Baꞌn kaxochon tetz Ryos
17
1 Wajcaw, tbiteꞌuꞌ yi wajbil.Stzaꞌweꞌuꞌ yi intziꞌ yi inkul.
Na cyakil yi na chintzan tan talcheꞌn teruꞌ, iꞌtz yi mero bintzi.
Quiꞌc laꞌjil swuchꞌ Taꞌ.
2 Slajluchaxk swutzuꞌ yi quiꞌc wetz wil.
Na yi iluꞌ teruꞌ, na el xtxumuꞌ tetz yi mbi na bajij.
3 Na tiluꞌ yi ẍeꞌn wutaneꞌn, nin na tiluꞌ yi mbi na intxum.
Na yi na el inwatl lakꞌbal na ocuꞌ tan maꞌleꞌn wajtzaꞌkl.
Ja ocuꞌ tan inmaꞌleꞌn. Poro quiꞌc impaltil njal tanuꞌ.
Na bixbaꞌnt waꞌn tan qui injuchul wil tan intziꞌ,
4 chi na chiban yi eꞌ mas wunak. Na inmak wib tan qui inxomeꞌn te cyajtzaꞌkl yi eꞌ biyol nak.
5 Ja injoy puntil tan inxomeꞌn te yi teruꞌ beꞌuꞌ, nin tan qui weleꞌn xlaj beꞌ te yi caꞌwluꞌ.
6 Choꞌn na chintzan tan jakleꞌn ẍchꞌeybil wetz teruꞌ.
Na jun cuꞌn yol stbiteꞌuꞌ yi intziꞌ inkul.
Stzaꞌweꞌ binuꞌ yi na chintzan tan jakleꞌn teruꞌ.
7 Ẍchajeꞌuꞌ yi banl talmaꞌuꞌ swetz.
Na yi teruꞌ na ocuꞌ tan chicolcheꞌn yi eꞌ yi na chijak ẍchꞌeybil cyetz teruꞌ.
8 Chin qꞌuicyꞌleꞌuꞌ ẍchikꞌab yi eꞌ mal nak, chi na ban jun yaj tan qꞌuicyꞌleꞌn yi niꞌil yi bakꞌ wutz.
Chin coleꞌuꞌ chi na ban jun xtxuqꞌuitx scyeꞌj tal, yi na chicol quib tzakꞌ xicyꞌ.
Chin coleꞌuꞌ Taꞌ tan yi teruꞌ poreruꞌ.
9 Na yi eꞌ mal nakaꞌtz na chitzan tan imbuchleꞌn.
Ej nin yi eꞌ incontraꞌtz na cyaj ẍeꞌnk tan inquimeꞌn.
10 Na cyocsaj quib nim tu chijilon.
Chin xoꞌwbil nin chiyol yi na cyal.
11 Xomcheꞌ nin tuꞌ tan intzꞌamleꞌn.
Na yi cyajbil iꞌtz tan imbiyleꞌn cuꞌn.
12 Na yi eꞌ incontraꞌtz niꞌcuꞌn eꞌ tu jun león.
Niꞌcuꞌn eꞌ tu jun león yi chin xoꞌwbil nin wutz, yi choꞌn tewaꞌn tib stziꞌ yi tetz julil.
Nin yi list atiteꞌt tan teleꞌn tzaj wokp, tan stzꞌamleꞌn yi ẍchib.
13 Wajcaw, chin coleꞌuꞌ ẍchikꞌab.
Xcyekeꞌnuꞌ scyeꞌj incontr.
Takꞌeꞌuꞌ chicaws tan chicweꞌn mejlok swutzuꞌ.
Xconken yi sparuꞌ tan incolcheꞌn ẍchikꞌab yi eꞌ mal nakaꞌtz.
14 Chin coleꞌuꞌ ẍchikꞌab yi eꞌaꞌtz, tan yi teruꞌ poreruꞌ.
Cheꞌlken tanuꞌ wi munt.
Na yi eꞌaꞌtz choꞌn ajlij chicꞌuꞌl te yi ankꞌiꞌn tetz tzoneꞌj wuxtxꞌotxꞌ.
Takꞌeꞌ binuꞌ amaꞌl scyetz.
Jaloken chipuꞌk.
Chiwanken chinitxaꞌ jalen yil sipij chicꞌuꞌl.
Sajken chicꞌatzaj. Nin nchaꞌtzk chiban chimamaj.
15 Poro yi in wetz, ntin na waj wil wutzuꞌ.
Nin chintzatzink tan yi jun xtxolbilaꞌtz.
Na swileꞌ wutzuꞌ yil nitzꞌij junt tir.