Ẍchꞌeybil ketz te yi atoꞌ tul sotz cꞌuꞌlal
6
1 Wajcaw, max cꞌuꞌluꞌ swibaj. Quil chin yajuꞌ te yi jeꞌnak lajp wiꞌuꞌ sweꞌj. Quil chincawsajuꞌ te yi makꞌtnakuꞌ.2 Wajcaw, elk kꞌajabuꞌ sweꞌj, na quiꞌct inwalor na innach. Taꞌ, takꞌuꞌ junt tir inwalor, na cyakil inwankil na lucneꞌ.
3 Na chinlucneꞌ tan yi xoꞌw yi atin cuꞌnt. ¿Tonaꞌ tzꞌuluꞌ tan wuchꞌeyeꞌn?
4 Wajcaw, sajkuꞌ tan wuchꞌeyeꞌn. Chin coleꞌuꞌ tan yi banl talmaꞌuꞌ.
5 Na kol chinquim, quiꞌt tzꞌul txꞌakxuꞌ tincꞌuꞌl. Quiꞌct rmeril tan incꞌuꞌlaluꞌ ko sken chin mukxij.
6 Wajcaw, ja icyꞌ impaj tan oꞌkl, na cyakil akꞌbal na nokꞌ. Nin cyakil akꞌbal na acꞌ yi inwitzꞌ tan taꞌal inwutz.
7 Tan yi oꞌkl yi atin cuꞌnt, ja loꞌon inwutz. Tan yi oꞌkl yi atin cuꞌnt, ja oc muj teꞌj. Yaꞌstzun wutaneꞌn tan chipaj incontr.
8 Ma jaluꞌ axwok pajol caꞌwl quiteleꞌnk sweꞌj, na ja wiꞌt tbit Wajcaw yi toꞌkl walmaꞌ.
9 Ja tbit yi intziꞌ inkul. Ja tbit yi minjak tetz. Chaꞌstzun te quiteleꞌnk sweꞌj.
10 Na yi eꞌ incontraꞌtz, ẍchiquimok tan xoꞌw. Tzꞌelepon chitxꞌix, nin chelpon ojk tan yi xtxꞌixwilil yi ateꞌ cuꞌnt. Qui tzꞌicyꞌ scyetz yil tzꞌul xoꞌwsbil cyetz tan cyeleꞌn ojk.