Kataj Ryos, iꞌ yi pujul xtisyaꞌ yi tzꞌaknak cuꞌn
7
1 Wajcaw, iluꞌ inRyosil. Ntin teꞌjuꞌ na incolwit wib.Chin coleꞌuꞌ bin ẍchikꞌab yi eꞌ incontr, yi na chitzan tan joyleꞌn puntil tan imbiyleꞌn cuꞌn.
2 Taꞌ chin coleꞌuꞌ, na ko tzun neꞌl cuꞌn cyaꞌn swutz.
Na niꞌcuꞌn eꞌ incontr tu balum.
Ko quil chin coluꞌ, puchꞌij cunin chinsaj cyaꞌn.
3 Wajcaw, iluꞌ inRyosil.
¿Naꞌ nchinjuchuneꞌt, te cyakil yi eꞌchk takleꞌneꞌj?
4 ¿Ja peꞌ quim jun wunak waꞌn?
¿Ko ja tzun imban mal tetz jun wamiw yi nternin na keꞌl na koꞌc tuchꞌ?
¿Ko ja tzun cheꞌ imbuch yi eꞌ incontr?
5 Yi ko yaꞌtz, chibneꞌ bin incontr cyajbil sweꞌj.
Chintxꞌamxoken bin cyaꞌn.
Elk bin inkꞌej cyaꞌn.
Ej nin baꞌn chincuꞌ cyaꞌn tbeꞌ.
6 Wajcaw chin coleꞌuꞌ.
Xcyekeꞌnuꞌ scyeꞌj incontr.
Cheꞌ cawseꞌuꞌ tan yi teruꞌ poreruꞌ.
Poro xomok wiꞌuꞌ sweꞌj.
Na alijt cyen tanuꞌ yi iluꞌ jun balaj pujul xtisyaꞌ, yi qui na je kꞌab twiꞌ jun.
7 Chuꞌl cyakil eꞌchk tnum.
Chuꞌl cyakil eꞌchk nación swutzuꞌ.
Nin scawunkuꞌ squibaj.
8 Taꞌ, yi iluꞌ yi na ocuꞌ tan maꞌleꞌn cyajtzaꞌkl cyakil wunak, chin maꞌlajuꞌ chi na banuꞌ scyeꞌj yi eꞌ wunakaꞌtz.
Chin maꞌlajuꞌ quib yi wutaneꞌn, na chinch wetz quiꞌc wil.
9 Taꞌ chin tzꞌaknak cuninuꞌ, na baꞌn na el xtxumuꞌ te eꞌchk kajtzaꞌkl.
Baꞌn na el xtxumuꞌ te yi eꞌchk katxumuꞌn yi na icyꞌ tkacꞌuꞌl.
Makeꞌ binuꞌ chiwutz yi eꞌ juchul il.
Ma yi eꞌ yi baꞌn ateꞌt cheꞌ ẍchꞌeyajuꞌ tan chiquiwixeꞌn.
10 Yi wetz colol wetz iꞌtz yi Kataj Ryos, yi taw yi tcyaꞌj tu yi wuxtxꞌotxꞌ.
Yi wetz colol wetzaꞌtz, na oc tan kacolcheꞌn yi oꞌ yi skoj cuꞌn te kalmaꞌ.
11 Kataj Ryos iꞌ yi pujul xtisyaꞌ, yi qui na je kꞌab twiꞌ jun, na ilen nin na takꞌ iꞌ chicaws yi eꞌ juchul il.
12 Ko quil chibansaj quib yi eꞌ wunak tu Kataj Ryos, jepon wiꞌ yi spar iꞌ taꞌn, tan biyoꞌn.
List atit cyakil yi eꞌchk maꞌcl iꞌ tan chibiyleꞌn cuꞌn.
13 Nchaꞌtz na tzan iꞌ tan techeꞌn nin yi eꞌchk flech yi cyꞌaꞌn kꞌakꞌ taꞌn.
List atit yi eꞌchk flech yi xconk taꞌn.
Cyakil yi eꞌchk maꞌcl iꞌ tetz oyintziꞌ list atit.
14 Chixmayninuꞌ yi eꞌ juchul il.
Ja wiꞌt chiloꞌon cyeraꞌtz, na na chiẍchꞌin chi na ban jun chꞌon wiꞌ yi txꞌanlij tlen tuꞌ.
Nin yi tzꞌitzꞌok scyeꞌj, iꞌtz eꞌchk takleꞌn cachiꞌ, iꞌtz yi eꞌchk laꞌjil.
15 Eꞌ nkopon jun chin jul tan imbeneꞌn kloꞌ tul, poro eꞌ teꞌn nchiben tzoypuj tul.
16 Cyakil yi eꞌchk takleꞌn cachiꞌ yi na chitzan tan banleꞌn, taꞌsteꞌn nin lbajeꞌt ẍchiwiꞌ.
17 Ma yi in wetz, swakꞌeꞌ inkꞌajsbil tetz Kataj yi wiꞌtz Ryos, na yi na oc tan pujleꞌn xtisyaꞌ, qui na jeꞌ kꞌab twiꞌ jun.
Chaꞌstzun te swakꞌeꞌ inkꞌajsbil tetz iꞌ, na iꞌ taw cyakil yi tcyaꞌj tu yi wuxtxꞌotxꞌ.