Yi kꞌej Kataj tu chiwalor wunak
8
1 Taꞌ, iluꞌ wiꞌtz Cawl ketz,at kꞌejuꞌ beneꞌn tziꞌn wi munt.
Nin at kꞌejuꞌ jalen tziꞌn tcyaꞌj.
2 Nchaꞌtz tan chikꞌajsbil yi eꞌ tal nitxaꞌ, tan chikꞌajsbil yi eꞌ yi na chitxutxuneꞌt, na bnix jun colbil ib tanuꞌ.
Ja bnix yi jun colbil ibaꞌtz tanuꞌ, tan kacolol kib ẍchiwutz yi eꞌ kacontr.
Ej nin xconk yi jun xtxolbilaꞌtz tan chisotzajeꞌn yi eꞌ pajol caꞌwluꞌ, scyuchꞌ yi eꞌ contruꞌ.
3 Taꞌ yi na wil cyakil yi tcyaꞌj yi ja bnix tanuꞌ, nin yi na wil yi xaw, nin yi na wil yi eꞌchk txꞌuml yi ja bnix tanuꞌ,
4 na noꞌctz tan xtxumleꞌn:
¿Mbi kaxac yi oꞌ wunak?
¿Mbi xac jun yaj swutzuꞌ?
¿Mbi tzuntz na kuꞌl txꞌakx tcꞌuꞌluꞌ?
¿Mbi tzuntz na oc iluꞌ skeꞌj Taꞌ?
5 Na ja kabnix tanuꞌ chi oꞌ-k ryos taneꞌn.
Ja kabnix tanuꞌ, nin ja takꞌuꞌ kakꞌej.
Nin chin tzꞌaknak cuꞌn nkoꞌ tulejuꞌ.
6 Ja takꞌuꞌ caꞌwl sketz, tan kacawuneꞌn scyeꞌj cyakil yi eꞌchk mas takleꞌn.
Ja takꞌuꞌ amaꞌl sketz tan koqueꞌn tetz cyajcawil cyakil yi bnixnak tanuꞌ.
7 Na kacawun scyeꞌj yi eꞌ cneꞌr.
Na kacawun scyeꞌj yi eꞌ wacẍ.
Nin scyeꞌj yi eꞌ smaron txuc.
8 Na kacawun scyeꞌj yi eꞌ txuc yi na chixicyꞌin.
Nin scyeꞌj yi eꞌ txuc yi ateꞌ xe aꞌ.
Nin scyeꞌj cyakil yi ateꞌ xe mar.
9 Wajcaw, iluꞌ wiꞌtz Cawl
nin at kꞌejuꞌ beneꞌn tziꞌn wi munt.