Choꞌn kꞌuklij incꞌuꞌl te Ryos nin na wakꞌ kꞌej yi yol iꞌ
56
1 Wajcaw, elk kꞌajabuꞌ sweꞌj.Na wiꞌnin eꞌ yi na chitzan tan joyleꞌn puntil yi ẍeꞌnk tan inloꞌoneꞌn junawes.
Skꞌejl nin lakꞌbal na chitzan tan inxuxeꞌn.
2 Quiꞌc nin jun tkuj yi quiꞌk na choꞌc tan joyleꞌn puntil tan inloꞌoneꞌn.
Ej nin jun cꞌoloj cuꞌn eꞌ, yi na chiꞌch chicꞌuꞌl sweꞌj.
3 Poro Wajcaw, yi na chinxob, choꞌn na kꞌukeꞌ incꞌuꞌl teꞌjuꞌ.
4 Choꞌn kꞌuklij wetz incꞌuꞌl te Kataj Ryos, nin na wakꞌ inkꞌajsbil tetz, tan cyakil yi eꞌchk takleꞌn balaj yi sukiꞌnt taꞌn swetz.
Qui tzun chinxob tetz alchok takleꞌnil yi na chitzan wunak tan xtxumleꞌn sweꞌj, na xomij iꞌ sweꞌj.
5 Cyakil nin kꞌej, txꞌixpuꞌn cunin inyol cyaꞌn, na yi cyajbil iꞌtz yi ẍeꞌnk neꞌl cuꞌn swutz.
6 Nternin na chitzan tan joyleꞌn puntil tan imbiyleꞌn.
Xomcheꞌ cyen tuꞌ tan inqꞌuicyꞌleꞌn, yi naꞌ na naꞌj nint.
Na yi cyajbil iꞌtz tan inquimeꞌn cyaꞌn.
7 Wajcaw, ¿iẍkaj ẍchiclaxk tzunk yi eꞌ juchul ilaꞌtz tanuꞌ?
Chiꞌchok quen bin cꞌuꞌluꞌ scyeꞌj. Cheꞌ xitcunuꞌ.
8 Wajcaw, sak swutzuꞌ, yi jatnaꞌ tir yi nneꞌl ojk tan incolol wib ẍchiwutz yi eꞌ incontraꞌtz.
Jat loꞌ tir yi ja nokꞌ tan paj yi eꞌ incontr.
Poro nachij tanuꞌ, na na cuꞌ tanuꞌ swutz yi teruꞌ liwruꞌ.
9 Poro na el intxum tetz, yi kol xomuꞌ sweꞌj, chelepon ojk yi eꞌ incontr.
Na yi na injak ẍchꞌeybil wetz teruꞌ, na cheꞌl ojk tzinwutz, na jun cuꞌn xomij wiꞌuꞌ sweꞌj.
10 Poro choꞌn kꞌuklij incꞌuꞌl te Wajcaw.
Nin na wakꞌ kꞌej yi yol iꞌ yi tzꞌibaꞌnt cyen.
11 Choꞌn kꞌuklij wetz incꞌuꞌl te Kataj Ryos.
Nin na wakꞌ inkꞌajsbil tetz iꞌ, tan cyakil yi eꞌchk takleꞌn balaj yi sukiꞌnt taꞌn swetz.
Qui tzun chinxob tetz alchok takleꞌnil yi na chitzan wunak tan xtxumleꞌn sweꞌj, na xomij iꞌ tan inqꞌuicyꞌleꞌn.
12 Nelepon cuꞌn te yi minsuk teruꞌ.
Nin tzatzin cuꞌn tzimban taneꞌn.
13 Na ja chinclax tkꞌab quimichil tanuꞌ.
Nin qui ntakꞌuꞌ amaꞌl tan incweꞌn junawes, bantz inxomeꞌn te tajbiluꞌ.
Na iluꞌ akꞌol wajtzaꞌkl, iluꞌ intxekbil taneꞌn.