At Ryos tan kacolcheꞌn
61
1 Iluꞌ inRyosil, tbiteꞌuꞌ yi intziꞌ inkul, na na chintxꞌayneꞌ swutzuꞌ. Stzaꞌwejuꞌ yi inoración.2 Chin joylaj nin atineꞌt poro na cuꞌ inwutz teruꞌ, na txant tan weleꞌn cuꞌn swutz.
Bneꞌuꞌ pawor swetz, chin coleꞌuꞌ.
Chin jeken tanuꞌ tibaj jun chin wutzileꞌn cꞌub bantz inclaxeꞌn.
3 Na iluꞌ yi colol wetz.
Nin niꞌcuꞌn iluꞌ tu jun chin wutzileꞌn torre,a kale tzincolwit wib ẍchikꞌab yi eꞌ incontr.
4 Na waj naꞌtij xe yi teruꞌ caꞌluꞌ cyakil kꞌej tan incolol wib teꞌjuꞌ.
5 Wajcaw, jun cuꞌn ja tbituꞌ cyakil yi mbi minsuk teruꞌ.
Nin ja wiꞌt takꞌuꞌ yi eꞌchk oy swetz, yi sukiꞌnt tanuꞌ scyetz cyakil yi eꞌ yi na chixom te yi teruꞌ tajbiluꞌ, nin yi na cyek ẍchiꞌuꞌ.
6 Taꞌ, takꞌuꞌ amaꞌl tetz yi reyb, yi wiꞌtz ajcaw, tan cawuneꞌn.
Nink ben ẍkon yi tiemp tanuꞌ tan cawuneꞌn mas.
7 Nin yil cawun, nink xom te yi teruꞌ tajbiluꞌ, nin tzatzin cuꞌnk lcawun.
Qꞌuicyꞌlejuꞌ tan yi banl talmaꞌuꞌ yi baꞌn kꞌukeꞌ kacꞌuꞌl teꞌj.
8 Ko yaꞌtz sbanuꞌ Taꞌ, swakꞌeꞌ tzun inkꞌajsbil teruꞌ cyakil tiemp.
Nin nchaꞌtz cyakil nin kꞌej, tzimbneꞌ taneꞌn cyakil yi inyol, yi minsuk teruꞌ.