Xochoꞌn tetz Ryos
64
1 Iluꞌ inRyosil tbiteꞌuꞌ yi na chinxochon teruꞌ.Chin coleꞌuꞌ ẍchikꞌab yi eꞌ incontr.
2 Chin tew cunuꞌ ẍchikꞌab yi eꞌ mal nak, yi ja oc chitxumuꞌn tan imbiyleꞌn.
Chin coleꞌuꞌ ẍchikꞌab yi eꞌ mal nakaꞌtz, yi na cyaj choꞌc tan inxiteꞌn.
3 Na cyakil yi eꞌchk yol yi na eltzaj le chitziꞌ, chin xoꞌwbil nin.
Niꞌcuꞌn tu jun flech yi cyꞌaꞌn wenen taꞌn.
4 Nin yi eꞌ wunakaꞌtz, ewun cuꞌn na choꞌc tan kaxiteꞌn yi oꞌ yi quiꞌc quil.
Qui na el chikꞌajab skeꞌj, na ewun cuꞌn na chijoy puntil tan kapoꞌtzeꞌn.
5 Na chinimsaj quib tan banleꞌn mal tetz junt.
Na bnix eꞌchk tramp cyaꞌn tan chicweꞌn yi tal prow tul.
Nin na cyaltz yi cyaꞌl na tzan tan chixmayeꞌn, nin yi cyaꞌl tzꞌakꞌon chicaws teꞌj.
6 Poro na el te chicꞌuꞌl yi at jun yi na tzan tan chixmayeꞌn, nin tan tbiteꞌn yi mbi i ilaꞌtz yi na chitzan tan banleꞌn.
Na quiꞌc jun eꞌchk takleꞌn yi na icyꞌ le chicꞌuꞌl, yi quiꞌk na til Ryos.
7 Chaꞌstzun te, Ryos tzꞌakꞌonk chicaws yi eꞌaꞌtz, nin quinin tzꞌicyꞌ scyetz yil chiloꞌon taꞌn.
8 Ej nin eꞌ teꞌn chibaj tcꞌuꞌl yi chiyol.
Nin cyakil wunak ẍchitzeꞌenk scyeꞌj.
9 Kalenaꞌs tzun choꞌc cyakil wunak tan takꞌleꞌn kꞌej Ryos. Ej nin ẍchitxoleꞌ yi mbi cuꞌn mban iꞌ, na tzꞌelepon chitxum tetz yi ẍchamil iꞌ.
10 Poro cyakil yi oꞌ ketz yi skoj cuꞌn te kalmaꞌ, yi oꞌ yi jicyuch te kajtzaꞌkl, skatzatzink, na na kajak ẍchꞌeybil ketz tetz Ryos.