Yi chisukil yi eꞌ xonl Israel chiyol tan chibnol taneꞌn yi caꞌwl Ryos
10
1 Je yi kabiꞌ yi oꞌ yi cuꞌ wiꞌ kakꞌab te yi uꞌj yi bnix kaꞌn kale oꞌ sukwit yi skabneꞌ taneꞌn yi caꞌwl Ryos. Cuꞌ weri imbiꞌ yi in gobernador, yi in Nehemías, yi cyꞌajl Hacalías.2 Nchaꞌtz cuꞌ chibiꞌ: Sedequías, Seraías, Azarías, Jeremías, 3 Pasur, Amarías, Malquías, 4 Hatús, Sebanías, Maluc, 5 Harim, Meremot, Obadías, 6 Daniel, Ginetón, Baruc, 7 Mesulam, Abías, Mijamín, 8 Maazías, Bilgai tu Semaías. Cyakil yi eꞌaꞌtz, eꞌ cuꞌn paleꞌ.
9 Nchaꞌtz je chibiꞌ yi eꞌ xonl Leví yi cuꞌ wiꞌ chikꞌab teꞌj: Josué yi cyꞌajl Azanías, tu Binuy yi xonl Henadad nin Cadmiel. 10 Scyuchꞌ yi eꞌ titzꞌun yi na chibiꞌaj Sabanías, tu Aodías, Kelita, Pelaías tu Hanán, 11 Micaía, Rehob, Hasabías, 12 Zacur, Serebías, Sebanías, 13 Hodías, Bani nin Beninu.
14 Ej, nin je chibiꞌ yi eꞌ kawiꞌ banl wiꞌ tetz tnum: Paros, Pahat-moab, Elam, Zatu, Bani, 15 Buni, Azgad, Bebai, 16 Adonías, Bigvai, Adín, 17 Ater, Ezequías, Azur, 18 Hodías, Hasum, Bezai, 19 Harif, Anatot, Nebaí, 20 Magpías, Mesulam, Hezer, 21 Mesezabeel, Sadoc, Jadúa, 22 Pelatías, Hanán, Anaías, 23 Oseas, Hananías, Hasub, 24 Halohes, Pilha, Sobec, 25 Rehum, Hasabna, Maasías, 26 Ahías, Hanán, Anán, 27 Maluc, Harim nin Baana.
28 Nchaꞌtz cuꞌ wiꞌ chikꞌab yi eꞌ mas xonl Israel chi quitaneꞌn yi eꞌ paleꞌ, scyuchꞌ yi eꞌ xonl Leví, scyuchꞌ yi eꞌ qꞌuicyꞌlom puert, scyuchꞌ yi eꞌ ajbitz, scyuchꞌ yi eꞌ chakum yi na chixcon le caꞌl Kataj, scyuchꞌ cyakil yi eꞌ mas wunak yi nsken chijatx quib, scyuchꞌ yi eꞌ awer nak, tuml cyakil quixkel, scyuchꞌ yi eꞌ chinitxaꞌ yi nsken ul cyajtzaꞌkl. Tircuꞌn eꞌaꞌs cuꞌ len wiꞌ chikꞌab te yi jun kayolaꞌtz.
29 Ej, nin nchaꞌtz junit ban chitxumuꞌn scyuchꞌ yi eꞌ chixonl, scyuchꞌ cyetz cyajcawil. Nintzun eꞌ suk chiyol, yi ẍchixomok te yi caꞌwl kaRyosil, yi takꞌnak iꞌ tetz Moisés yi elsanl stziꞌ iꞌ. Eꞌ suk chiyol, yi ẍchibneꞌ taneꞌn yi caꞌwl tu yi tajbil Ryos.
30 Je chiyoleꞌj yi nchisuk tetz Kataj:
Quiꞌc rmeril tan kakꞌol amaꞌl tan tumeweꞌn jun kanitxaꞌ scyuchꞌ yi eꞌ awer nak. 31 Nin quiꞌc rmeril tan kalokꞌol jun eꞌchk takleꞌn scyetz yil chuꞌl tan cꞌayiꞌn le yi jun kꞌej ujleꞌn, nka alchok junt kꞌej yi xan skawutz ketz.
Nchaꞌtz ja bixeꞌ kaꞌn yi tajweꞌn tan tujeweꞌn katxꞌotxꞌ yil jepon yi jukiꞌn yob. Ntin kak yob skakꞌujk swutz yi katxꞌotxꞌ, ma le jukiꞌn yob stzꞌujek kaꞌn. Ej, nin nchaꞌtz yil jepon yi jukiꞌn yobaꞌtz, tajweꞌn kacuy chipaj yi eꞌ katanum yi at chitxꞌokꞌbeꞌn sketz.
32 Nchaꞌtz bixeꞌ kaꞌn tan kakꞌol len jun tal xtiꞌl sakal le jujun yob tan jaleꞌn yi bambil xe caꞌl Kataj. 33 Chi taneꞌn yi pwok yi na xcon tan lokꞌcheꞌn yi pam yi na cyaj cyen swutz Kataj, tu yi eꞌchk oy yi tajweꞌn tzꞌoylij cyakil kꞌej. Nin tan lokꞌcheꞌn yi txꞌixwatz yi na pat-xij cyakil kꞌej, tu yi eꞌchk mas txꞌixwatz yi na pat-xij le jujun kꞌej ujleꞌn, tu yi eꞌchk oy yi na koy yi na jal yi neꞌẍ xaw, tu yi eꞌchk mas kꞌej yi xansaꞌnt.
Nchaꞌtz ja bixeꞌ kaꞌn tan kakꞌol len kacutxuj, bantz jaleꞌn yi eꞌchk mas oy yi tajweꞌn tzꞌakꞌlij, chi taneꞌn yi oy tan jakleꞌn cuybil kapaj. Ej, nin tan jaleꞌn tircuꞌn yi tajweꞌn tan banleꞌn kamunl swutz Kataj.
34 Nchaꞌtz cyakil eꞌ yi eꞌ paleꞌ scyuchꞌ yi eꞌ xonl Leví, scyuchꞌ cyakil yi eꞌ mas katanum, oꞌ oc tan txꞌiluꞌn skeꞌj yi naꞌ scyetz jujun najal tzꞌulsan yi siꞌ yi xconk le yi caꞌl Kataj. Tajweꞌn yil tzꞌopon yi siꞌaꞌtz te yi eꞌchk kꞌej yi bixbaꞌnt tan xconeꞌn le patbil txꞌixwatz, quib yi tzꞌibaꞌnt cyen le ley.
35 Nchaꞌtz ja bixeꞌ yi tzꞌul cyakil yi bajx wutz yi kujul kaꞌn xe caꞌl Kataj.
36 Nchaꞌtz ja bixeꞌ kaꞌn yi skakꞌeꞌ yi bajx kanitxaꞌ tetz Kataj, tu yi bajx cyal yi kawacẍ scyuchꞌ cyakil kawun, chi tzꞌibaꞌnt cyen tul yi ley. Nin choꞌn chopon kaꞌn ẍchiwutz yi eꞌ paleꞌ yi ateꞌ tan banleꞌn chimunl le caꞌl Kataj.
37 Nchaꞌtz ja bixeꞌ kaꞌn yi kakꞌeꞌ yi kadiesum, scyetz yi eꞌ kapaleꞌil. Na yil jeꞌ yi katriw tu yi bajx wutz yi eꞌchk loꞌbaj, tu yi bajx wutz uva, tu yi bajx aceit yi na bnix te wutz oliw, choꞌn tzꞌopon kaꞌn ẍchiwutz yi eꞌ xonl Leví. Na yaꞌstzun cyetz chibambil.
38 Nin yil chopon yi eꞌ xonl Leví tan cꞌulcheꞌn yi eꞌchk oyaꞌtz, tajweꞌn xomnin jun paleꞌ scyeꞌj, jun scyeri yi xonl Aarón. Yil molxij cyaꞌn, baꞌn tzun tzꞌaj yi diesum cyaꞌn le caꞌl Kataj.
39 Ja bixeꞌ kaꞌn cyakil yi oꞌ xonl Israel scyuchꞌ yi eꞌ xonl Leví, tan kakꞌol len eꞌchk koy yil jeꞌ kacosech. Kakꞌeꞌ te kuxiꞌn triw tu yi taꞌal uva yil molxij kaꞌn, tu yi aceitil yi wutz oliw. Choꞌn tzꞌopon kaꞌn kale na molxeꞌt yi eꞌchk oy le caꞌl Kataj, kale na chaꞌteꞌt yi eꞌ paleꞌ, scyuchꞌ yi eꞌ qꞌuicyꞌlom caꞌl Kataj, scyuchꞌ yi eꞌ aj bitz te yi na chaꞌtij tan banleꞌn chimunl. Na ja bixeꞌ kaꞌn yi quil tzꞌel yi caꞌl Kataj te kacꞌuꞌl.