Jakleꞌn chicaws yi eꞌ mal nak
58
1 I bin jaluꞌ eꞌuꞌ pujul xtisyaꞌ,¿na peꞌ chicawunuꞌ skꞌilcunin?
¿Qui peꞌ na jeꞌ chikꞌabuꞌ twiꞌ jun?
2 Poro yi mero bintzi na jeꞌ chikꞌabuꞌ chiwiꞌ jujun.
Choꞌn na xom chiwiꞌuꞌ te yi eꞌchk ajtzaꞌkl cachiꞌ.
Nin mas tcuꞌn na jal oyintziꞌ skaxoꞌl tan paj.
3 Yi eꞌ mal nak, eꞌ nin mal nak cyeraꞌtz te yi ntaxk chitzꞌij.
Eꞌ cuꞌn laꞌj jetz yi quitzꞌleꞌnix. Nin yaꞌtz quitaneꞌn cyeruꞌ-tz.
4 Chin xoꞌwbil nin eꞌuꞌ, na niꞌcuꞌn eꞌuꞌ chi jun luꞌbaj yi cyꞌaꞌn wenen taꞌn.
Na na chilam cunuꞌ chiẍchinuꞌ yi na koꞌc tan yol scyeruꞌ.
5 Niꞌcuꞌn eꞌuꞌ chi luꞌbaj yi quiꞌc chiẍchin, yi qui na quibit eꞌchk son yi na oc ẍchiwutz tan chimoxeꞌn.
6 Ma jaluꞌ Wajcaw, cheꞌ xit cuꞌnuꞌ yi eꞌ mal nakaꞌtz.
Na niꞌcuꞌn eꞌ tu jun león.
Kꞌuchlenuꞌ yi cyeꞌ. Cheꞌlk cuꞌn tanuꞌ swutz.
7 Choꞌnk chiban tanuꞌ chi na ban aꞌ yi jalcuꞌn na skej tul jun tziwun.
Nka chi na ban xtzeꞌ yi na skej tan kꞌej.
8 Cheꞌlk cuꞌn tanuꞌ swutz.
Choꞌnk chiban chi na ban jun ẍkop yi na quim yi na baj yi taꞌal stziꞌ.
Nka chi na ban jun niꞌ, yi na cyeꞌ cyꞌen tuꞌ yi ntaxk jepon xaꞌwlil.
9 Oken chikꞌaꞌkl tanuꞌ chi na ban txꞌiꞌx.
Cheꞌ bukꞌeꞌnuꞌ chi na uꞌlij eꞌchk xtzeꞌ yi quiꞌc xac.
10 Ma cyakil yi eꞌ balaj, ẍchitzatzink cyeraꞌtz, yil quil yil cheꞌl cuꞌn yi eꞌ mal nakaꞌtz swutz.
Nin ẍchixonk tul chiẍchꞌel, tan ẍchajleꞌn yi quiꞌc chixac yi eꞌ mal nakaꞌtz.
11 Kalenaꞌtz tzun cyal:
“Bintzinin, baꞌn mban yi nkꞌukeꞌ kacꞌuꞌl te Ryos.
Na iꞌ yi wiꞌtz ajcaw yi na cawun beneꞌn tziꞌn wi munt.”