Na cuꞌ intziꞌ swutz Ryos tan paj yi xoꞌw yi atin cuꞌnt
55
1 Iluꞌ inRyosil, tbiteꞌuꞌ yi intziꞌ inkul.Quiꞌk tew tibuꞌ tzinwutz.
2 Tbiteꞌuꞌ bin cobox tal inyol.
Nin stzaꞌweꞌuꞌ yi wajbil.
Na na cuꞌ inwutz teruꞌ, tan paj yi chin bisbil nin atin cuꞌnt.
3 Na na chinxob yi na wit yi na chiẍchꞌin yi eꞌ incontr wutz incoc.
Na chitzan tan inxoꞌwseꞌn.
4 Yi walmaꞌ na chucneꞌ tan xoꞌwl.
Pyor yi na wit yi chinquimok cyaꞌn.
5 Chin xoꞌwbil nin wutaneꞌn ẍchikꞌab incontr.
Wiꞌnin na chinlucneꞌ tan paj.
6 At na ban cuꞌnt na intxum, yi chumbalaj nin kloꞌ, yi atk inxicyꞌ chi taneꞌn jun plomẍ, tan weleꞌn ojk ẍchiwutz yi eꞌ incontraꞌtz, bantz inclaxeꞌn.
7 Baꞌn kloꞌ neꞌl ojk ẍchiwutz.
Nin chimben joylaj tan joyleꞌn jun amaꞌl tan wujeweꞌn tul.
Baꞌn chimben tul eꞌchk amaꞌl tzꞌinunin tuꞌ, bantz cyaꞌl chinxuxin.
8 Sweweꞌ wib swutz yi tojkbil yi cyekꞌekꞌ.
Nin tzincoleꞌ kloꞌ wib, tkꞌab alchok eꞌchk takleꞌnil.
9 Poro Taꞌ, xitcunuꞌ yi cyajtzaꞌkl yi eꞌ incontraꞌtz.
Sukꞌ cunuꞌ chiyol, na jaltnin xtxumleꞌn eꞌchk ilcꞌol cyaꞌn.
10 Quiꞌc jun baꞌn ẍchixoꞌl, na eꞌ len cuꞌn juchul il.
Na cyakil kꞌej, nin cyakil akꞌbal, na chixon tnum tan juchleꞌn quil.
Eꞌ len cuꞌn biyol nak. Eꞌ len cuꞌn aj oyintziꞌinl.
11 Ntin na choꞌc tan kasubleꞌn, nin tan kabiyleꞌn.
12 Poro nkꞌeꞌtz jun awer nak yi wetz incontr, yi na tzan tan inxuxeꞌn.
Nin nkꞌeꞌtz jun yi mero na chiꞌch cꞌuꞌl sweꞌj, nka yi mero wetz incontr, yi na tzan tan joyleꞌn puntil tan inloꞌoneꞌn.
Na iꞌ-k jun mero incontraꞌtz, baꞌn kloꞌ lwew wib swutz.
13 Ma na iꞌtz aẍ, yi junit oꞌ tzawuchꞌ, yi kamiw kib tzawuchꞌ, yi nternin na keꞌl na koꞌc tzawuchꞌ.
14 Nchaꞌtz, junit nxkaꞌk tzawuchꞌ tan cꞌuꞌlajeꞌn Ryos le templo.
Mero kamiw kib tzawuchꞌ.
15 Poro na kloꞌ waj yi ẍeꞌnk chiquim eꞌ incontraꞌtz.
Na waj yi nink chisotz tircuꞌn.
Na eꞌ len cuꞌn juchul il. Jaltnin juchleꞌn il na chitxum.
16 Ma in wetz copon inwutz tetz inRyosil, nin jun cuꞌn ẍchinclaxok taꞌn.
17 Skꞌejl nin lakꞌbal copon inwutz tetz.
Nokꞌok swutz iꞌ. Nin jun cuꞌn tzꞌelepon kꞌajab sweꞌj.
18 Nin kol chimben tan oyintziꞌ, iꞌ tzꞌocopon tan incolcheꞌn tan qui inquimeꞌn.
Mpe jun cꞌoloj cuꞌnk incontr, quil takꞌ iꞌ amaꞌl tan inquimeꞌn.
19 Yi wetz inRyosilaꞌtz, ilenin na tbit intziꞌ inkul, na itzꞌ iꞌ tetz ben kꞌej ben sak.
Stakꞌeꞌ chicaws yi eꞌ incontr, na yi eꞌ incontraꞌtz, qui na chitxꞌixpuj cyajtzaꞌkl, nin qui na cyek ẍchiꞌ Ryos.
20 Na na choꞌc tan chibiyleꞌn yi mero cyamiw.
Nin qui na chibisun tan paj.
21 Nin yi na chijilon yi eꞌ wunakaꞌtz, chumbalaj yol na xcon cyaꞌn.
Poro apart chitxumuꞌn, na yi na xcon eꞌchk putzpuj yol cyaꞌn, iꞌtz tan chisubleꞌn tuꞌ wunak.
Na yi cyetz chitxumuꞌn, tu chiyol, chin xoꞌwbil nin.
Na niꞌcuꞌn chiyol tu jun spar yi na kaloꞌon taꞌn.
22 Mas balaj kakꞌeꞌ cyen tircuꞌn yi bis oꞌkl yi na ul skawutz tkꞌab Ryos, na list iꞌ tan kaquiwseꞌn.
Nin quil takꞌ iꞌ amaꞌl scyetz yi eꞌ yi na cyek ẍchiꞌ iꞌ, tan chicyajeꞌn cyen junawes tul il.
23 Poro Taꞌ, na el intxum tetz yi eꞌ subul nak, scyuchꞌ yi eꞌ biyol nak.
Quil ben ẍkon mas chitiemp, ma na ẍchimukxok chan cyeꞌtz tcamposant.
Poro yi in wetz, ilenin skꞌukek incꞌuꞌl teꞌjuꞌ.