Yi toqueꞌn Absalom tan contriꞌn te yi taj
15
1 Itzun yi teleꞌn tiemp, nin jal puntil tan Absalom tan cambeꞌn jun careꞌt tetz oyintziꞌ tu cobox chej. Nchaꞌtz ja jal nicyꞌ cient yaj yi ja chixcon tan qꞌuicyꞌleꞌn iꞌ. 2 Ej nin cyakil nin kꞌej or cuꞌn na el watl. Ej nin choꞌn na ben stziꞌ puertil yi tnum tan chichꞌiweꞌn yi eꞌ wunak yi choꞌn nchisaj joylaj tan jakleꞌn tetz yi rey tan pujleꞌn eꞌch xtisyaꞌ. Nintzun na jak nintz scyetz yi eꞌ wunak yi naꞌ nchisajeꞌt. 3 Nin ko eꞌ aj Israel, ja oc Absalom tan chimayseꞌn nin tan tocseꞌn chicꞌuꞌl tan cobox yoleꞌj:—Bintzij nin yi eꞌchk takleꞌn yi na ojkeluꞌ teꞌj. At rmeril, nin at derechuꞌ tan joyleꞌn ẍchꞌeybil teruꞌ tu yi rey, por lastum cyaꞌl jun yi bixbaꞌnt tan yi rey tan tbiteꞌn yi mbiꞌtz yi na cyajuꞌ chibanuꞌ taneꞌn.
4 Nchaꞌtz na tal iꞌ scyetz:
—Lastum yi nkꞌeꞌtz in jun aj pujul xtisyaꞌ tzoneꞌj tkatanum. Na ink, ban tzun kloꞌ chuꞌl tzinwutz cyakil yi eꞌ yi na chitzan tan joyleꞌn puntil tan banleꞌn xtisyaꞌ te jun il yi na bajij scyeꞌj. List tzun in tan banleꞌn taneꞌn xtisyaꞌ scyeꞌj.
5 Nchaꞌtz alchok scyetz yi na opon tan yol tu Absalom, yi iꞌ tetz, jalucunin ja el tan chicꞌulcheꞌn, nin ja oc tan chikꞌajleꞌn nin tan stzꞌubleꞌn xak chitziꞌ. 6 Yaꞌstzun ban iꞌ scyeꞌj cyakil yi eꞌ xonl Israel yi na chuꞌl Jerusalén tan jakleꞌn xtisyaꞌ tetz yi rey. Ej nin tan yi xtxolbilaꞌs ja xcyeꞌ tan jaleꞌn yi tetz balajil ẍchiwutz wunak.
7 Yi teleꞌn cyaj yob tan Absalom tan banleꞌn yi xtxolbilaꞌs nintzun ben swutz yi rey tan yol. Ej itzun taltz:
—Max cꞌuꞌluꞌ taꞌ, ja nuꞌl swutzuꞌ tan jakleꞌn amaꞌl teruꞌ tan imbeneꞌn Hebrón tan banleꞌn taneꞌn jun inyol yi ja insuk tetz Kataj Ryos. 8 Na te yi atin tzaj Gesur ja insuk jun yol tetz Ryos yi nink takꞌ iꞌ amaꞌl swetz tan impakxeꞌn tzaj Jerusalén, nchimben tan cꞌuꞌlajeꞌn iꞌ jalen Hebrón, stzun iꞌ tetz yi rey.
9 —Baꞌn bin cẍben. Cun ban amunl, ko yaꞌtz na awaj, stzun yi rey bantz tetz.
Beneꞌn tzun Absalom le tnum Hebrón. 10 Nchaꞌtz te iteꞌn nin tiempaꞌtz nin ben mantar taꞌn scyeꞌj cyakil yi eꞌ xonl Israel tan talcheꞌn scyetz, yil quibit nin yi wiꞌ eꞌchk chun, iꞌtz jun techl yi ja wiꞌt bixeꞌ Absalom tetz rey le tnum Hebrón. 11 Nchaꞌtz ẍchok iꞌ cob cient wunak aj Jerusalén tan chixomeꞌn nin teꞌj jalen Hebrón. Nintzun eꞌ xomnintz yi eꞌ wunakaꞌtz teꞌj, poro qui nin pujx cyakꞌun yi mbiꞌtz yi xtxumuꞌn Absalom. 12 Nchaꞌtz ja ben mantar tan ẍchakleꞌn tzaj Ahitofel, jun scyeri eꞌ yaj yi akꞌol tajtzaꞌkl yi rey Luwiy yi choꞌn najlij le tnum Guilo, tan tponeꞌn Hebrón nin tan taꞌteꞌntz teꞌj iꞌ yi na tzan pateꞌn yi tetz xtxꞌixwatz.
Yi teleꞌn ojk Luwiy le tnum Jerusalén
13 Itzun bantz, nin opon jun tan talcheꞌn tetz Luwiy:
—Yi eꞌ katanum, na chitzan tan talcheꞌn tetz Absalom yi list eꞌ tan chixomeꞌn te Absalom yi nink tzꞌoc tetz chireyil, stzun iꞌ tetz Luwiy.
14 Beneꞌn tzun tlol Luwiy scyetz yi eꞌ yaj yi ateꞌ xlaj iꞌ tan cawuꞌn:
—Tajweꞌn tan keleꞌn ojk jalcuꞌn yi ntaxk ul Absalom scyuchꞌ yi eꞌ yi ja xom chiwiꞌ teꞌj, na chocopon tan kabiyleꞌn cuꞌn scyuchꞌ cyakil yi eꞌ yi najlcheꞌ tzoneꞌj Jerusalén. ¡Or itkan baꞌn keꞌl ojk jalcuꞌn! chij yi rey.
15 —Cu bin Taꞌ, list atoꞌt tan banleꞌn taneꞌn yi teruꞌ caꞌwluꞌ, cheꞌch tetz yi rey.
16 Yaꞌtz nintzun cyulejtz. Eꞌ el tzaj yi rey scyuchꞌ cyakil yi eꞌ yi najlcheꞌ tuchꞌ le tetz balaj caꞌl. Ntin chicyajeꞌn cyen lajuj scyeri yi eꞌ caꞌp txkel iꞌ taneꞌn.a 17 Ma yi nsken cheꞌl tzaj Luwiy scyuchꞌ cyakil yi eꞌ najal juꞌ caꞌleꞌltzaj nin eꞌ taneꞌ jun rat-tz. 18 Ma yi eꞌ caꞌp ajcaw, choꞌn txiclcheꞌ xlaj Luwiy tan chixmayeꞌn yi eꞌ sanlar yi wiꞌnin quicyꞌeꞌn ẍchiwutz. Ẍchixoꞌl yi jun cꞌoloj sanlaraꞌtz, ateꞌ yi eꞌ aj Creta yi eꞌ qꞌuicyꞌlom Luwiy, scyuchꞌ yi kak cient sanlar aj Gat yi xomij chiwiꞌ te Luwiy. 19 Te yi jun tkujaꞌtz nintzun jak Luwiy tetz Itai, yi aj Gat, yi ajcaw squib yi eꞌ sanlar yi choꞌn chisajeꞌn le tnum Gat:
—¿Mbi tzuntz na awaj xomnin skeꞌj? na yi aẍaꞌtz, aẍ jun awer nak skaxoꞌl. Baꞌn tcuꞌn pakxeꞌn, nin baꞌn cxcyaj quen icyakil cuꞌn jak caꞌwl yi acꞌaj rey, na yi mero bintzij, axwok awer nak skaxoꞌl, na elnak quixt lajuꞌn le itanum. 20 Ej nin quiꞌc mas tiemp yi atixwok skaxoꞌl, ¿Ẍeꞌn tzun tzinjaknin tzitetz tan ixomeꞌn skeꞌj? Na nchaꞌtz in, qui na el intxum tetz yi naꞌ naꞌj nint. Baꞌn tcuꞌn pakxeꞌn scyuchꞌ yi eꞌ sanlar yi ateꞌ jak acaꞌwl. Lok takꞌ tzaj Ryos yi banl tzawibaj, nin lok xom tzaweꞌj, chij Luwiy bantz tetz.
21 —Sak swutz Ryos, nin sak swutzuꞌ taꞌ, yi iluꞌ inreyil, yi quiꞌc na ban yi naꞌ tzꞌajnintuꞌ, nin quiꞌc na ban ko wutz cyen yi itzꞌajbil nka yi quimichil teꞌjuꞌ, list wutaneꞌn tan inxconeꞌn teruꞌ taꞌ, na in ẍchakumuꞌ, stzun Itai tetz Luwiy.
22 —Baꞌn bin cxom nin skeꞌj, stzun Luwiy bantz.
23 Yi eꞌ aj Jerusalén, wiꞌnin cyokꞌeꞌn yi cyeleꞌn cuꞌn. Choꞌn tzun ticyꞌeꞌn cuꞌn yi rey tul yi jocoꞌj yi na biꞌaj Cedrón. Choꞌn tzun quicyꞌeꞌntz tul yi beꞌ yi choꞌn na opon le amaꞌl yi tzꞌinunin tuꞌ. 24 Nchaꞌtz Sadoc scyuchꞌ coboxt levita, yi palol tetz yi caẍaꞌ kale atit yi caꞌwl Ryos. Cweꞌn tzuntz cyaꞌn wuxtxꞌotxꞌ jalen yi quicyꞌeꞌn cyakil yi eꞌ wunak. Nchaꞌtz yi paleꞌ yi na biꞌaj Abiatar at iꞌ xlaj yi caẍaꞌaꞌtz yi quicyꞌeꞌn cuꞌn cyakil yi eꞌ wunak. 25 Beneꞌn tzun tlol Luwiy scyetz:
—Ma jaluꞌ Sadoc cyꞌaj nin yi caẍaꞌ junt tir Jerusalén. Na ko at banl talmaꞌ Ryos swibaj stkꞌeꞌ iꞌ amaꞌl swetz tan impakxeꞌn junt tir tan tilweꞌn yi tetz caẍaꞌ tul yi tetz caꞌl. 26 Na yi kol tal iꞌ swetz: “Qui na chintzatzin tzaweꞌj,” baꞌn bin sban iꞌ yi tetz tajbil sweꞌj.
27 Nchaꞌtz tal Luwiy tetz Sadoc:
—Bit tzaj yaj, yi aẍatz tu Abiatar, baꞌn cxpakxwok tnum, nin baꞌn tzitcyꞌaj nin yi icyꞌajl tziteꞌj, yi Ahimaas yi ara cyꞌajl tu Jonatán yi cyꞌajl Abiatar. 28 Ma yi in wetz choꞌn chincyaj cyen tul eꞌchk amaꞌl tzꞌinunin tuꞌ, jalen yil tzꞌopon jun tziblal itaꞌn, stzun Luwiy bantz scyetz.
29 Pakxeꞌn tzun yi caẍaꞌ tan Sadoc tu Abiatar Jerusalén. Nin choꞌn eꞌ cyajeꞌn cyentz. 30 Ma tetz Luwiy choꞌn tzun jeꞌn wiꞌwtz Wi Oliw. Elnak yi xajab, nin jopij wiꞌ tan jun xbuꞌk tan ẍchajleꞌn yi na bisun, nin wiꞌnin tokꞌeꞌn yi jeꞌn pon wiꞌwtz. Nchaꞌtz cyakil yi eꞌ yi xomcheꞌ teꞌj ateꞌn jun xbuꞌk te chiwiꞌ tan ẍchajleꞌn yi na chibisun, nin nchaꞌtz eꞌ wiꞌnin cyokꞌeꞌn yi na chixon tan quiponeꞌn wiꞌwtz. 31 Ej nin at eꞌ yi ben cyalol tetz Luwiy yi choꞌn xomij wiꞌ Ahitofel te Absalom. Itzun tal Luwiy: “Lok tzꞌoc Ryos tan xtxꞌixpeꞌn yi xtxumuꞌn Ahitofel tan tkꞌol iꞌ yi eꞌchk ajtzaꞌkl yi quiꞌc muꞌẍ tal xac.”
32 Itzun yi tponeꞌn Luwiy wiꞌwtz kale na oqueꞌt cꞌuꞌlajeꞌn Ryos, nintzun eltzaj Husai, jun scyeri yi eꞌ arquita tan cꞌulcheꞌn. Ritꞌij cuꞌn yi beꞌch tetz taꞌn, tan ẍchajleꞌn yi bis oꞌkl yi at cuꞌnt. Nchaꞌtz chitij txꞌotxꞌ taꞌn xoꞌl wiꞌ. 33 Itzun tal Luwiy tetz:
—Max acꞌuꞌl yaj, kol cxomnin sweꞌj ntin jun latzꞌ sbneꞌ skeꞌj. 34 Poro kol cẍpakxij jalen Jerusalén, baꞌn tzawal tetz Absalom: “Iluꞌ wajcaw, list wutaneꞌn tan woqueꞌn tetz jun ẍchakumuꞌ chi mimban cyen tu teruꞌ tajuꞌ te yi na cawun tzaj.” Ko yaꞌtz tzaban chin wutzileꞌn ichꞌeyeꞌn tzabneꞌ swetz tan xiteꞌn yi xtxumuꞌn Ahitofel, yi na tzan tan contriꞌn sweꞌj. 35 Nchaꞌtz yi eꞌ paleꞌ Sadoc tu Abiatar list quitaneꞌn tan wuchꞌeyeꞌn. Nin baꞌn tzawal scyetz cyakil yi xtxolbil yi tzabit tzaj le palacio. 36 Na nchaꞌtz Ahimaas tu Jonatán choꞌn ateꞌ-tz. Baꞌn tzun chixcon awaꞌn tan talcheꞌn swetz cyakil yi mbi iꞌ ilaꞌtz tzajwit te yi mbi cuꞌn na bajij le palacio, stzun Luwiy bantz tetz.
37 Beneꞌn tzun Husai Jerusalén. Na opon cuꞌntz yi cyocomponeꞌn Absalom tzi puertil yi tnum.