Quiꞌc jun yi najk tek ẍchiꞌ Ryos
14
1 Ẍchiwutz yi eꞌ yi quiꞌc chibeꞌ, quiꞌc Ryos at.Yi eꞌaꞌtz quiꞌc muꞌẍ tal chixac.
Yi eꞌchk takleꞌn yi na chiban, chin xaꞌbil nin.
Cyaꞌl jun yi najk pekꞌ tan banleꞌn yi eꞌchk takleꞌn balaj.
2 Poro Kataj Ryos na xmayin tzaj jalen tziꞌn tcyaꞌj.
Na tzan iꞌ tan tilweꞌn yi ko at jun wunak yi at tajtzaꞌkl, nin ko at jun yi na tzan tan xtxumleꞌn iꞌ.
3 Poro cyaꞌl jun najk tzan tan joyleꞌn Ryos, na eꞌ cuꞌn txꞌakxnak.
Cyaꞌl jun najk pekꞌ tan banleꞌn yi eꞌchk takleꞌn balaj. Quiꞌc jun.
4 Yi eꞌ mal nakaꞌtz quiꞌc muꞌẍ cyajtzaꞌkl.
Na na chiban wiꞌnin takleꞌn yi cachiꞌ.
Nin na choꞌc tan chibajseꞌn yi eꞌ intanum chi na chiban tan bajseꞌn pam.
Siquier muꞌẍ tal nak cyek ẍchiꞌ Ryos.
5 Poro ẍchilucnek tan xoꞌw, yil quil yi choꞌn xomij wiꞌ Ryos scyeꞌj yi eꞌ yi na chiban taneꞌn tetz caꞌwl.
6 Yi eꞌ wunak yi ploj cyajtzaꞌkl, tzeꞌeꞌn tuꞌ na chiban te yi chitxumuꞌn yi eꞌ prow, yi eꞌ yi na cyek ẍchiꞌ Ryos.
Poro at nin Kataj tan chicolcheꞌn yi eꞌ tal prowaꞌtz.
7 Choꞌnk saj yi colol ketz yi oꞌ xonl Israel wi Sión.
Nin skatzatzink yil kamolxijt, yi oꞌ, yi oꞌ tanum Ryos, yi oꞌ yi elnakoꞌ xit beneꞌn tziꞌn wi munt.
Skatzatzink yil kamolxijt, tircuꞌn oꞌ yi oꞌ xonl Jacow, yi oꞌ xonl Israel.