Yi Kataj iꞌ colol ketz
12
1 Taꞌ, koꞌ coleꞌuꞌ.Na quiꞌct jun yi choꞌnk kꞌuklij cꞌuꞌl teꞌjuꞌ.
Cyaꞌl jun yi najk tek ẍchiꞌuꞌ jaluꞌ.
2 Na ntin laꞌjil na xcon cyaꞌn squibil quib.
Qui na cyal yi mero bintzi squibil quib.
Chiwutz tuꞌ chiplaj tuꞌ yi na chijilon.
3 Kataj, cheꞌ sotz cunuꞌ yi eꞌ laꞌjaꞌtz.
Nin cheꞌ sotz cunuꞌ yi eꞌ yi na cyocsaj quib nim tu chijilon.
4 Na je chiyoleꞌj:
“Yi ketz katziꞌ, xcyek tan kacolcheꞌn. Katxꞌaconk tan ketz kayol.
Chaꞌstzun te quiꞌc xac junt sketz,” cheꞌch yi eꞌaꞌtz.
5 Ma yi ketz Kataj, je yol iꞌeꞌj:
“Nocopon tan quichꞌeyeꞌn yi eꞌ tal prow, yi eꞌ yi quiꞌc colol cyetz taneꞌn.
Nocopon il scyeꞌj, na buchij cheꞌ.
Swakꞌeꞌ ẍchꞌeybil cyetz, na choꞌn at chichꞌiw sweꞌj,” stzun Ryos.
6 Yi yol Kataj, yaꞌstzun yi mero bintzi.
Nin iꞌtz mas balaj swutz yi balaj sakal, yi ocnak juk tir tkꞌakꞌ tan telseꞌn yi plojil.
7 Taꞌ, ntin iluꞌ colol ketz te yi tiempeꞌj, nin sbneꞌ opon tunintz.
Ilenin tzꞌocoponuꞌ tan kuchꞌeyeꞌn ẍchikꞌab yi eꞌ mal nakaꞌtz.
8 Na yi jun jilwutz wunakaꞌtz, ateꞌ nintz skaxoꞌl.
Nchaꞌtz cyakil wunak, na chipekꞌ tan banleꞌn yi eꞌchk takleꞌn cachiꞌ.