Yi xcyeweꞌn Husai tan xiteꞌn yi tajtzaꞌkl Ahitofel
17
1 Nchaꞌtz te iteꞌn nin kꞌejaꞌtz nin tal Ahitofel yi tetz xtxumuꞌn tetz Absalom:—List wutaneꞌn tan chimolcheꞌn coblaj mil yaj, kol takꞌuꞌ amaꞌl swetz tan imbeneꞌn, ninin te akaleꞌneꞌj tan stzꞌamleꞌn Luwiy. 2 Na ja wiꞌt el cuꞌn swutz tan yi kꞌeꞌxeꞌn yi at cuꞌnt, nin quiꞌct ẍchamil tan colol tib. Na yaꞌstzun yi jun tkuj yil kaxcyeꞌ tan xoꞌwseꞌn. Ej nin cyakil yi eꞌ yi xomcheꞌ teꞌj chelepon ojk tan xoꞌw. Ntin yi rey kabiyeꞌ cuꞌn. 3 Tan yi xtxolbilaꞌs kaxcyek tan chixomeꞌn cyakil wunak teꞌjuꞌ. Na ntin na tajuꞌ yil quim yi rey. Ej nin yil xom chiwiꞌ teꞌjuꞌ sjalok tzatzin paz tul cyakil katanum cwent Israel.
4 Baꞌn mban yi xtxumuꞌn Ahitofel swutz Absalom scyuchꞌ yi eꞌ mas wiꞌ banl wiꞌ. 5 Nintzun cawun Absalom, itzun tal:
—Cun chakwok Husai, yi arquita, tan kubital yi tetz xtxumuꞌn.
6 Itzun yi tponeꞌn Husai, nintzun tal Absalom tetz:
—Je xtxumuꞌn Ahitofeleꞌj. ¿Baꞌn peꞌ kaxom teꞌj nka qui? ¿Mbi na awal atz tan yi tetz xtxumuꞌn?
7 —Max cꞌuꞌluꞌ taꞌ, poro le wutz wetz wajtzaꞌkl ja xupsij Ahitofel te xtxumuꞌn. 8 Na na el xtxumuꞌ tetz yi teruꞌ tajuꞌ scyuchꞌ yi eꞌ tetz sanlar yi xomcheꞌ teꞌj, eꞌ cuꞌn cham tan oyintziꞌ nin qui na chixob tetz jun. Pyor tcuꞌn jaluꞌ, na wiꞌnin na chiꞌch chicꞌuꞌl. Niꞌcuꞌn quitaneꞌn jalcuꞌneꞌj chi na ban jun ti oso xoꞌl wutz yi na el majij eꞌ tal. Nchaꞌtz yi tajuꞌ i jun yaj yi naꞌwnakt tan eꞌchk oyintziꞌ nin te jun akaleꞌneꞌj quil wit chixoꞌl yi eꞌ yi xomcheꞌ teꞌj. 9 Ja wiꞌt tew tibaꞌtz tul jun picy nka alchok amaꞌl yi nojquen swutz. Na kol chiloꞌon cobox scyeꞌj yi eꞌ teruꞌ sanlaruꞌ tul oyintziꞌ, alchok scyetz yil tbit yi xtxolbileꞌj stzꞌocopon tan yolcheꞌn: “Yi eꞌ yi ja xon chiwiꞌ te Absalom ja chitzꞌakon tkꞌab Luwiy tul oyintziꞌ.” 10 Nin yil quibit wunak yi xtxolbilaꞌtz, ẍchixobok, tuml yi eꞌ yi at chiwalor tan oyintziꞌ, scyuchꞌ yi eꞌ yi niꞌcuꞌn eꞌ tu eꞌ smaron león yi qui na clax jun ẍchiwutz. Na at le chiwiꞌ cyakil atanum yi tajuꞌ iꞌ jun wiꞌtz aj oyintzinl, nin yi eꞌ yi xomcheꞌ teꞌj, at chichamil tan oyintziꞌ. 11 Ma jaluꞌ bin, yi wetz intxumuꞌn iꞌtz, quiꞌ poloꞌ teruꞌ tzꞌocuꞌ tan chimolcheꞌn cyakil yi eꞌ katanum yi najlcheꞌ cweꞌn tziꞌn, le tnum Berseba jalen jeꞌn tziꞌn cwent yi tnum Dan. Na nim cuꞌn eꞌ yi ja xom chiwiꞌ teꞌjuꞌ. Ej nin tajweꞌn cuꞌn yi iluꞌ bajxij ẍchiwutz tan oyintziꞌ. 12 Kalenaꞌs tzun koꞌc tan oyintziꞌ scyeꞌj, nin quiꞌc na ban mbi jilwutz amaꞌl kale ateꞌt. Choꞌn cuꞌn kaban tan oyintziꞌ scyeꞌj chi na ban yi kꞌab cheꞌw, yi na acꞌ cyakil yi cojbil taꞌn. Cyaꞌl jun claxk tkakꞌab, tuꞌk yi rey. 13 Ej nin kol tew tib tul jun tnum, baꞌn kaben kacyakil cuꞌn tan kꞌucheꞌn cuꞌn yi tapijil yi jun tnumaꞌtz, nin quil jal siquier jun tal cꞌub tetz senil yi tapij, stzun Husai bantz tetz Absalom.
14 Yi quibital Absalom scyuchꞌ yi eꞌ wiꞌ banl wiꞌ yi xtxumuꞌn Husai, ja takꞌ jun chin tzatzin scyetz, itzun cyaltz: “Baꞌn kaxom te yi tajtzaꞌkl Husai, na mas balaj cuꞌn swutz yi tajtzaꞌkl Ahitofel.” (Ja bixeꞌ yi jun xtxolbilaꞌtz cyakꞌun, na yaꞌstzun tajbil Kataj tan xiteꞌn cuꞌn yi ajtzaꞌkl yi ntakꞌ Ahitofel scyetz. Na yi tajbil Kataj Ryos iꞌtz tan poꞌtzeꞌn Absalom tan qui cyajeꞌn cyen tetz rey.) 15 Ma tetz Husai nin ben tan yol scyuchꞌ yi eꞌ paleꞌ, Sadoc tu Abiatar, itzun taltz scyetz: “Je yol Ahitofel tetz Absalomeꞌj, scyuchꞌ yi eꞌ mas wiꞌ banl wiꞌ, yi ẍeꞌn chiban tan stzꞌamleꞌn Luwiy. Ej nin je yoleꞌj yi nwal wetz scyetz. 16 Ma jaluꞌ benk bin mantar cyanuꞌ jalucuꞌneꞌj tan talcheꞌn tetz Luwiy yi tajweꞌn tan quicyꞌeꞌn jalaj icyꞌen yi aꞌ Jordán te yi akaleꞌneꞌj, na quiꞌc meril tan chicyajeꞌn cyen tan watl kale atit yi amaꞌl kale na chicyꞌeꞌt wunak wi aꞌ Jordán, na ko yaꞌtz, qui cunin batz ẍchiquimok yi rey scyuchꞌ cyakil yi eꞌ yi xomcheꞌ-tz teꞌj.”
17 Ma yi cob chicyꞌajl yi eꞌ paleꞌ, Jonatán tu Ahimaas, choꞌn ateꞌ nakajil yi aꞌ yi na mulkꞌin, yi na biꞌaj “En-rogel”, tan ẍchꞌiweꞌn jun stziblal yi mbi na bajij Jerusalén. Choꞌ ateꞌ le jun amaꞌlaꞌtz na quiꞌc rmeril tan cyoqueꞌn Jerusalén, na sken el chitxum tetz yi ko tzꞌiꞌlwij chiwutz tnum ẍchiquimok cyakꞌun yi eꞌ yi xomij chiwiꞌ te Absalom. Tan tuꞌ yi xtxolbilaꞌtz ja xcon jun xun cyakꞌun yi eꞌ paleꞌ tan talcheꞌn stziblal scyetz. Ninin te jun tkujaꞌtz nin eꞌ ben lajkeꞌl tan talcheꞌn yi puntil tetz Luwiy. 18 Poro at jun xicy yi xkꞌukwil, eꞌ iꞌlon, nintzun bentz tan talcheꞌn tetz Absalom. Poro nin el chitxum Jonatán tu Ahimaas tetz. Eꞌ cweꞌn tzun tbeꞌ lajkeꞌl. Choꞌn tzun cyoponeꞌntz xe caꞌl jun aj Bahurim, nin cyew quibtz tul jun julil aꞌ yi at wutzkꞌanil yi jun caꞌlaꞌtz. 19 Ej nin yi txkel yi jun yajaꞌtz nin bentz tan jopleꞌn cuꞌn stziꞌ yi julaꞌtz tan yi jopselil. Nin jeꞌn ẍchitol muꞌẍ ixiꞌn triw tib yi jopsel. Cyaꞌl jun iꞌlon yi xtxolbileꞌj. 20 Itzun yi cyoponeꞌn yi eꞌ yi xomij chiwiꞌ teꞌj Absalom tan chijoyleꞌn, nin chijak tkanil yi eꞌ xicy tetz yi jun xnaꞌnaꞌtz:
—¿Naꞌ ateꞌt yi nocx Jonatán tu Ahimaas?
—Ja wiꞌt chicyꞌ. Choꞌn nchiben le cuꞌnak tan cyoponeꞌn stziꞌ aꞌ Jordán, stzun xnaꞌn bantz.
Chibeneꞌn tzun yi eꞌ sanlar tetz Absalom tan chijoyleꞌn, poro qui nin eꞌ jal cyaꞌn. Eꞌ pakxeꞌntz tzun Jerusalén. 21 Yi nsken chicyꞌ yi eꞌ sanlar tetz Absalom, nintzun eꞌ jeꞌn tzaj Jonatán tu Ahimaas tjul, nin eꞌ ben lajkeꞌl tan talcheꞌn yi mbi ilaꞌtz yi nsken txumxij cyakꞌun Absalom. Ej nin cyaltz tetz Luwiy:
—Ẍchibneꞌ list quibuꞌ jalcuꞌneꞌj, na tajweꞌn tan quicyꞌeꞌnuꞌ jalaj icyꞌen yi aꞌ Jordán, na yi xtxumuꞌn Ahitofel iꞌtz tan tuleꞌn chan tan oyintziꞌ nin tan quimseꞌnuꞌ.
22 Jalcuꞌn chibnol list quib yi rey Luwiy scyuchꞌ cyakil yi eꞌ yi xomcheꞌ teꞌj, nin te iteꞌn nin akaleꞌnaꞌs eꞌ icyꞌtz jalaj icyꞌen yi aꞌ Jordán. Yi tuleꞌn skil yi junt eklok nsken chicyꞌ tircuꞌn wi aꞌ.
23 Inti Ahitofel, yi teleꞌn xtxum tetz yi qui nin chixom te tetz tajtzaꞌkl, nintzun wekxij yi tetz buruꞌ taꞌn tan pakxeꞌn xe yi tetz caꞌl le tetz tnumil. Ej nin octz tan banleꞌn cyakil yi tajweꞌn ẍchixoꞌl yi tetz najal. Ma yi wiꞌt bnixeꞌn taꞌn, nintzun je ẍchiꞌmbal tibtz te ptzoꞌmil yi caꞌl, nin quimtz. Choꞌn mukxeꞌn iꞌ-tz kale mukxeꞌt yi kꞌajtzun taj.
Yi tponeꞌn Luwiy le tnum Mahanaim
24 Ma tetz Luwiy, oponeꞌn nin bantz le tnum Mahanaim. Ej nin te iteꞌn nin tiempaꞌtz na chitzan cuꞌn Absalom scyuchꞌ cyakil yi eꞌ yi xomcheꞌ teꞌj tan icyꞌeꞌn tzaj wi aꞌ Jordán tan cyoponeꞌn le amaꞌl cwent Galaad. 25 Ma tetz Absalom, sken oc cyen Amasa taꞌn tetz cyajcawil yi eꞌ tetz sanlar, tetz xel Joab. Yi Amasa-aꞌtz, iꞌ cyꞌajl Itra jun xonl yi eꞌ tu Ismael. Ej nin tuchꞌ iꞌ ban yi xnaꞌn Abigail, yi tal naꞌ Nahas, yi titzꞌun naꞌ Sarvia, yi xtxuꞌ Joab.
26 Choꞌn tzun cweꞌn yi campament Absalom scyuchꞌ yi eꞌ tetz tanum tul yi amaꞌl cwent Galaad, tan chibnol list quib tan oyintziꞌ scyuchꞌ yi eꞌ sanlar tetz Luwiy. 27 Itzun yi cyoponeꞌn Luwiy Mahanaim, nintzun eꞌ eltzaj tan cꞌulcheꞌn Sobi yi tal naꞌ Nahas, yi choꞌn najlcheꞌ le tnum Rabá cwent Amón. Nin nchaꞌtz el tzaj Maquir, yi cyꞌajl Amiel tan chicꞌulcheꞌn. Iꞌ jun aj Lodebar. Nchaꞌtz el tzaj Barzilai, yi aj Rogelim cwent Galaad. 28 Cyaꞌn eꞌchk takleꞌn cyaꞌn tan xconeꞌn tetz Luwiy, chitaneꞌn eꞌchk txꞌach, palancan tu eꞌchk ẍwokꞌ txꞌotxꞌ. Nchaꞌtz cyaꞌn ixiꞌn triw, cebada, arin tetz triw, cyꞌaꞌnixiꞌn, jawẍ, tu jun jilwutz txicun yi na biꞌaj lentejas. 29 Nchaꞌtz cyꞌaꞌn cyaꞌn cabil wunak txuc, tu lech nin ques tetz wacẍ tu chiw, tan waneꞌn yi rey scyuchꞌ cyakil yi eꞌ yi xomcheꞌ teꞌj. Na le wutz cyetz cyajtzaꞌkl yi na chiquim tan weꞌj tu saktziꞌ nin yi nsken chikꞌeꞌxij tan xoꞌn tul yi amaꞌl yi tzꞌinunin tuꞌ.