Qui na keꞌl te cꞌuꞌl Ryos
10
1 Wajcaw, ¿mbi tzuntz choꞌn na tew tibuꞌ joylaj?¿Mbi tzuntz na tew tibuꞌ tul yi tiempeꞌj yi chin qꞌuixcꞌuj nin atoꞌ cuꞌnt?
2 Na yi eꞌ mal nak, nicyꞌ nin na chiban yi cyetz cyajbil.
I cunin eꞌ yab txꞌiꞌ tan chibuchleꞌn yi eꞌ tal prow.
Poro eꞌ teꞌn chicopon tcꞌuꞌl chitramp yi ja bnix cyaꞌn.
3 Yi eꞌ mal nakaꞌtz, na cyocsaj quib nim tu yi eꞌchk takleꞌn yi na cyaj chiban.
Yi eꞌaꞌtz na choꞌc tan telseꞌn kꞌej, nin tan jisleꞌn Kataj.
4 Yi eꞌ mal nakaꞌtz, qui na chitxꞌixwij yi na chixmay nin tcyaꞌj nin na cyaltz:
“Quiꞌc Ryos at. Cyaꞌl jun kayajon te yi na kaban,” cheꞌch na bantz.
5 Cyakil yi na chiban, ilenin na wutzin.
Ẍchiwutz cyetz, quiꞌc ltajcyenuꞌ scyeꞌj.
Nin ẍchiwutz cyetz qui tzꞌicyꞌ teruꞌ yi mbi na chiban.
Tzeꞌeꞌn tuꞌ na chiban te chicontr.
6 Nin na chitxum:
“Cyaꞌl jun tzꞌucuꞌl skeꞌj. Quil jal kaproblem,” cheꞌch na bantz.
7 Ntin eꞌchk jis na el tzaj le chitziꞌ, nin ntin eꞌchk cꞌalaj yol, tu eꞌchk laꞌjil.
Yi na chijilon, cyꞌaꞌn nin banleꞌn junt cyaꞌn, na chin cꞌaꞌ nin chiyol.
8 Na chiben lakak aldey.
Nin na choꞌc tan chiqꞌuicyꞌleꞌn yi eꞌ yi quiꞌc quil.
Nin ewun cuntuꞌ na chibiy cuꞌn.
Nin nternin na chitzan tan chiqꞌuicyꞌleꞌn yi eꞌ yi qui na jal puntil tan chicolol quib ẍchikꞌab.
9 Nternin na chitzan tan chiqꞌuicyꞌleꞌn, chi na ban jun balum le julil, yi ewun cuntuꞌ na el tzaj wokp, tan chitzꞌamleꞌn yi eꞌ tal prowaꞌtz.
Nin yi na txꞌamxij taꞌn, nintzun na jut nintz le julil.
10 Niꞌcuꞌn eꞌ mal nakaꞌtz.
Na chiban list quib tan chitzꞌamleꞌn yi eꞌ tal prowaꞌtz, nin na chixcyeꞌ tan chitzꞌamleꞌn nin tan chibajseꞌn.
11 Na yi chitxumuꞌn yi eꞌ mal nakaꞌtz iꞌtz:
“Qui na oc Ryos tan xtxumleꞌn yi kil.
Siquier nak xmayin tzaj iꞌ te cyakil yi na kaban,” cheꞌch.
12 Wajcaw yi iluꞌ inRyosil, nink tzꞌocuꞌ tan makleꞌn chiwutz yi eꞌ mal nakaꞌtz.
Elk kꞌajabuꞌ scyeꞌj yi eꞌ tal prow.
13 Taꞌ, ¿mbi tzuntz, yi qui na cyek ẍchiꞌuꞌ?
Na yi cyetz chitxumuꞌn iꞌtz:
“Quil takꞌ Ryos kacaws tan yi eꞌchk takleꞌn cachiꞌ yi na katzan tan banleꞌn.”
14 Poro yi mero bintzi iꞌtz:
Sak cuꞌn swutzuꞌ, yi mbi na chitzan tan banleꞌn.
Sak cuꞌn swutzuꞌ yi mbi na el tzaj le chitziꞌ.
Nin stkꞌeꞌuꞌ chicaws.
Ma yi eꞌ tal prow, choꞌn na chicol quib teꞌjuꞌ.
Choꞌn na chicol quib teꞌjuꞌ yi eꞌ yi quiꞌc chitaj chitxuꞌ.
15 Tkꞌeꞌuꞌ chicaws yi eꞌ mal nakaꞌtz.
Chin puchꞌij cunink chisaj tanuꞌ.
Tkꞌeꞌuꞌ chicaws te cyakil yi mbaj chibnol.
Quiꞌk scuyuꞌ jun te yi quil.
16 Wajcaw, iluꞌ yi rey yi na cawunuꞌ jaluꞌ.
Nin scawunkuꞌ sbneꞌ opon tunintz.
Ma yi eꞌ mal nak chisotzok cyeraꞌtz.
17 Wajcaw, yi mero bintzi iꞌtz:
Yi ja tbituꞌ chitziꞌ chikul, yi eꞌ yi na cyek ẍchiꞌuꞌ.
Na ja cheꞌ quiwsajuꞌ, nin ja tbituꞌ yi mbi nchijak teruꞌ.
18 Taꞌ, xomok wiꞌuꞌ scyeꞌj yi eꞌ tal prow, yi quiꞌc chitaj chitxuꞌ, yi buchij cheꞌ cyakꞌun yi eꞌ mal nak.
Poro tkꞌeꞌuꞌ chicaws yi eꞌ mal nakaꞌtz.
Quiꞌtk choꞌc mas tan chibuchleꞌn yi eꞌ yi ateꞌ jakꞌ chicaꞌwl.