Yi chibansal quib yi eꞌ xonl Israel swutz Kataj Ryos
9
1 Itzun bantz le junak cyaj tajlal iteꞌn nin xawaꞌtz, nintzun eꞌ molt quib chicyakil yi xonl Israel tan nachleꞌn Kataj. Eꞌ mol quib tan mucꞌleꞌn weꞌj, nin oc yi beꞌch cyetz yi na ẍchaj yi wiꞌnin chibisuneꞌn. Ej, nin jeꞌ chipucꞌul puklaj xoꞌl chiwiꞌ.2 Nchaꞌtz, nin eꞌ jatx quib yi eꞌ xonl Israel scyuchꞌ yi eꞌ awer nak yi ateꞌ ẍchixoꞌl. Nintzun eꞌ baj xcyeꞌeꞌntz tan jakleꞌn cuybil chipaj tetz Kataj, nin tan xtxoleꞌn yi quil tu yi quil yi chimam chiteꞌ.
3 Te yi txiclcheꞌ, nintzun oc siꞌleꞌn yi liwr kale atit yi caꞌwl Kataj Ryos ẍchiwutz. Ox tzun or eꞌ bantz tan tbiteꞌn yi caꞌwlaꞌtz. Nin oxt or eꞌ ban tan xtxoleꞌn yi quil nin tan cꞌuꞌlajeꞌn Kataj.
4 Nintzun eꞌ jeꞌ yi eꞌ xonl Leví tibaj yi eꞌchk yotx, nin eꞌ oc tan cuꞌswutzil tetz Kataj yi kaRyosil. Chin chiwiꞌ nin ban tan yol. Je chibiꞌ yi eꞌaꞌtz: Josué, Binuy, Cadmiel, Sabanías, Buni, Serebías, Bani nin Quenani.
5 Nchaꞌtz yi cobox xonl Leví, Josué, Cadmiel, Benuy, Hasabnías, Serebías, Hodías, Sebanías nin Petaías, nin cyal scyetz cyakil yi eꞌ mas xonl Israel: “Kamoleꞌeꞌn kib, nin koꞌken tan takꞌleꞌn kakꞌajsbil tetz Kataj yi kaRyosil. Kakꞌeꞌ kakꞌajsbil tetz, tetz ben kꞌej ben sak. Na at mas kꞌej yi tetz biꞌ swutz alchok jilwutz biꞌajil,” cheꞌch bantz.
6 Nchaꞌtz tal Esdras: “Taꞌ, ntin iluꞌ ketz Kataj. Quiꞌc junt at. Iluꞌ bnol tetz yi tcyaꞌj tu cyakil yi eꞌchk takleꞌn yi at tcyaꞌj. Nin iluꞌ bnol tetz yi wuxtxꞌotxꞌ tu cyakil yi eꞌchk takleꞌn yi at swutz. Nin iluꞌ bnol tetz yi mar tu cyakil yi at xeꞌ. Iluꞌ xicyol tetz cyakil yi eꞌchk takleꞌnaꞌtz. Ej, nin cyakil yi jun cꞌoloj ẍchakumuꞌ yi ateꞌ tcyaꞌj na chitzan tan cꞌuꞌlajeꞌnuꞌ.
7 ”Kataj, iluꞌ kaRyosil, iluꞌ txaꞌoneꞌn Abram tan xomeꞌn teꞌjuꞌ. Iluꞌ elsan tzaj le tnum Ur kale najlcheꞌt eꞌ caldeo. Nin ja jeꞌ xtxꞌixpuluꞌ yi biꞌ, na ja oc taꞌnuꞌ tetz Abraham.
8 ”Taꞌ, ja tiluꞌ yi iꞌ jun yaj yi ja kꞌukeꞌ cꞌuꞌl teꞌjuꞌ. Chaꞌstzun te ja bixeꞌ jun tratuꞌ tuchꞌ. Yi jun trataꞌtz iꞌtz, yi ja sukuꞌ tan tkꞌoluꞌ jun cꞌoloj amaꞌl tetz. Nin iꞌtz chiꞌamaꞌl yi eꞌ cananeo tu eꞌ hitita, eꞌ amorreo, eꞌ ferezeo, eꞌ jebuseo tu yi eꞌ gergeseo. Suknakuꞌ tetz, nin ja el cuꞌnuꞌ te yi yoluꞌ, na ja takꞌuꞌ yi amaꞌlaꞌtz scyetz yi eꞌ tetz xonl. Na yi iluꞌ teruꞌ ilenin na el cuꞌnuꞌ te yi yoluꞌ.
9 ”Nin nchaꞌtz, ja tiluꞌ yi qꞌuixcꞌuj yi micyꞌpon cyakꞌun yi eꞌ kamam kateꞌ jakꞌ chicaꞌwl yi eꞌ aj Egipto. Nchaꞌtz yi cyoponeꞌn tzi Cyak Mar, ja tbituꞌ chitziꞌ chikul yi cyoqueꞌn tan jakleꞌn ẍchꞌeybil cyetz teruꞌ.
10 ”Ja ẍchajuꞌ wiꞌnin techl tu eꞌchk milawr tetz yi faraón, scyuchꞌ yi eꞌ mas ajcaw yi ateꞌ jakꞌ caꞌwl iꞌ, scyuchꞌ cyakil yi eꞌ aj Egipto. Ja ẍchajuꞌ yi xtxolbilaꞌtz scyetz tan chicawseꞌn, na ja tiluꞌ yi qꞌuixcꞌuj tu yi jisbil cyetz yi eꞌ kamam kateꞌ yi micyꞌpon cyaꞌn jakꞌ chicaꞌwl. Nin ja jal kꞌejuꞌ tan yi eꞌchk milawraꞌtz yi mbanuꞌ.
11 ”Cob cuntuꞌ el yi Cyak Mar tanuꞌ yi quicyꞌeꞌn tzaj yi eꞌ kamam kateꞌ. Na skejenleꞌn quicyꞌeꞌn tzaj. Yi wiꞌt quicyꞌeꞌn tzaj cweꞌn tzun jopoluꞌ yi mar, nin cyakil yi eꞌ yi xomcheꞌ tzaj tan chitzꞌamleꞌn, ja chicyaj cyen xe mar. Ja chiben mulkꞌuj chi na ban jun cꞌub yi na ben joꞌliꞌn wi aꞌ.
12 ”Nchaꞌtz ja bajx cuꞌnuꞌ ẍchiwutz tul jun bocꞌoj sbakꞌ tan ẍchajleꞌn chibeꞌ. Ma lakꞌbal, bajxijuꞌ ẍchiwutz tul jun bocꞌoj kꞌakꞌ tan xtxekeꞌn chibeꞌ.
13 ”Ej, nin nchaꞌtz ja cuꞌuluꞌ tan yol scyetz wi wutz Sinaí. Ja jilon tzajuꞌ scyetz tcyaꞌj, nin ja taluꞌ yi tajbiluꞌ scyetz. Ja taluꞌ yi balaj ẍchusuꞌnuꞌ scyetz, ja takꞌuꞌ eꞌchk leyuꞌ tu eꞌchk caꞌwluꞌ yi bintzinin tetz scyetz.
14 ”Ja taluꞌ scyetz yi tajweꞌn tan chibnol taneꞌn yi jun kꞌej ujleꞌn. Choꞌn tkꞌoluꞌ yi eꞌchk caꞌwlaꞌtz tetz Moisés yi ẍchakumuꞌ.
15 ”Nchaꞌtz takꞌuꞌ chiwaꞌ yi choꞌn sajeꞌn tcyaꞌj. Nin ja takꞌuꞌ quicꞌaꞌ te yi ateꞌ tzaj le amaꞌl tzꞌinunin tuꞌ. Nin yi aꞌaꞌtz choꞌn teleꞌn tzaj taꞌnuꞌ le cꞌub.
”Nchaꞌtz ja takꞌuꞌ amaꞌl scyetz tan cyetzal yi luwar yi suknakuꞌ scyetz chimam chiteꞌ. 16 Poro yi eꞌ cyetz, scyuchꞌ yi eꞌ mas chixonl yi xomcheꞌ tzaj, ja cyocsaj quib nim tu cyajtzaꞌkl. Ja choꞌc yab, na ja cyaj cyen quilol yi caꞌwluꞌ. 17 Quinin eꞌ oc tan xtxumleꞌn yi eꞌchk milawr tu yi eꞌchk takleꞌn yi banakuꞌ scyeꞌj. Ma na ja choꞌc yab na ja choꞌc tan joyleꞌn junt chibajxom tan cyajseꞌn junt tir jakꞌ chicaꞌwl yi eꞌ aj Egipto. Poro yi teruꞌ Kataj iluꞌ jun Ryos yi na cuyuꞌ kapaj. Iluꞌ jun Ryos yi na el kꞌajabuꞌ skeꞌj. At pasensuꞌ, nin at lokꞌ ib tuchꞌuꞌ, na quinin nchicyaj cyen tiloluꞌ. 18 Nin ja cuyuꞌ chipaj. Wech na eꞌ oc tan banleꞌn jun teblal neꞌẍ wacẍ yi seꞌij cuꞌn cyulej. Nintzun cyaltz: ‘Yi teblaleꞌj iꞌtz yi karyosil yi nxcyeꞌ tan kelseꞌneꞌl tzaj Egipto,’ cheꞌch. Tan yi xtxolbilaꞌtz ja el kꞌejuꞌ cyaꞌn. 19 Poro yi teruꞌ ja el kꞌajabuꞌ scyeꞌj. Na quinin ncheꞌ cyaj cyen tiloluꞌ le yi amaꞌl tzꞌinunin tuꞌ. Nin yi jun bocꞌoj sbakꞌ yi bajxij ẍchiwutz taꞌnuꞌ tan ẍchajleꞌn chibeꞌ chajkꞌej, tu yi jun bocꞌoj kꞌakꞌ yi na txekun chibeꞌ lakꞌbal, quinin el jatxoluꞌ scyeꞌj.
20 ”Ej, nin chaꞌtz ja xcon yi espíritujuꞌ tan chichusleꞌn. Nin quiꞌc jun kꞌej jak chiquim tan weꞌj na ja takꞌuꞌ yi maná scyetz. Nin qui nchiquim tan saktziꞌ, na ja takꞌuꞌ quicꞌaꞌ.
21 ”Ja takꞌuꞌ cyakil yi tajweꞌn scyetz te yi caꞌwunak yob yi nchixon le amaꞌl tzꞌinunin tuꞌ. Quiꞌc nin jun takleꞌn yi jak ban palt scyetz, na yi beꞌch cyetz quinin nloꞌon, nin quinin mben mal quikan tan xoꞌn.
22 ”Ja takꞌuꞌ wiꞌnin eꞌchk amaꞌl tu eꞌchk nación scyetz. Na ja takꞌuꞌ yi amaꞌl Hesbón scyetz yi at jakꞌ caꞌwl yi rey Sehón. Nin ja takꞌuꞌ yi amaꞌl Basán scyetz yi at jakꞌ caꞌwl yi rey Og.
23 ”Ja takꞌuꞌ chibanl na ja takꞌuꞌ wiꞌnin chinitxaꞌ. Choꞌn cunin mban tajlal chinitxaꞌ chi taneꞌn yi txꞌuml tcyaꞌj. Nin ja chuꞌl tcyꞌaluꞌ swutz yi amaꞌleꞌj yi suknakuꞌ scyetz yi eꞌ kamam kateꞌ.
24 ”Yi cyuleꞌn tzoneꞌj Canaán, ja takꞌuꞌ amaꞌl scyetz tan chixcyeweꞌn tan chibiyleꞌn yi eꞌ wunak yi ateꞌ swutz yi amaꞌleꞌj. Nin ja takꞌuꞌ amaꞌl scyetz tan chibnol yi cyajbil scyeꞌj yi eꞌ wunakaꞌtz tuml chireyil.
25 ”Nchaꞌtz ja cyetzaj yi eꞌchk tnum yi at tapij solteꞌj, tu eꞌchk balaj cojbil, tu eꞌchk balaj caꞌl, tu yi eꞌchk julil aꞌ, tu eꞌchk balaj ujul nin eꞌchk balaj wiꞌ oliw.
”Nchaꞌtz ja cyetzaj wiꞌnin eꞌchk amaꞌl kale atit loꞌbaj. Ja quil yi banl talmaꞌuꞌ, na ja baj wiꞌnin loꞌbaj cyaꞌn jalen yi ticyꞌeꞌn chipaj teꞌj.
26 ”Poro lastum eꞌ, na nin eꞌ oc tan pajleꞌn caꞌwluꞌ. Na ja el kꞌej yi leyuꞌ cyaꞌn. Nin ja chiquim yi eꞌ elsanl stziꞌuꞌ cyaꞌn yi ocnakeꞌ tan talcheꞌn yi mero bintzi scyetz, quimnakeꞌ yi eꞌ elsanl stziꞌuꞌaꞌtz cyaꞌn yi ocnakeꞌ tan chimoxeꞌn tan chixomeꞌn teꞌjuꞌ. Tan yi xtxolbilaꞌtz chumam nin quil yi eꞌ intanum yi nchijuch swutzuꞌ.
27 ”Chaꞌstzun te ja takꞌuꞌ amaꞌl scyetz chicontr tan cyoqueꞌn tan chibiyleꞌn cuꞌn. Nin te yi qꞌuixcꞌuj yi ateꞌ cuꞌnt, ja chijak ẍchꞌeybil cyetz teruꞌ. Nin yi iluꞌ teruꞌ ja elt kꞌajabuꞌ scyeꞌj, na ja tbituꞌ chitziꞌ chikul yi cyoqueꞌn tan jakleꞌn cuybil chipaj teruꞌ. Nin ja jeꞌ xtxaꞌoluꞌ jun yaj tan chicolpeneꞌl tzaj jakꞌ caꞌwl yi chicontr.
28 ”Poro te yi cyaꞌl na xuxin scyeꞌj eꞌ kamamaꞌs, ja tzun chaꞌjt junt tir tan pajleꞌn caꞌwluꞌ. Chaꞌstzun te tkꞌoluꞌ amaꞌl tan chibeneꞌn jakꞌ caꞌwl chicontr. Ej, nin te yi qꞌuixcꞌuj yi ateꞌ cuꞌnt, ja chijakt ẍchꞌeybil cyetz teruꞌ, nin yi iluꞌ teruꞌ ja elt kꞌajabuꞌ scyeꞌj, na ja tbituꞌ chitziꞌ chikul, nin tan yi banl talmaꞌuꞌ, wiꞌnin tir ja cuyuꞌ chipaj.
29 ”Taꞌ, ocnakuꞌ tan makleꞌn chiwutz bantz chixomeꞌn te yi caꞌwluꞌ. Poro yi eꞌ cyetz, quinin ncyocsaj, ma na ja cyocsaj quib nim tu cyajtzaꞌkl, nin quiꞌc muꞌẍ xac yi caꞌwluꞌ ban ẍchiwutz. Ja chipaj yi caꞌwluꞌ yi na takꞌ itzꞌajbil scyetz yi eꞌ yi na chiban taneꞌn. Quinin nchixom te yi tajbiluꞌ. Wech na wiꞌnin tir ocnakuꞌ tan chicolpeneꞌl tzaj jakꞌ caꞌwl yi chicontr.
30 ”Taꞌ, sajleꞌn cuntuninuꞌ-tz tan cuyleꞌn chipaj. Ja ẍchajuꞌ yi pasensuꞌ scyetz, na ja ocuꞌ tan makleꞌn chiwutz tan porer yi espíritujuꞌ, nin ja chixcon yi eꞌ elsanl stziꞌuꞌ tan makleꞌn chiwutz. Poro quinin moꞌc te chiwiꞌ. Chaꞌstzun te tkꞌoluꞌ amaꞌl tan chibeneꞌn pres jakꞌ chicaꞌwl yi eꞌchk mas nación beneꞌn tziꞌn wi munt.
31 ”Poro ja nin elt kꞌajabuꞌ scyeꞌj na quinin ncheꞌ cuꞌ sotzaluꞌ tircuꞌn. Nin quinin ncheꞌl te cꞌuꞌluꞌ, na yi iluꞌ teruꞌ, iluꞌ jun Ryos yi wiꞌnin na el kꞌajabuꞌ scyeꞌj wunak.
32 ”Ma jaluꞌ bin Taꞌ, yi iluꞌ teruꞌ iluꞌ kaRyosil, nin wiꞌnin ẍchamiluꞌ. At poreruꞌ. Nin tajweꞌn tan kekal ẍchiꞌuꞌ. Yi iluꞌ teruꞌ, tzꞌelpon cuꞌnuꞌ te yi yoluꞌ yi sukiꞌnt taꞌnuꞌ, na wiꞌnin banl talmaꞌuꞌ skibaj. Quiꞌk tzꞌel te cꞌuꞌluꞌ yi eꞌchk qꞌuixcꞌuj yi ja icyꞌpon cyakꞌun yi eꞌ kataj, scyuchꞌ yi eꞌ kabajxom, scyuchꞌ yi eꞌ kapaleꞌil, scyuchꞌ yi eꞌ elsanl stziꞌuꞌ, nin scyuchꞌ cyakil yi eꞌ kamam kateꞌ sajleꞌn tunintz. Quil tzꞌel te cꞌuꞌluꞌ yi qꞌuixcꞌuj yi icyꞌnakpon cyakꞌun, jetz te yi tiemp yi ncawun yi ajcaw cwent Siria skibaj, jalen jaluꞌ.
33 ”Poro Taꞌ, quiꞌc nin muꞌẍ tiluꞌ skeꞌj, na kapaj nin keraꞌtz yi muꞌl eꞌchk takleꞌnaꞌtz skawutz. Na yi iluꞌ teruꞌ, ja el cunuꞌ te yi yoluꞌ, ma yi oꞌ ketz jaltnin juchleꞌn il kaꞌn swutzuꞌ. 34 Quiꞌc nin jun skaxoꞌl yi jak ban taneꞌn yi caꞌwluꞌ. Tunink yi eꞌ kareyil, nka yi eꞌ kabajxom, nka yi eꞌ kapaleꞌil, nka yi eꞌ kamam kateꞌ, cyaꞌl jun yi nink mban taneꞌn yi caꞌwluꞌ. Wech na yi xac yi eꞌchk caꞌwlaꞌtz, iꞌtz tan makleꞌn kawutz te eꞌchk takleꞌn cachiꞌ.
35 ”Poro yi eꞌ kamam kateꞌ, quinin eꞌ oc jakꞌ caꞌwluꞌ. Wech na takꞌuꞌ chimeꞌbiꞌl, tu eꞌchk balaj cojbil scyetz, tu eꞌchk lmak tnum. Yi cyetzal yi eꞌchk amaꞌlaꞌtz, quinin eꞌ oc tan cꞌuꞌlajeꞌnuꞌ, nin quinin cyaj cyen quilol yi eꞌchk yab ajtzaꞌkl yi xomcheꞌ teꞌj.
36 ”Ma jaluꞌ Taꞌ, ajk cuntzaj wutzuꞌ tan kaxmayeꞌn, na oꞌ esclaw jaluꞌ le yi amaꞌleꞌj yi takꞌnakuꞌ scyetz yi eꞌ kamam kateꞌ tan chiwaneꞌn swutz, nin tan jaleꞌn chimeꞌbiꞌl. 37 Poro tan paj yi ja kajuch kil swutzuꞌ, cyakil kacosech yi na jeꞌ swutzak kacojbil, choꞌn na ben ẍchikꞌab yi eꞌ rey yi eꞌ awer nak yi na chicawun skibaj. Na chicawun skibaj, nin na choꞌc tan kaxileꞌn. Quiꞌc jun eꞌchk takleꞌn yi quiꞌk na aj ẍchikꞌab, nicyꞌ nin oꞌ ketz scyuchꞌ kawun. Junawes atoꞌ jakꞌ chicaꞌwl. Tan cyakil yi eꞌchk xtxolbilaꞌseꞌj na kabisun,” stzun Esdras bantz tul oración.
Yi bnixeꞌn jun uꞌj tetz quiwel chiyol yi chixomok te Ryos
38 Tan cyakil yi eꞌchk taklen yi mbajij skeꞌj, ja katxum tan koqueꞌn junt tir jakꞌ caꞌwl Ryos. Nin tetz quiwel kayol, ja cuꞌ katzꞌibal yi xtxolbilaꞌtz tul jun uꞌj, nin ja oc jun sey teꞌj. Nin nchaꞌtz ja cuꞌ wiꞌ kakꞌab tej, yi oꞌ bajxom, scyuchꞌ eꞌ xonl Leví, scyuchꞌ yi eꞌ kapaleꞌil.