Koꞌ ẍchꞌeyajuꞌ ẍchikꞌab kacontr
60
1 Iluꞌ kaRyosil, ¿mbi tzuntz nkoꞌ cyaj cyen tiloluꞌ?¿Mbi xac na takꞌuꞌ bis sketz?
Na ja saj colpuj wiꞌuꞌ skeꞌj.
Taꞌ koꞌ ẍchꞌeyajuꞌ, takꞌuꞌ junt tir kawalor.
2 Na tan yi teruꞌ poreruꞌ, ja chucan yi wuxtxꞌotxꞌ nin ja aj pax.
Poro mas balaj yil sban cunuꞌ junt tir, chi yi taneꞌn nin, na wiꞌnin loꞌoneꞌn mas.
3 Nchaꞌtz ja takꞌuꞌ amaꞌl tan tuleꞌn eꞌchk takleꞌn, yi chin xoꞌwbil nin swutz yi tanumuꞌ.
Ja takꞌuꞌ jun kacaws yi chin xoꞌwbil nin.
4 Poro yi oꞌ ketz yi choꞌn kꞌuklij kacꞌuꞌl teꞌjuꞌ, ja jeꞌ jun techl tanuꞌ tan koponeꞌn kale atit yi jun techlaꞌtz, bantz kaclaxeꞌn tkꞌab yi eꞌchk oyintziꞌ.
5 Koꞌ ẍchꞌeyajuꞌ bin Taꞌ.
Tbiteꞌuꞌ yi na cuꞌ kawutz teruꞌ.
Sajkuꞌ tan kuchꞌeyeꞌn, nin koꞌ coleꞌuꞌ, na na pekꞌuꞌ skeꞌj.
6 Na je bin yoluꞌeꞌj:
“Tetz cuꞌn walmaꞌ yil noꞌc tan jatxleꞌn cuꞌn yi amaꞌl Siquem.
Nchaꞌtz wulej yi ẍkꞌajlaj Sucot.
7 Nchaꞌtz, wetz cuꞌn cyakil yi amaꞌl cwent Galaad tu Manasés, na wetz cuꞌn cyakil yi eꞌchk amaꞌlaꞌtz.
Nchaꞌtz yi amaꞌl cwent Efraín, niꞌcuꞌn chi yaꞌtzk jun casco tan colcheꞌn inwiꞌ.
Ma yi amaꞌl cwent yi eꞌ aj Judá, niꞌcuꞌn chi yaꞌtzk jun txꞌamij yi at tinkꞌab.
8 Ma yi chiꞌamaꞌl yi eꞌ aj Moab, yaꞌstzun yi amaꞌl kale na chintxꞌajoneꞌt, kale na intxꞌajwit inkꞌab.
Ma yi chiꞌamaꞌl yi eꞌ aj Edom, colbil tuꞌ inxajab teraꞌtz.
Ej nin chinẍchꞌink tan yi tzatzin yi atin cuꞌnt, yil chinxcyeꞌ scyeꞌj yi eꞌ filistey,” chijuꞌ banak.
9 Ma jaluꞌ Wajcaw, ¿naꞌ lnoponsan le yi tnum yi at qꞌuixbel tan kaxcyeweꞌn teꞌj?
¿Naꞌ scyetz jun yi sbajxok tzinwutz tan woponeꞌn tan oyintziꞌ le amaꞌl Edom?
10 ¿Nkꞌeꞌtz peꞌ iluꞌ Taꞌ? Poro ja koꞌ cyaj tiloluꞌ.
Quiꞌt na xomuꞌ skeꞌj yi na keꞌl tan oyintziꞌ.
11 Poro Taꞌ, qui peꞌ tzꞌel kꞌajabuꞌ skeꞌj.
Koꞌ ẍchꞌeyajuꞌ ẍchikꞌab yi eꞌ kacontr.
Na yi oꞌ ketz quiꞌc nin ketz kaxac.
12 Poro kol xomuꞌ skeꞌj, jun cuꞌn skaxcyek te yi kacontr.
Na iluꞌ tzꞌocoponuꞌ tan chixiteꞌn cuꞌn, chicyakil.