List Kataj tan kacolcheꞌn ẍchikꞌab kacontr
54
1 Wajcaw, iluꞌ inRyosil.Chin coleꞌuꞌ tan yi teruꞌ ẍchamiluꞌ.
Chin coleꞌuꞌ tan yi teruꞌ poreruꞌ.
2 Na cuꞌ inwutz teruꞌ Taꞌ, na iluꞌ inRyosil.
Tbiteꞌuꞌ intziꞌ inkul. Tbiteꞌuꞌ yi wajbil.
3 Na ja jeꞌ chimolol quib yi eꞌ wunak yi na cyocsaj quib nim tu cyajtzaꞌkl tan oyintziꞌ sweꞌj.
Nin yi cyajbil iꞌtz tan imbiyleꞌn cuꞌn.
Yi eꞌaꞌs siquier nin najk cyek ẍchiꞌuꞌ.
4 Poro iluꞌ inRyosil. At ninuꞌ tan wuchꞌeyeꞌn.
Nin quil takꞌuꞌ amaꞌl scyetz tan imbiyleꞌn cuꞌn.
5 Nin stkꞌeꞌuꞌ chicaws yi eꞌaꞌtz.
Nin eꞌ teꞌn chibaj tcꞌuꞌl yi eꞌchk takleꞌn yi ja baj chitxumul sweꞌj.
Wajcaw, cheꞌ xit cuꞌnuꞌ yi eꞌ incontraꞌtz, na baꞌn kꞌukeꞌ incꞌuꞌl teꞌjuꞌ yi list atituꞌ tan wuchꞌeyeꞌn.
6 Ej nin ko yaꞌtz, swakꞌeꞌ intxꞌixwatz teruꞌ.
Nin swakꞌeꞌ kꞌejuꞌ, na chumbalaj nin iluꞌ.
7 Na ja chinclax tanuꞌ tkꞌab cyakil yi eꞌchk sotzaj cꞌuꞌlal.
Nin ja cheꞌl cuꞌn cyakil incontr tanuꞌ swutz.