Ntin cuꞌn Ryos colol ketz
62
1 Ntin cuꞌn te Ryos na jaleꞌt tzatzin paz waꞌn, na iꞌ yi colol wetz.2 Ntin cuꞌn iꞌ chꞌeyal wetz, na list iꞌ tan incolcheꞌn.
Chaꞌstzun te kꞌuklij incꞌuꞌl yi quil chinloꞌon, na iꞌ yi colol wetz.
3 Ma axwok itetz yi axwok incontr,
¿tonaꞌ cxoꞌc tan imbiyleꞌn?
¿Tonaꞌ chincuꞌ itaꞌn?
Na yi itajbil, iꞌtz tan incweꞌn junawes, chi na cuꞌ wocꞌ jun tapij, nka chi taneꞌn jun peꞌm yi na cuꞌ chꞌuk.
4 Na yi mero itajbil iꞌtz tan weleꞌn cuꞌn swutz.
Nin na baj itxumul eꞌchk takleꞌn sweꞌj yi iꞌtz laꞌjil tuꞌ.
Na itakꞌwok inkꞌej taneꞌn, poro iwutz tuꞌ, iplaj tuꞌ.
Poro te italmaꞌ nternin na chiꞌch icꞌuꞌl sweꞌj.
5 Ntin cuꞌn te Ryos na jaleꞌt tzatzin paz waꞌn,
na iꞌ yi colol wetz.
6 Ntin cuꞌn iꞌ chꞌeyal wetz, na list iꞌ tan incolcheꞌn.
Chaꞌstzun te kꞌuklij incꞌuꞌl, yi quil chinloꞌon, na iꞌ yi colol wetz.
7 Ntin cuꞌn Ryos tzꞌocopon tan incolcheꞌn bantz qui teleꞌn inkꞌej.
Na iꞌ yi amaꞌl yi baꞌn tzincolwib tul, bantz qui inloꞌoneꞌn.
Na iꞌ yi colol wetz, nin yi qꞌuicyꞌlom wetz.
8 Eꞌuꞌ intanum kꞌukek bin chicꞌuꞌluꞌ te Ryos.
Cuk chiwutzuꞌ tetz. Ilenin chijakeꞌuꞌ ẍchꞌeybil cyeruꞌ tetz, na iꞌ yi colol ketz.
9 Na jun yaj, quiꞌc nin muꞌẍ tal xac swutz Ryos.
Quiꞌc na ban yi ko iꞌtz jun prow meꞌbaꞌ nka jun ric, na yi nink tzꞌoc chimaꞌleꞌn, quil chimaꞌlan na quiꞌc cyalil.
Quiꞌc muꞌẍ jatxbil chixoꞌl yi eꞌ ric tu yi eꞌ meꞌbaꞌ na quiꞌc muꞌẍ tal chixac.
10 Chaꞌstzun te quiꞌc ltakꞌ kol jal oyintziꞌ skaxoꞌl, tan tuꞌ yi kameꞌbiꞌl, nka kol kamaj kib teꞌj.
Poro kol jal muꞌẍ kameꞌbiꞌl, baꞌn tcuꞌn quil kocsaj kib nim tuchꞌ, nin quil kꞌukeꞌ kacꞌuꞌl teꞌj, na sotzok teraꞌtz.a
11 Ma na je talnak Ryoseꞌj, nin alaꞌix tir tal iꞌ:
“Quiꞌc jun eꞌchk takleꞌn yi quiꞌk chinxcyeꞌ teꞌj.”
12 Yi kaRyosil wiꞌnin banl talmaꞌ iꞌ.
Na na takꞌ iꞌ kabanl nka kacaws.
Xomcyen tuꞌ te yi mbi na kaban.