRyosil, ẍchajeꞌuꞌ yi poreruꞌ sketz.
Yi poreruꞌ yi ẍchajnakuꞌ sketz sajleꞌn tunintz.
29 Cawunk tzajuꞌ le caꞌluꞌ yi at Jerusalén, yi caꞌluꞌ kale na choponeꞌt eꞌ rey tan toyeꞌn eꞌchk oy swutzuꞌ.
30 Makeꞌuꞌ chiwutz yi eꞌ aj Egipto, na i cuꞌn cyuchꞌ yi jun chin txuc yi at xe aꞌ.
Nchaꞌtz makeꞌuꞌ chiwutz yi eꞌ mas tnum, na niꞌcuꞌn eꞌ tu jun cꞌoloj smaron wacẍ.
Na yi eꞌaꞌtz, tan tuꞌ yi ẍkant tzaj nin na cyaj, ja choꞌc tan telseꞌn chikꞌej yi mas tnum.
Poro Taꞌ, takꞌeꞌuꞌ chicaws, na yi eꞌ cyetz, ntin oyintziꞌ na chitxum.
31 Chuꞌl wiꞌnin bajxom nin ajcaw jalen Egipto.
Nchaꞌtz chuꞌl jalen Etiopía.
Chuꞌl len, nin jepon chikꞌab tan takꞌleꞌn kꞌejuꞌ.
32 Eꞌuꞌ ajcaw tetz tnum, cyakꞌuꞌ chikꞌajsbiluꞌ tetz Kataj.
Cyakꞌeꞌuꞌ chikꞌajsbiluꞌ tetz Kataj.
33 Cyakꞌeꞌuꞌ kꞌej yi junaꞌtz yi na xon tcyaꞌj, yi tcyaꞌj, yi at nintz sajleꞌn tunintz.
Kubiteꞌ yi na jilon iꞌ, na chin wiꞌ nin iꞌ tan yol.
34 Kakꞌeꞌ bin kꞌej Kataj na at tetz porer.
Nin chin mam nin yi banl talmaꞌ iꞌ skibaj yi oꞌ xonl Israel.
Nin yi banl iꞌ, icyꞌnak cuꞌn swutz yi tcyaꞌj.
35 Chin xoꞌwbil nin iꞌ sbneꞌ, yil cuꞌul te tetz caꞌl, yi chin xan nin.
Na iꞌ tzꞌakꞌonk kachamil tu kawalor yi oꞌ tetz tanum, yi oꞌ xonl Israel.
Kakꞌeꞌ bin kakꞌajsbil tetz.