Yi jiloneꞌn Luwiy tu Siba
16
1 Ma yi ticyꞌeꞌn Luwiy jalaj icyꞌen muꞌẍ yi wiꞌ yi wiꞌwtz Oliw, nintzun el tzaj Siba, yi martomaꞌ Mefi-boset, tan cꞌulcheꞌn Luwiy. Cyꞌaꞌn cheꞌ cob buruꞌ taꞌn yi at cyektz. At cob cient pam cyꞌaꞌn cyaꞌn, jun cient tort yi wutz uva cuꞌn, yi skejt, nin nchaꞌtz jun cient tort wutz ibẍ cuꞌn yi nternin skejt, tu jun tzꞌuꞌm yi nojnak tan taꞌal uva. 2 Beneꞌn tzun jakol yi rey tetz Siba:—¿Mbi xac cyakil eꞌchk takleꞌneꞌj?
—Yi eꞌ buruꞌ, baꞌn chixcon tetz yi najaluꞌ, ma yi pam tu yi loꞌbaj ban baj cyakꞌun yi eꞌ sanlaruꞌ, ma yi taꞌal uva baꞌn chicꞌajeꞌn yi eꞌ yil jal saktziꞌ scyeꞌj tul yi amaꞌl tzꞌinunin tuꞌ.
3 —Baꞌn bin yaj poro ¿loꞌk tzun Mefi-boset, yi mamaj kꞌajtzun apatrón?
—Ja cyaj cyen Jerusalén, na yi tetz xtxumuꞌn, iꞌtz yi tzꞌakꞌlok yi caꞌwl tetz iꞌ, yi at tzaj tkꞌab yi tacyꞌeꞌx, cyakꞌun yi eꞌ aj Israel, yi choꞌn najlcheꞌ jeꞌn tziꞌn.
4 —Baꞌn bin ko yaꞌtz na taj, chij yi rey. Ma jaluꞌ tan paj yi tajtzaꞌklaꞌtz, awetz sbneꞌ cyakil yi tetz meꞌbiꞌl.
Tajeꞌn cuꞌn tzun wutz Siba wuxtxꞌotxꞌ tan takꞌleꞌn kꞌej yi rey, nintzun ben tlol tetz:
—Ntyoẍ teruꞌ taꞌ, ilenin lok jal balajiluꞌ sweꞌj, stzun Siba ban swutz yi rey.
5 Itzun bantz yi toponeꞌn Luwiy le aldey Bahurim, nintzun eltzaj Simei, jun scyeri yi xonl Gera, tul yi jun aldeyaꞌtz. Iꞌ jun xonl kꞌajtzun Saúl, nin octz tan jisleꞌn Luwiy te yi na chixon tbeꞌ. 6 Nin octz tan cꞌoxleꞌn cꞌub tej Luwiy nin scyeꞌj yi eꞌ ajcaw yi na chicawun scyeꞌj eꞌ sanlar.
Ma tetz Luwiy colij iꞌ cyakꞌun yi eꞌ wunak yi xomcheꞌ teꞌj nin cyakꞌun yi eꞌ tetz sanlar yi na chitzan tan quicyꞌleꞌn. 7 Poro quinin xob Simei tan jisleꞌn yi rey nin je yol iꞌeꞌj:
—¡Quiloꞌk tzoneꞌj, na aẍ jun mal nak, nin aẍ jun biyol nak! 8 Na tzan Ryos tan acawseꞌn tan cyakil eꞌchk biyolnakiꞌn yi maban te yi najal Saúl tan acyajeꞌn cyen tetz xel iꞌ tan cawuꞌn. ¡Ma jaluꞌ na tzan Ryos tan takꞌleꞌn yi caꞌwl tkꞌab Absalom yi acyꞌajl, nin aẍ teꞌn na cẍtzan tan ẍchojleꞌn cyakil yi awil, na yi aẍaꞌtz aẍ jun biyol nak!
9 Beneꞌn tzun tlol Abisai yi tal naꞌ Sarvia, tetz Luwiy:
—¿Mbi tzuntz na takꞌuꞌ amaꞌl tetz taꞌkl yajeꞌj tan jisleꞌnuꞌ? Na list wutaneꞌn tan tamleꞌn len wiꞌ-x.
10 —¡Quiꞌc itetz tuchꞌ! axwok tal wanub Sarvia. Bintzi na tzan iꞌ tan injisleꞌn, poro Kataj Ryos loꞌ yi maꞌlon tzaj tetz tan toqueꞌn tan injisleꞌn. ¿Ej nin ko yaꞌtz, naꞌj scyetz jun xcyeꞌ tan makleꞌn stziꞌ te yi na tal?
11 Beneꞌn tzun tlol Luwiy tetz Abisai scyuchꞌ cyakil yi eꞌ aj caw scyetz yi eꞌ tetz sanlar:
—Iꞌtz tajbil incyꞌajl tan imbiyleꞌn cuꞌn, peor quitaneꞌn yi eꞌ xonl Benjamín. Akꞌwokbin amaꞌl tetz tan injisleꞌn, na ja loꞌ cawun Kataj tan talcheꞌn eꞌchk yolaꞌtz swetz. 12 Na qui cunin batz stileꞌ Kataj yi sotzaj cꞌuꞌlal yi atin cuꞌnt, nin loꞌk takꞌ tzaj iꞌ yi banl swibaj tetz xel yi jisbil wetz yi na witnin jaluꞌ.
13 Ma Luwiy scyuchꞌ yi eꞌ yi xomcheꞌ teꞌj, icyꞌeꞌn nin eꞌ bantz. Ma tetz Simei, xomij ẍchixlaj, tibaj wi txalaꞌj. Na tzan iꞌ tan joꞌleꞌn cꞌub nin tan ẍchitleꞌn puklaj tan ẍchajleꞌn yi na chiꞌch cꞌuꞌl te Luwiy. 14 Ma yi cyoponeꞌn Luwiy scyuchꞌ cyakil yi eꞌ yi xomcheꞌ teꞌj tzi yi tzanlaꞌ Jordán, nsken chikꞌeꞌxij, chaꞌstzun te eꞌ ujeꞌ-tz tul yi jun amaꞌlaꞌtz.
Yi tponeꞌn Absalom Jerusalén
15 Itzun te yi na bajij yi xtxolbilaꞌseꞌj, oponeꞌn nin ban Absalom Jerusalén scyuchꞌ cyakil yi eꞌ aj Israel yi xomij chiwiꞌ teꞌj. Nchaꞌtz xomij Ahitofel teꞌj. 16 Ma tetz Husai yi arquita, yi tamiw Luwiy, nintzun ben tan cꞌulcheꞌn Absalom. Nin chin wiꞌ nin bantz tan yol:
—¡Iluꞌ inrey! ¡Iluꞌ inrey! Nink benk ẍkon yi tiempuꞌ tetz ben kꞌej ben sak.
17 Stzaꞌwel tzun Absalom.
—¿Yaꞌtz peꞌ tyoẍinaꞌtz yi na achaj tetz yi balaj awamiw Luwiy? ¿Mbitzuntz qui nin acxomnintz teꞌj?
18 —Quiꞌc rmeril, stzun Husai, na yi in wetz tajweꞌn cuꞌn naꞌtij xlaj yi rey, yi ja wiꞌt je xtxaꞌol Ryos, scyuchꞌ cyakil eꞌ intanum. 19 Nchaꞌtz tajweꞌn tan inxconeꞌn teruꞌ, na iluꞌ cyꞌajl wamiw. List atineꞌt bin tan inxconeꞌn teruꞌ, iluꞌ inreyil. List atineꞌt tan inxconeꞌn teruꞌ chi mimban cyen yi na cawun tzaj yi tajuꞌ.
20 Itzun le junt tkuj nin oc Absalom tan jakleꞌn jun tajtzaꞌkl tetz Ahitofel:
—Takꞌuꞌ jun wajtzaꞌkl. ¿Mbi tajweꞌn tan imbnol jalucuꞌneꞌj?
21 Beneꞌn tzun tlol Ahitofel tetz Absalom:
—Tan teleꞌn chitxum yi eꞌ katanum tetz yi iluꞌ na cawun jaluꞌ, ban yi nink chixcon yi eꞌ caꞌp txkel tajuꞌ yi ateꞌ cyen le palacio tan quicyꞌleꞌn. Nin tan yi xtxolbilaꞌs slajluchaxk yi ja el xtxꞌix tajuꞌ, nin ẍchiꞌchok cꞌuꞌl teꞌjuꞌ. Bixek cyajtzaꞌkl cyakil wunak tan chixomeꞌn teꞌjuꞌ.
22 Nintzun bnix jun mantial wi caꞌl, ej nin choꞌn tzun chiwitbej quib Absalom scyuchꞌ yi eꞌ xnaꞌnaꞌtz, yi caꞌp txkel yi taj, taneꞌn. Nin ja lajluchax yi xtxolbilaꞌtz ẍchiwutz cyakil yi eꞌ xonl Israel yi ateꞌ tnum. 23 Ja xom Absalom te yi tajtzaꞌkl Ahitofel, na te yi tiempaꞌtz, wiꞌnin kꞌej yi tajtzaꞌkl Ahitofel ẍchiwutz Luwiy tu Absalom, na le wutz cyetz cyajtzaꞌkl niꞌcuꞌn yol iꞌ chi ik yol Ryos.