Ntin cuꞌn Ryos na akꞌon tzatzin sketz
63
1 Wajcaw, iluꞌ inRyosil, nternin na joyonuꞌ swetz.Chaꞌstzun te chin jalchan cunin na noꞌc tan joyleꞌnuꞌ.
Na nternin na quim walmaꞌ tan saktziꞌ taneꞌn, na na chimbisun tan yi sotzaj cꞌuꞌlal yi atin cuꞌnt.
Choꞌn wutaneꞌn chi taneꞌn jalaj txꞌotxꞌ, yi chin skej nin, kale quiꞌcleꞌt aꞌ.
2 Poro yi wetz wajbil iꞌtz yil nopon xe caꞌluꞌ, tan wilol yi poreruꞌ nin yi kꞌejuꞌ.
3 Na yi banl talmaꞌuꞌ swibaj, iꞌtz mas balaj swutz yi ankꞌiꞌn tetz tzoneꞌj wuxtxꞌotxꞌ.
Chaꞌstzun te swakꞌeꞌ inkꞌajsbil teruꞌ.
4 Swakꞌeꞌ kꞌejuꞌ te yi cobox kꞌej yi atin tzoneꞌj wuxtxꞌotxꞌ.
Ntin swutzuꞌ jepon wukꞌol inkꞌab tan takꞌleꞌn kꞌejuꞌ.
5 Na ko tetz cuꞌn walmaꞌ yil tzinjoyuꞌ, chintzatzink.
Chintzatzink, chi jun yaj yi na noj cꞌuꞌl, yi na wan te jun chumbalaj waꞌaꞌn.
Swakꞌeꞌ tzun inkꞌajsbil teruꞌ tetz cuꞌn walmaꞌ.
6 Wajcaw, te yi coylchin wi insoc na ul txꞌakxujuꞌ tincꞌuꞌl.
Na na noꞌc tan xtxumleꞌn cyakil yi banl talmaꞌuꞌ.
7 Na ntin cuꞌn iluꞌ chꞌeyl wetz.
Nin nternin na chintzatzin, na atuꞌ tan inqꞌuicyꞌleꞌn, na atin tzakꞌ yi xicyꞌuꞌ taneꞌn.
8 Ej nin junawes wakꞌoꞌnt wib tkꞌabuꞌ, nin chꞌinuꞌn chin tanuꞌ.
9 Ma yi eꞌ incontr yi na cyaj yil chinquim, eꞌ teꞌn ẍchiquimok, nin nchiben cyeꞌtz xetzeꞌ ẍchixoꞌl almaꞌ.
10 Ẍchiquimok tan spar, nin yi chiwankil sbajk cyakꞌun txuc.
11 Poro yi kareyil stzatzink teraꞌtz tkꞌab Ryos.
Ej nin cyakil wunak yi xomij chiwiꞌ teꞌj, scyakꞌeꞌ chikꞌajsbil tetz iꞌ.
Poro yi eꞌ yi chitziꞌ tuꞌ na cyal yi xomij chiwiꞌ teꞌj, smakxok chitziꞌ cyeraꞌtz.