Baꞌn kajak ẍchꞌeybil ketz tetz Kataj cyakil jalchan
5
1 Taꞌ, iluꞌ Wajcaw.Tbiteꞌuꞌ yi intziꞌ inkul.
Tbiteꞌuꞌ yi na chintxꞌayneꞌ swutzuꞌ.
Stzaꞌwejuꞌ yi na chintzan tan jakleꞌn teruꞌ.
2 Na iluꞌ inReyil. Iluꞌ inRyosil Taꞌ.
Choꞌn na cuꞌ inwutz teruꞌ.
Tbitzajuꞌ yi toꞌkl walmaꞌ, na choꞌn na nokꞌ swutzuꞌ Taꞌ.
3 ¡Siwl Taꞌ!
Jalchan cunin na tbituꞌ yi intziꞌ inkul.
Jalchan cunin na chinjilon teruꞌ.
Na injak ẍchꞌeybil wetz teruꞌ Taꞌ, nin na inchꞌiw yi tajbiluꞌ.
4 Na yi iluꞌ teruꞌ Taꞌ, nkꞌeꞌtz iluꞌ jun Ryos yi nak pekꞌuꞌ te yi ilcꞌol, yi nak pekꞌuꞌ te yi eꞌchk takleꞌn yi cachiꞌ.
Na yi eꞌ juchul il, quiꞌc rmeril tan chinajeweꞌn teꞌjuꞌ.
5 Yi eꞌ yi na cyocsaj quib nim tu cyajtzaꞌkl, quiꞌc cyopombil teꞌjuꞌ.
Yi eꞌ yi chin cachiꞌ nin na chiban, qui na ajwij chiwutz tanuꞌ.
6 Na cheꞌl cuꞌn cyakil yi eꞌ laꞌj tanuꞌ swutz.
Na cheꞌl cuꞌn cyakil yi eꞌ jopol wutzaj tanuꞌ swutz.
Na cheꞌl cuꞌn cyakil yi eꞌ biyol nak tanuꞌ swutz.
Na qui na pekꞌuꞌ scyeꞌj.
7 Ma yi in wetz Taꞌ, tan tuꞌ banl talmaꞌuꞌ, at rmeril tan woponeꞌn xe caꞌluꞌ, at rmeril tan wocomponeꞌn tan cꞌuꞌlajeꞌnuꞌ, tan wukꞌol kꞌejuꞌ.
At rmeril tan inxmayilnin kale najleꞌtuꞌ, yi na noꞌc tan nachleꞌn biꞌuꞌ.
8 Taꞌ, chin nicyꞌsajuꞌ tan inxomeꞌn te yi tajbiluꞌ, na wiꞌnin incontr yi na cyaj chixmayin sweꞌj.
Chin nicyꞌsajuꞌ bin tan inxomeꞌn te yi beꞌuꞌ.
9 Ma yi eꞌ incontraꞌtz nkꞌeꞌtz bintzi chijilon.
Na niꞌcuꞌn quitaneꞌn tu jun nichil almaꞌ, yi chin kꞌaynak nin tul.
Na yi na chijilon, chitziꞌ tuꞌ, chiplaj tuꞌ.
Ntin laꞌjil na xcon cyaꞌn.
10 Taꞌ, cheꞌ cawseꞌuꞌ yi eꞌaꞌtz.
Iteꞌn nink cyajtzaꞌkl tzꞌoc tan chibenseꞌn tul il.
Cheꞌ lajlenuꞌ, na nimix cunin quil baj chijuchul swutzuꞌ.
Na qui nin nchoꞌc cꞌulutxum jakꞌ caꞌwluꞌ.
11 Cyakil yi eꞌ yi choꞌn na chicol quib teꞌjuꞌ, chitzatzink, nin tetz cuꞌn cyalmaꞌ chibitzink.
Ilen nin chitzatzink nin chibitzink, na iluꞌ qꞌuicyꞌlom cyetz.
12 Na yi teruꞌ Taꞌ, na takꞌuꞌ chibanl yi eꞌ yi ilenin kꞌuklij chicꞌuꞌl teꞌjuꞌ.
Nin yi banl talmaꞌuꞌ at nintz tan chicolcheꞌn, chi jun makbil flech.