Chumbalaj nin cyakil yi na bnix tan Kataj Ryos
66
1 Cyakil eꞌuꞌ yi ateꞌuꞌ beneꞌn tziꞌn wi munt, cyakꞌeꞌuꞌ chikꞌajsbiluꞌ tetz kaRyosil.Tetz cuꞌn cyalmaꞌuꞌ yil cyakꞌuꞌ.
2 Chibitzijuꞌ balaj bitz swutz iꞌ.
Cyakꞌeꞌuꞌ chikꞌajsbiluꞌ tetz.
3 Cyaleꞌuꞌ tetz Kataj yi xtxolbileꞌj:
“Taꞌ, cyakil yi na bnix tanuꞌ, chumbalaj nin.
Cyakil yi eꞌ contruꞌ na chisaj colpuj tan yi poreruꞌ.
4 Cyakil wunak beneꞌn tziꞌn wi munt scyakꞌeꞌ kꞌejuꞌ.
Nin chocopon tan cꞌuꞌlajeꞌn yi biꞌuꞌ, na scyakꞌeꞌ chikꞌajsbil teruꞌ.”
5 Ma jaluꞌ quibit tzajuꞌ yi eꞌchk takleꞌn balaj yi mbnix tan Ryos skaxoꞌl yi oꞌ wunak.
6 Na ja cuꞌ jatxol yi mar yi quicyꞌeꞌn tzaj yi eꞌ kamam kateꞌ tcꞌuꞌl.
Nchaꞌtz tulejnak yi tzanlaꞌ yi na biꞌaj Jordán.
Ej nin skejenleꞌn quicyꞌeꞌn tzaj yi kamam kateꞌ.
Chaꞌstzun te kakꞌeꞌ kꞌej Kataj.
7 Kakꞌeꞌ kꞌej Kataj na na cawun beneꞌn tziꞌn, nin scawunk sbneꞌ opon tunintz.
Nin na til yi na choꞌc yi eꞌ mal nak tan xtxumleꞌn contriꞌn te iꞌ, poro qui na takꞌ iꞌ amaꞌl scyetz.
8 Cyakil eꞌuꞌ wunak yi ateꞌuꞌ beneꞌn tziꞌn, cyakꞌeꞌuꞌ chikꞌajsbiluꞌ tetz.
Chin chiwiꞌ ninuꞌ ẍchibneꞌuꞌ tan bitz swutz iꞌ.
9 Na tan iꞌ itzꞌ oꞌ jaluꞌ, na quinin takꞌ iꞌ amaꞌl sketz tan kaloꞌoneꞌn.
10 Ma jaluꞌ Taꞌ, ilenin na ocuꞌ tan kapileꞌn chi na bajij te jun piẍ sakal yi na oc pileꞌn tkꞌakꞌ.
11 Ja takꞌuꞌ amaꞌl tan kacweꞌn le tramp.
Nin ja takꞌuꞌ amaꞌl tan jeꞌn jun kektz taneꞌn, yi chin al nin.
12 Ej nin ja takꞌuꞌ amaꞌl tan chixoneꞌn wunak squibaj.
Ja takꞌuꞌ amaꞌl tan koqueꞌn jakꞌ chicaꞌwl yi eꞌ kacontr.
Tan yi xtxolbilaꞌtzeꞌj, niꞌcuꞌn chi yi jajk koꞌc tkꞌakꞌ nin jajk kacuꞌ xeꞌ aꞌ tanuꞌ.
Poro tyoẍtuꞌ teruꞌ yi itzꞌ oꞌ jaluꞌ, na ilenin na el kꞌajabuꞌ skeꞌj.
13 Ma jaluꞌ nchimben le templo, nin tzimpateꞌ intxꞌixwatz teruꞌ.
Yaꞌstzun swulej, tan weleꞌn cuꞌn te yi inyol yi insuknak teruꞌ.
14 Na insuknak inyol teruꞌ te yi atin tul sotzaj cꞌuꞌlal.
15 Tzimpateꞌ intxꞌixwatz swutzuꞌ.
Swakꞌeꞌ balaj tor tu eꞌchk balaj chiw teruꞌ.
Nchaꞌtz swakꞌeꞌ eꞌchk cneruꞌ.
Swakꞌeꞌ tircuꞌn teruꞌ tan takꞌleꞌn kꞌejuꞌ.
16 I bin jaluꞌ, cyakil eꞌuꞌ yi na cyekuꞌ ẍchiꞌ Ryos, quibitzajuꞌ cobox inyol, na swaleꞌ scyeruꞌ yi mbi mban Ryos sweꞌj wetz.
17 Ja cuꞌ inwutz tetz, nin ja tbit iꞌ intziꞌ inkul.
Chaꞌstzun te wakꞌol inkꞌajsbil tetz iꞌ.
18 Yi atk eꞌchk yab ajtzaꞌkl le intxumuꞌn, qui tzun kloꞌ ntbit iꞌ yi intziꞌ inkul.
19 Poro ja tbit iꞌ cyakil yi minjak tetz tul inoración.
20 Ntyoẍ bin tetz Kataj Ryos yi ja tbit yi intziꞌ inkul, na quinin cabej cꞌuꞌl yi ntakꞌ yi banl talmaꞌ swibaj.