Kataj Ryos iꞌ yi pujul xtisyaꞌ yi qui na jeꞌ kꞌab twiꞌ jun
9
1 ¡Iluꞌ Wajcaw! swakꞌeꞌ inkꞌajsbil teruꞌ.Tetz cuꞌn walmaꞌ swakꞌeꞌ teruꞌ.
Nin tzintxoleꞌ yi balajiluꞌ.
2 Kataj, na waj chinẍchꞌin tan yi tzatzin yi atin cuꞌnt.
Na waj lwakꞌ inkꞌajsbil teruꞌ, na iluꞌ yi wiꞌtz Ajcaw tetz tcyaꞌj tu yi wuxtxꞌotxꞌ.
3 Ja cheꞌl ojk yi eꞌ incontr swutzuꞌ Taꞌ.
Ja chijeꞌ trimp, nin ja chiquim.
4 Na yi iluꞌ teruꞌ Taꞌ, iluꞌ yi pujul xtisyaꞌ yi qui na jeꞌ kꞌabuꞌ twiꞌ jun.
Cꞌolchijuꞌ wi ẍchemuꞌ tan takꞌleꞌn chicaws yi eꞌ incontraꞌtz.
5 Wajcaw, ja makuꞌ chiwutz yi eꞌ pajol caꞌwl.
Ja cheꞌl cuꞌn tanuꞌ swutz. Junawes ja chisotz yi eꞌaꞌtz tanuꞌ.
6 Ja wiꞌt chiquim yi eꞌ contr.
Nin ja wiꞌt chiloꞌon yi eꞌ wunak yi na chiꞌch chicꞌuꞌl.
Ja chiloꞌon tanuꞌ. Nin quiꞌc nin muꞌẍ senil chinajbil ncyaj cyen.
7 Na yi teruꞌ Taꞌ, iluꞌ yi wiꞌtz Ajcaw tetz ben kꞌej ben sak.
Ja bixeꞌ tanuꞌ tan cawuneꞌnuꞌ. Nin quil je kꞌabuꞌ twiꞌ jun.
8 Tzꞌocoponuꞌ tan maꞌleꞌn cyajtzaꞌkl cyakil jilwutz wunak, nin quil jeꞌ kꞌabuꞌ twiꞌ jun.
Chin tzꞌaknak cuꞌn ltulejuꞌ yil tzꞌocuꞌ tan takꞌleꞌn chicaws.
9 Ma yi eꞌ yi chin qꞌuixcꞌuj nin ateꞌ cuꞌnt, scyuchꞌ yi eꞌ yi buchij cheꞌ, tzꞌocoponuꞌ tan chicolcheꞌn.
10 Chaꞌstzun te Wajcaw, cyakil yi eꞌ yi na el chitxum tetz yi ẍeꞌn taneꞌnuꞌ, choꞌn kꞌuklij chicꞌuꞌl teꞌjuꞌ.
Na na el chitxum tetz yi qui na cheꞌl te cꞌuꞌluꞌ.
11 Kakꞌeꞌ bin kakꞌajsbil tetz Kataj yi choꞌn na cawun wi Sión.
Katxoleꞌ yi banl talmaꞌ iꞌ scyetz cyakil wunak beneꞌn tziꞌn.
12 Na yi Kataj na til yi qꞌuixcꞌuj yi ateꞌ cuꞌnt yi eꞌ yi buchij cheꞌ.
Nin na tbit iꞌ yi toꞌkl chicꞌuꞌl. Nin iꞌ ltzꞌakꞌon chicaws yi eꞌ yi na chitzan tan buchuꞌn.
13 I bin jaluꞌ Taꞌ, elk kꞌajabuꞌ sweꞌj.
Til tzajuꞌ yi buchbeꞌn wetz cyakꞌun yi eꞌ yi na chiꞌch chicꞌuꞌl sweꞌj.
Chin coleꞌuꞌ ẍchikꞌab, na txant tan weleꞌn cuꞌn swutz.
14 Kol chin coluꞌ, choꞌn chinxcyek cuꞌn swutz yi sawanil Jerusalén tan xtxoleꞌn scyetz cyakil wunak, yi ntin cuꞌn iluꞌ balaj.
Nin swaleꞌ scyetz yi wiꞌnin na chintzatzin tkꞌabuꞌ.
Na ntin cuꞌn iluꞌ nchincolon.
15 Ma yi eꞌ mal nakaꞌtz, ja bnix eꞌchk jul cyakꞌun tan incweꞌn kloꞌ tul, poro eꞌ teꞌn nchicuꞌ tul.
Ja bnix jun leb cyakꞌun tan intzꞌamleꞌn, poro eꞌ teꞌn nchitxꞌamx taꞌn.
16 Tan yi xtxolbilaꞌseꞌj, ja lajluchax yi ẍchamil Kataj.
Na iꞌ mmakꞌon chicaws yi eꞌ mal nakaꞌtz.
Poro eꞌ teꞌn nucꞌul tetz yi chitrampaꞌtz.
17 Na jun cuꞌn yol, cyakil yi eꞌ mal nak, scyuchꞌ cyakil yi eꞌ yi ja cyaj quilol Ryos, choꞌn chopon cyeraꞌtz tqꞌuixcꞌuj.
18 Poro yi eꞌ tal prow, yi qui na el Ryos te chicꞌuꞌl, at nin iꞌ-tz tan quichꞌeyeꞌn.
Ilenin at iꞌ tan chiqꞌuicyꞌleꞌn.
19 Wajcaw okuꞌ il teꞌj.
Quil takꞌuꞌ amaꞌl scyetz yi eꞌ mal nak tan chibnol yi cyetz cyajbil.
Cheꞌ ẍchakeꞌuꞌ swutzuꞌ Taꞌ, tan takꞌleꞌn chicaws.
20 Cheꞌ xoꞌwseꞌuꞌ Taꞌ.
Ẍchajeꞌuꞌ scyetz yi eꞌ tuꞌ wunak.