Kakꞌeꞌ kakꞌajsbil tetz Ryos na at tetz kꞌej
65
1 Iluꞌ kaRyosil yi atuꞌ xe yi najbiluꞌ wi Sión, teruꞌ cyakil yi kꞌajsbil, na wiꞌnin kꞌejuꞌ.Chaꞌstzun te tajweꞌn keꞌl cuꞌn te yi kayol yi na kasuk teruꞌ.
2 Na na tbituꞌ yi kayol yi na kajilon teruꞌ.
Ej nin cyakil wunak beneꞌn tziꞌn, na chuꞌl swutzuꞌ tan takꞌleꞌn kꞌejuꞌ.
3 Yi kayaꞌpl, na xcyeꞌ tan kapitleꞌn nin tul il, poro ilenin list atituꞌ tan cuyleꞌn kapaj.
4 Baꞌn cyeri yi eꞌ yi txaꞌijcheꞌt tanuꞌ, na yi eꞌaꞌtz ẍchaꞌtok teꞌjuꞌ le teruꞌ najbiluꞌ.
Takꞌ tzajuꞌ banluꞌ skibaj yi na kamol cuꞌn kib xe caꞌluꞌ, yi caꞌluꞌ yi wiꞌnin xanil.
5 Iluꞌ kaRyosil, iluꞌ colpinl ketz, na ẍchajuꞌ yi banluꞌ sketz, tan yi eꞌchk takleꞌn balaj yi na banuꞌ.
Cyakil wunak beneꞌn tziꞌn, mpe ik yi eꞌ yi najlcheꞌ jalaj icyꞌen mar,
choꞌn kꞌuklij chicꞌuꞌl teꞌjuꞌ.
6 Kakꞌeꞌ kakꞌajsbil teruꞌ, na tan yi teruꞌ poreruꞌ at yi eꞌchk wiꞌwtz, na iluꞌ bnol tetz tan yi teruꞌ poreruꞌ.
7 Ej nin baꞌn na xcyeꞌuꞌ tan makleꞌn yi pakꞌbil mar, nin tan chimakleꞌn yi eꞌ wunak yi na chimol cuꞌn quib tan oyintziꞌ.
8 Chaꞌstzun te yi na quibit cyakil wunak beneꞌn tziꞌn, yi eꞌchk milawr yi na bnix tanuꞌ, na chilucneꞌ tan xoꞌw.
Nchaꞌtz at wunak toqueꞌn tziꞌn, nin teleꞌn tziꞌn, yi na chiẍchꞌin tan yi tzatzin yi ateꞌ cuꞌnt, yi na quil yi eꞌchk milawr yi na bnix tanuꞌ.
9 Iluꞌ kꞌajaꞌnl tetz cyakil yi munt, na iluꞌ na akꞌon tetz aꞌbal tibaj, bantz tkꞌol balaj ujul.
Na jal aꞌ tulak eꞌchk siwun tanuꞌ, bantz jaleꞌn balaj cosech.
Yaꞌstzun na tulejuꞌ eꞌchk cojbil.
10 Na tacꞌsajuꞌ yi wuxtxꞌotxꞌ, na cuꞌ num yi eꞌchk xan, chin pam nin na ban, nintzun na jeꞌ ul chit yi eꞌchk ujul tanuꞌ.
11 Tul yi jun yobaꞌtz at banluꞌ tibaj katxꞌotxꞌ, na na cuꞌ aꞌbal tanuꞌ, nin na takꞌuꞌ balaj cosech.
12 Na yi eꞌchk amaꞌl yi tzꞌinunin tuꞌ ja txaꞌxan.
Na ja jal balaj xtzeꞌ wiꞌak eꞌchk juꞌwtz tanuꞌ.
13 Chaꞌstzun te wiꞌnin eꞌchk cneꞌr na chiwan swutzak eꞌchk amaꞌlaꞌtz.
Na jal balaj triw swutz eꞌchk cojbil.
Tircuꞌn jilwutz xtzeꞌ tu ujul na tzatzin.