At kutzꞌajbil tu Ryos tetz ben kꞌej ben sak
16
1 Iluꞌ inRyosil, chin coleꞌuꞌ, na choꞌn kꞌuklij incꞌuꞌl teꞌjuꞌ.2 Nin iluꞌ Kataj Jehová ilenin na walnin teruꞌ:
“Yi iluꞌ yi Ryos yi at banl tuchꞌuꞌ.
Na xiquij chin tanuꞌ.
Nin choꞌn na saj imbanl tuchꞌuꞌ.”
3 Nin yi eꞌ xansaꞌncheꞌt, yaꞌstzun yi eꞌ yi na chintzatzin scyeꞌj.
4 Ma yi eꞌ wunak yi wiꞌnin bnixeꞌn chiryosil cyaꞌn, yi eꞌ yi na chijoy junt chiryosil, sjalok wiꞌnin bis oꞌkl cyaꞌn.
Ma in wetz, quiꞌc muꞌẍ tal nink xom inwiꞌ scyeꞌj, tan pateꞌn intxꞌixwatz ẍchiwutz cyetz chiryosilaꞌtz.
Quiꞌc muꞌẍ tal nink tzꞌel tzaj chibiꞌ, yi eꞌchk chiryosilaꞌtz le intziꞌ.
5 Kataj Jehová, ntin cuꞌn iluꞌ, atuꞌ le intxumuꞌn.
Na at yi banluꞌ swibaj.
Nin choꞌn atin tkꞌabuꞌ.
6 Chumbalaj nin yi amaꞌl yi ja takꞌuꞌ swetz.
Chin yubeꞌn nin kale najlchineꞌt.
7 Swakꞌeꞌ kꞌej Kataj Jehová na iꞌ na akꞌon yi balaj intxumuꞌn.
Na yi na el inwatl lakꞌbal na jilon swetz tan makleꞌn inwutz.
8 Ilenin at iꞌ le intxumuꞌn.
Nin na el intxum tetz yi xomij iꞌ sweꞌj.
Chaꞌstzun te cyaꞌl jun yi nink xcyeꞌ tan xiteꞌn intxumuꞌn.
9 Nin chaꞌstzun te na chintzatzin jaluꞌ.
Quiꞌct tzimbislej, na choꞌn kꞌuklij incꞌuꞌl te Wajcaw.
10 Wajcaw, quil takꞌuꞌ amaꞌl tan cyajeꞌn cyen walmaꞌ xetzeꞌ.
Nin quil takꞌuꞌ amaꞌl tan kꞌayeꞌn inwankil.a
Na in ẍchakumuꞌ.
In yi jun yi wiꞌnin okꞌleꞌn wutz tanuꞌ.
11 Taꞌ, ẍchajeꞌuꞌ yi beꞌ tetz itzꞌajbil swetz.
Na at wiꞌnin tzatzin teꞌjuꞌ Taꞌ.
Na choꞌn na jal kutzꞌajbil tuchꞌuꞌ, tetz ben kꞌej ben sak.