Yi jeꞌn siꞌleꞌn yi ley Moisés ẍchiwutz yi eꞌ xonl Israel
8
1 Itzun bantz le jukiꞌn xaw, nin te yi nsken chibaj bixeꞌ yi eꞌ xonl Israel swutzak chiꞌamaꞌl. Nintzun eꞌ mol quib chicyakil le yi amaꞌl yi at swutz yi sawan yi na biꞌaj sawan tetz Aꞌ. Nintzun cyaltz tetz Esdras yi ajtzꞌib, nin nchaꞌtz iꞌ paleꞌ, tan sajeꞌn tcyꞌal yi liwr tetz yi ley Moisés yi takꞌnak Ryos scyetz yi eꞌ xonl Israel.2 Sajeꞌn tzun tcyꞌal Esdras yi liwraꞌtz, tul yi bajx kꞌej tetz yi jukiꞌn xaw tetz yi yob. Tuleꞌn tzuntz tan iꞌ ẍchiwutz cyakil yi eꞌ cmon yi chimoloꞌn quib le amaꞌlaꞌtz. Ateꞌ yaj, scyuchꞌ xnaꞌn, scyuchꞌ yi eꞌ nitxaꞌ yi nsken baj ul cyajtzaꞌkl.
3 Jalchan cunin xeꞌteꞌn Esdras tan siꞌleꞌn yi ley Moisés ẍchiwutz, jalen yi toponeꞌn chajcuꞌn kꞌej. Choꞌn chimolol quib le amaꞌl yi at swutz yi sawan yi na biꞌaj sawan tetz Aꞌ. Ej, nin cyakil yi eꞌ yi eꞌ mol quibtz, eꞌ oc tan tbiteꞌn nicyꞌ yi na tzan Esdras tan siꞌleꞌn. Nin quiꞌc nin jun najk jilon.
4 Choꞌn tzun ateꞌn Esdras yi ajtzꞌib tibaj jun amaꞌl yi tzꞌlum cuꞌn, yi nim muꞌẍ wutz tkan, nin yaꞌtz nin xac yi bnixeꞌn. Nin le sbal iꞌ txiclcheꞌ Matatías, Sema tu Anías. Nchaꞌtz Urías, Hilcías, nin Maasías. Ma le max iꞌ txiclcheꞌ Pedaías, Misael, nin Malquías. Nchaꞌtz Hasum, Hasbadana, Zacarías nin Mesulam.
5 Jeꞌn tzun jakol Esdras yi liwraꞌtz ẍchiwutz cyakil yi eꞌ yi ateꞌ-tz. Nin lajluch cunin beneꞌn quilol cyakil yi eꞌ wunak, na nim wutz tkan yi amaꞌl kale ateꞌnt Esdras.
6 Yi jeꞌn jakol Esdras yi liwr, tircunin tzun eꞌ jeꞌ txiclok nin eꞌ numeꞌ tan tbiteꞌn. Nintzun oc Esdras tan cꞌuꞌlajeꞌn Kataj, yi kaRyosil yi wiꞌnin kꞌej. Jeꞌn tzun chikꞌol yi eꞌ wunakaꞌtz chikꞌab tcyaꞌj, nin cyaltz: “Amén, yaꞌstzunk sbantz.” Chicweꞌn tzun joklok, nin copon cunin wutz chiplaj wuxtxꞌotxꞌ. Tircuꞌn cyoqueꞌn tan cꞌuꞌlajeꞌn Kataj.
7 Nin yi eꞌ xonl Leví yi ateꞌ-tz iꞌtz: Josué, Bani, Serebías, Jamín, Acub, Sabetai, Hodías, Maasías, nin Kelita. Nchaꞌtz Azarías, Jozabed, Hanán, nin Pelaía. Nin eꞌ octz tan xtxꞌolcheꞌn xoꞌl yi ley scyetz yi eꞌ mas wunak. Nin tircuꞌn numlcheꞌ tan tbiteꞌn.
8 Nim tzun ban chiwiꞌ tan siꞌleꞌn yi ley Kataj ẍchiwutz chicyakil cuꞌn, nin eꞌ octz tan xtxꞌixpeꞌn le cyetz chiyol,a bantz teleꞌn chitxum cyakil yi eꞌ yi ateꞌ-tz te yi mbiꞌ ekaꞌn tan yi ley. 9 Cyakil yi eꞌ wunak wiꞌnin cyokꞌeꞌn yi quibital yi xtxolbil yi at tul yi liwraꞌtz. Poro nintzun eꞌ oc Nehemías yi gobernador tu Esdras yi ajtzꞌib yi nchaꞌtz iꞌ paleꞌ, scyuchꞌ yi eꞌ yi eꞌ xonl Leví, tan makleꞌn chiwutz tan qui cyokꞌeꞌn, nin tan qui chibisuneꞌn. Ej, itzun cyaltz scyetz: “Yi jun kꞌejeꞌj iꞌtz tan takꞌleꞌn kꞌej Kataj Ryos,” cheꞌch bantz.
10 Nchaꞌtz tal Esdras scyetz: “Ma jaluꞌ baꞌn chibenuꞌ tan waꞌaꞌn. Chiwankuꞌ, nin baꞌn baj balaj win cyaꞌnuꞌ. Nchaꞌtz baꞌn cyakꞌuꞌ chiwaꞌ yi eꞌ yi quiꞌc cyetz chiwaꞌ cyꞌaꞌn cyaꞌn, na yi jaluꞌ iꞌtz jun kꞌej tan cꞌuꞌlajeꞌn Kataj Ryos. Nin quil chibisunuꞌ ma na chitzatzinkuꞌ, na kol katzatzin swutz Kataj, sjalok kachamil taꞌn.” 11 Nchaꞌtz yi eꞌ xonl Leví, eꞌ octz tan chimayseꞌn, nin tan makleꞌn chiwutz yi eꞌ mas wunak tan qui cyokꞌeꞌn na yi jun kꞌejaꞌtz iꞌtz tan takꞌleꞌn kꞌej Kataj.
12 Chibeneꞌn tzun cyakil yi eꞌ wunakaꞌtz tan waꞌaꞌn. Ej, nin baj chijatxol chiwaꞌ ẍchiwutz yi eꞌ yi quiꞌc cyetz chiwaꞌ cyꞌaꞌn cyaꞌn. Na iꞌtz jun nim kꞌej yi na chitzan tan ticyꞌseꞌn, na sken el chitxum tetz yi yol yi jeꞌ siꞌleꞌn ẍchiwutz.
13 Itzun le junt kꞌej, nintzun eꞌ mol quib yi eꞌ cyajcawil yi jujun kꞌuꞌj eꞌ yi chixonl quib, scyuchꞌ yi eꞌ paleꞌ, nin yi eꞌ xonl Leví te Esdras tan xtxumleꞌn yi mbi na eleꞌt yi xtxolbil yi at tul yi ley yi tzꞌibaꞌnt cyen. 14 Nintzun eꞌ nojpontz te yi xtxolbil yi tal Kataj Ryos tetz Moisés, yi tajweꞌn tan cyaꞌteꞌn cyakil yi eꞌ xonl Israel tzakꞌ scabteꞌ tul yi nim kꞌej yi na biꞌaj: “Nim kꞌej tetz scabteꞌ,” yi na icyꞌ tul yi jukiꞌn xaw tetz yi yob.
15 Teleꞌn tzun stziblal ẍchiwiꞌ cyakil yi eꞌ yi ateꞌ Jerusalén, scyuchꞌ yi eꞌ mas yi ateꞌ lakak eꞌchk tnum solteꞌj Jerusalén, yi tajweꞌn tan chibeneꞌn yi eꞌ wunak xoꞌlak txꞌacꞌaben tan joyleꞌn kꞌab oliw, tu eꞌchk kꞌab arrayán tu eꞌchk xak xaꞌj, nka alchok jilwutz kꞌab tzeꞌ tan banleꞌn len jun scabteꞌ chi yi tzꞌibaꞌnt cyen le ley.
16 Chibeneꞌn tzun cyakil yi eꞌ wunak tan joyleꞌn eꞌchk kꞌab tzeꞌaꞌtz. Yi cyuleꞌn, nintzun eꞌ octz jujun najal tan banleꞌn yi chiscabteꞌ. At eꞌ yi eꞌ oc tan banleꞌn yi cyetz tibaj chicaꞌl yi ẍkꞌajlaj yi wiꞌ. Nin at eꞌ eꞌ oc tan banleꞌn wutzkꞌanil yi chicaꞌl. Nchaꞌtz at scabteꞌ bnix wutzkꞌanil yi caꞌl Kataj. Nin at bnix le cꞌaybil yi at swutz yi sawan yi na biꞌaj Tetz Efraín. 17 Tircuꞌn tzun yi eꞌ xonl Israel yi ulnakeꞌ junt tir, eꞌ oc tan banleꞌn chiscabteꞌ. Nin eꞌ cyaj cyen txeꞌ. Na jetz te yi tiemp tetz Josué yi cyꞌajl taꞌ Nun, jalen te yi tiempeꞌj, quiꞌt na bajij yi xtxolbilaꞌtz. Chaꞌstzun te bixeweꞌn junt tir. Ej, nin wiꞌnin chitzatzineꞌn te yi jun xtxolbilaꞌtz.
18 Juk tzun kꞌej ban yi jun nim kꞌejaꞌtz. Nin jetz le bajx kꞌej jalen te yi wiꞌtzbil kꞌej, nim cuꞌn wiꞌ ban Esdras tan siꞌleꞌn yi liwr kale atit yi caꞌwl Kataj Ryos ẍchiwutz cyakil yi eꞌ wunak yi ateꞌ-tz. Ma le wajxakiꞌn kꞌej, nintzun oc jun chin chamoꞌn ib yi wiꞌnin ekaꞌn taꞌn chi yi bixbaꞌnt cyen tul yol Kataj.