Kataj iꞌ ilol ketz
11
1 Yi in wetz, choꞌn na incol wib te Wajcaw.Nxac tzun na aꞌlchij swetz:
Cawleꞌn ojk txoꞌl txꞌacꞌaben chi na chiban yi eꞌ tal chꞌuꞌl.
2 Na, ilweꞌ nin yi eꞌ mal nak.
Ja wiꞌt oc chiflech tulak chicꞌoxbil tan abiyleꞌn cuꞌn.
Jalt cuntuꞌ tan teleꞌn chitzakpul.
Nin kale cyewuneꞌt quib, choꞌn na chicꞌox tzajtz tan chibiyleꞌn yi eꞌ balaj wunak.
3 ¿Mbil kaban ketz yi oꞌ balaj wunak kol tzꞌoc xiteꞌn yi balaj xeꞌ kale kꞌukleꞌt kacꞌuꞌl, nin quiꞌc xac sban?
¿Naꞌl kaꞌj nint?
4 Je puntileꞌj: Yi ketz kaRyosil at nin teraꞌtz.
Choꞌn cꞌolchij iꞌ tcyaꞌj.
Nin na til iꞌ cyakil yi na bajij.
Na tzan iꞌ tan tilweꞌn cyakil yi na chiban wunak beneꞌn tziꞌn.
5 Na tzan iꞌ tan tilweꞌn yi eꞌ balaj wunak.
Nchaꞌtz na til iꞌ yi mbi na chiban yi eꞌ mal nak.
Nin wiꞌnin na chiꞌch cꞌuꞌl scyeꞌj yi eꞌ yi ntin oyintziꞌ cyaꞌn.
6 Tzꞌul chicaws yi eꞌ mal nakaꞌtz tan Ryos.
Tzꞌul kojol xtxakꞌakꞌ tu azufre ẍchiwiꞌ.
Tzꞌul jun cyekꞌekꞌ taꞌn yi cyꞌaꞌn kꞌakꞌ taꞌn tan chitzꞌeꞌseꞌn.
Yaꞌstzun chicaws yi stkꞌeꞌ Ryos tan chicawseꞌn.
7 Na yi ketz Kataj qui na je kꞌab twiꞌ jun.
Nin wiꞌnin na pekꞌ iꞌ scyeꞌj yi eꞌ balaj.
Chaꞌstzun te squileꞌ quib yi eꞌ cꞌulutxum tu Ryos.