Jakleꞌn ẍchꞌeybil ketz tetz Ryos
57
1 Wajcaw, iluꞌ inRyosil, elk kꞌajabuꞌ sweꞌj.Elk toꞌkl cꞌuꞌluꞌ sweꞌj, na choꞌn na cuꞌ inwutz teruꞌ tan toqueꞌnuꞌ tan incolcheꞌn.
Noꞌken tzakꞌ xicyꞌuꞌ. Chin coleꞌuꞌ jalen yil tzꞌicyꞌ eꞌchk takleꞌn yi na tzan tan inxuxeꞌn.
2 Copon inwutz teruꞌ na iluꞌ inRyosil.
Na na el intxum tetz yi at wiꞌnin kꞌejuꞌ, nin jun cuꞌn tzꞌocoponuꞌ tan wuchꞌeyeꞌn.
3 Nin tan tuꞌ banl talmaꞌuꞌ tzꞌul ẍchꞌeybil wetz tziꞌn tcyaꞌj.
Nin chinclaxok ẍchikꞌab yi eꞌ incontr yi nternin na chitzan tan joyleꞌn puntil tan inquimeꞌn.
4 Wajcaw, txant tan inloꞌoneꞌn cyakꞌun incontr.
Na ja wiꞌt chincuꞌ wuxtxꞌotxꞌ.
Atin ẍchixoꞌl eꞌ incontr yi chin xoꞌwbil nin eꞌ.
Na niꞌcuꞌn eꞌ tu balum yi na baj wunak cyaꞌn.
Na yi eꞌ cyetz, na chixcyeꞌ tan chibiyleꞌn wunak.
Na yi cyeꞌ, i cuꞌn lans tu flech.
Nin yi chitziꞌ, i cuꞌn chin spar yi juyuch wiꞌ.
5 Ma jaluꞌ iluꞌ inRyosil, at wiꞌnin poreruꞌ, at wiꞌnin kꞌejuꞌ.
Na yi iluꞌ teruꞌ, iluꞌ na cawunuꞌ tibaj cyakil yi eꞌchk takleꞌn yi at beneꞌn tziꞌn wi munt, nin yi at tziꞌn tcyaꞌj.
6 Yi eꞌ incontr, ja choꞌc tan joyleꞌn puntil yi ẍeꞌnk tan inloꞌoneꞌn.
Ja choꞌc tan inxoꞌwseꞌn.
Nin ja choꞌc tan banleꞌn eꞌchk tramp sweꞌj, poro eꞌ teꞌn nchicuꞌ tcꞌuꞌl.
7 Ma yi in wetz, list wutaneꞌn tan takꞌleꞌn inkꞌajsbil teruꞌ Taꞌ.
List taneꞌn walmaꞌ tan takꞌleꞌn kꞌejuꞌ.
8 Jalchan cunin tzꞌelepon inwatl tan takꞌleꞌn inkꞌajsbil teruꞌ Taꞌ.
Tetz cuꞌn walmaꞌ swakꞌeꞌ inkꞌajsbil teruꞌ.
Xconk eꞌchk kbetz waꞌn tan takꞌleꞌn kꞌejuꞌ.
Yi ntaxk jeꞌul kꞌej xconk arpa tu salterio waꞌn tan takꞌleꞌn kꞌejuꞌ.
9 Ẍchiwutz cuꞌn cyakil jilwutz wunak, chimbitzink tan takꞌleꞌn inkꞌajsbil teruꞌ.
Quiꞌc na ban alchok amaꞌlil.
10 Na chin wutzileꞌn nin yi banl talmaꞌuꞌ sweꞌj, na na jepon cuꞌn jalen tziꞌn tcyaꞌj, nin na xcyeꞌ tan jopleꞌn cyakil yi tcyaꞌj.
11 Ma jaluꞌ iluꞌ inRyosil, at wiꞌnin poreruꞌ, at wiꞌnin kꞌejuꞌ.
Na yi iluꞌ teruꞌ, iluꞌ na cawunuꞌ tibaj cyakil yi eꞌchk takleꞌn yi at beneꞌn tziꞌn wi munt, nin yi at tziꞌn tcyaꞌj.