Yi Kataj iꞌ colol ketz ẍchikꞌab kacontr
59
1 Wajcaw, iluꞌ inRyosil.Chin coleꞌuꞌ ẍchikꞌab incontr.
Chin coleꞌuꞌ ẍchikꞌab yi eꞌ yi na chitzan tan xtxumleꞌn tan inquimseꞌn.
2 Chin coleꞌuꞌ ẍchikꞌab yi eꞌ mal nak.
Nin chin coleꞌuꞌ ẍchikꞌab yi eꞌ biyol nak.
3 Elk bin kꞌajabuꞌ sweꞌj Taꞌ, na at wiꞌnin eꞌ yi chin cham nin eꞌ, yi na chitzan tan joyleꞌn puntil tan imbiyleꞌn.
Wech na quiꞌc wetz wil.
4 Wajcaw, tzinwutz wetz cyaꞌl cunin na impajwit caꞌwluꞌ.
Nin cyaꞌl na injuchwit wil swutzuꞌ.
Poro yi eꞌ incontr nternin na chitzan tan joyleꞌn puntil tan weleꞌn cuꞌn swutz.
Elk bin kꞌajabuꞌ sweꞌj. Sajkuꞌ tan wuchꞌeyeꞌn.
5 Na yi iluꞌ teruꞌ, iluꞌ kaRyosil yi cyaꞌl jun na xcyeꞌ quen teꞌj.
Iluꞌ kaRyosil yi oꞌ xonl Israel.
Cheꞌ cawseꞌ binuꞌ yi eꞌ juchul ilaꞌtz.
Quiꞌk tzꞌel kꞌajabuꞌ scyeꞌj yi taꞌk subul nakaꞌtz.
6 Na yi na chuꞌl tzoneꞌj lakꞌbal, niꞌcuꞌn na chiban chi na chiban txꞌiꞌ tan wojoꞌn lakꞌbal.
Nin na baj chisutil te katnumil.
7 Ej nin te yi na choꞌjkel, na swokin chitziꞌ nin nternin na chixcyꞌaklin.
Ej nin na cyaltz: “Cyaꞌl na bitan kayol,” cheꞌch.
8 Poro yi iluꞌ Taꞌ, na tiluꞌ, nin na tbituꞌ, cyakil yi mbi na chiban yi eꞌ mal nakaꞌtz.
Nin tzeꞌeꞌn tuꞌ na banuꞌ scyeꞌj.
9 Nin choꞌn kꞌuklij incꞌuꞌl teꞌjuꞌ, na yi iluꞌ teruꞌ, iluꞌ inRyosil.
Nin list atituꞌ tan wuchꞌeyeꞌn, nin tan incolcheꞌn.
10 Na tan tuꞌ banl talmaꞌuꞌ, tzꞌuluꞌ tan wuchꞌeyeꞌn.
Nin ẍchajeꞌuꞌ swetz, yi ẍeꞌn cuꞌn cheꞌ tulejuꞌ yi eꞌ incontr yil chiloꞌon.
11 Quiꞌk tzꞌel kꞌajabuꞌ scyeꞌj, bantz quilol yi eꞌ intanum, nin quil tzꞌel te chicꞌuꞌl yi mbi sbajok scyeꞌj.
Cheꞌ xit cunuꞌ tan yi teruꞌ poreruꞌ, bantz cyoqueꞌn juy jakꞌ caꞌwluꞌ.
Na jun cuꞌn, iluꞌ yi colol ketz.
12 Na yi eꞌaꞌtz, chin juchul il nin eꞌ, na quiꞌc nin baꞌn te chijilon.
Eꞌ teꞌn nink chibaj tcꞌuꞌl yi chinimel.
Ej nin eꞌ teꞌnk chibaj tul chiyol yi na cyal sketz.
13 Cheꞌlk cuꞌn tanuꞌ swutz.
Sajk colpuj wiꞌuꞌ scyeꞌj.
Cheꞌ sotzaj cunuꞌ junawes, bantz teleꞌn chitxum tetz yi iluꞌ yi wiꞌtz Ajcaw, nin iluꞌ na cawunuꞌ scyeꞌj eꞌ xonl Jacow, nin scyeꞌj cyakil wunak beneꞌn tziꞌn.
14-15 Yi eꞌ wunakaꞌtz, niꞌcuꞌn eꞌ chi quitaneꞌn txꞌiꞌ, na na chuꞌl cweꞌn kꞌej tnum tan joyleꞌn chiwaꞌ.
Poro ko qui na noj chicꞌuꞌl, tu na choꞌjkel tunintz nin na chokꞌ tan weꞌj.
16 Poro yi in wetz Taꞌ, swakꞌeꞌ inkꞌajsbil teruꞌ cyakil jalchan.
Nin chin inwiꞌ nin sbneꞌ tan xtxoleꞌn yi banl talmaꞌuꞌ.
Na iluꞌ yi colol wetz. Ej nin list atituꞌ tan wuchꞌeyeꞌn yi na ul sotzaj cꞌuꞌlal tzinwutz.
17 Chaꞌstzun te swakꞌeꞌ inkꞌajsbil teruꞌ iluꞌ Wajcaw, na ntin iluꞌ, atuꞌ tan wuchꞌeyeꞌn, nin wiꞌnin na pekꞌuꞌ sweꞌj.