Yi poꞌteꞌn Tamar tan Amnón
13
1 At jun cyꞌajl Luwiy yi Absalom biꞌ, yi itzꞌnak te Maaca yi toxeꞌn txkel Luwiy. Nin yi jun Absalomaꞌtz at jun tanub iꞌ yi chin yubeꞌn nin. Yi biꞌ yi jun xunaꞌtz iꞌtz Tamar.a Yi bajxnak scyeꞌj yi eꞌ cyꞌajl Luwiy, Amnón biꞌ. Iꞌ tal Ahinoam, nintzun pekꞌ quentz te yi jun xunaꞌtz. 2 Tan tu yi wiꞌnin na pekꞌ quen iꞌ te Tamar, nin yabtij tan yi bis yi at cuꞌnt, na quiꞌc rmeril tan bnol ruin teꞌj, na ntaxk poꞌtij Tamar tan jun yaj, chaꞌstzun te qui nin jal puntil tan Amnón tan tocoponeꞌn teꞌj.b 3 Poro at tzun jun tamiw Amnón, yi chin subul nak nin, yi na biꞌaj Jonadab. Iꞌ cyꞌajl Simea, yi stzicy Luwiy. 4 Nin tzun opon jun kꞌej yi jakol Jonadab tetz Amnón:—¿Mbitzun na cẍicyꞌan yaj? Aẍ cyꞌajl kareyil. Na cyakil nin kꞌej na wil nin yi tu na sotz tuꞌ acꞌuꞌl. ¿Qui peꞌ tzatxol swetz yi mbi na sotz acꞌuꞌl teꞌj?
—Yi puntil iꞌtz yi quiꞌt tzintxꞌaj yi pekꞌeꞌn yi at waꞌn te Tamar, yi tanub yi witzꞌun Absalom.
5 —¡Qui tunin kꞌusij yi aproblem yaj! Baꞌn cẍben wi asoc, nin ban cuꞌn awib, chi ik aẍ jun yabiꞌẍ. Itzun yi tzꞌopon ataj tan axajseꞌn jakaj tetz yi sbneꞌ iꞌ pawor tan ẍchakleꞌn tzaj Tamar tan toqueꞌn tan banleꞌn awaꞌ ntaꞌsteꞌn nintz nin tan acꞌaꞌcheꞌn, stzun Jonadab bantz.
6 Yaꞌtz nin tzun tulej Amnónaꞌtz. Ja tocsaj tib yabiꞌẍ. Ej nin yi toponeꞌn yi rey tan tilweꞌn tlol tzun Amnón yi yoleꞌj:
—Bneꞌuꞌ pawor taꞌ tan ẍchakleꞌn tzaj yi witzꞌun xun Tamar tan banol iꞌ cobox impam tzoneꞌj xe incuart, nin chumbalaj yi nink tzꞌoc iꞌ tan incꞌaꞌcheꞌn, chij Amnón tetz taj.
7 Beneꞌn tzun mantar tan Luwiy tan ẍchakleꞌn tzaj Tamar, nin tal tetz:
—Banaj pawor, quiloꞌk xe caꞌl awutzicy Amnón tan banleꞌn waꞌ.
8 Nintzun ben Tamar xe caꞌl Amnón, kale atit iꞌ wi soc chi ik jun yabiꞌẍ taneꞌn. Nin ben tcyꞌal muꞌẍ ixiꞌn triw yi cheꞌjaꞌnt. Ma yi tponeꞌn nin oc tan coꞌseꞌn yi ixiꞌn triw. Nin bnix cobox pam taꞌn nin oc tan skꞌajseꞌn. 9 Cweꞌn tzun nucꞌul tul jun platuꞌ, nin ben tcyꞌal swutz Amnón tan waꞌneꞌn. Poro quinin cujij iꞌ wan. Nintzun cawun tan cyeleꞌn cyakil yi eꞌ yi ateꞌ xe caꞌl. 10 Ma yi cyeleꞌn tzaj cyakil cuꞌn, nintzun taltz tetz Tamar:
—Cyꞌaj tzaj yi pam yi ja bnix awaꞌn xe incuart, nin ban yi nink cẍoꞌc tan incꞌaꞌcheꞌn.
Beneꞌn tzun tcyꞌal Tamar yi pamaꞌtz yi mbnix taꞌn xe yi cuart tetz Amnón. 11 Ej itzun yi tponeꞌn ẍkansal tib Tamar tan cꞌaꞌcheꞌn kloꞌ, nintzun cuꞌ stzꞌamol Amnón, nin tal tetz:
—Aẍ jun cꞌoloj wanub, coylin cuꞌn sweꞌj.
12 —Quil sbanuꞌ yi jun ajtzaꞌklaꞌtz sweꞌj. Quil tzꞌel intxꞌix tanuꞌ, na qui otoj na bajij yi jun yab ajtzaꞌklaꞌtz skaxoꞌl yi oꞌ xonl Israel. Na chin txꞌixwil nin. 13 Xtxumeꞌuꞌ yi mbi sbajok sweꞌj. Tzꞌelepon intxꞌix tanuꞌ, nin sjalok yolbil wetz sbneꞌ opon tunintz. Ej nin xtxumeꞌuꞌ mbil cyal wunak teꞌjuꞌ. Tzꞌocopon yolcheꞌnuꞌ, nin scyaleꞌ yi iluꞌ jun yi quiꞌc tajtzaꞌkl. Baꞌn tcuꞌn jilonkuꞌ tetz yi rey, nin taleꞌuꞌ yi mbiꞌ iꞌ ilaꞌtz tajbiluꞌ nin stkꞌeꞌ iꞌ amaꞌl sketz tan kumeweꞌn.
14 Poro qui nin oc te wiꞌ Amnón yi tajtzaꞌkl Tamar. Ej nin tan paj yi mas cham iꞌ swutz yi tanub, ja xcyeꞌ tan banleꞌn yi tetz tajbil teꞌj. 15 Ma yi wiꞌt bnixeꞌn yi tajbil Amnón teꞌj, sajeꞌn tzun jun chin chiꞌch cꞌuꞌlal teꞌj yi tanub. Mas tcuꞌn chiꞌch cꞌuꞌlal jaleꞌn teꞌj Amnón swutz yi pekꞌeꞌn teꞌj yi ntaxk ban ruinl tetz.
—Ma jaluꞌ caleꞌn tzinwutz, chij.
16 —Iluꞌ jun cꞌoloj wutzicy, quil sbanuꞌ yi junaꞌtz, na kol tzꞌocuꞌ tan inlajeꞌn len jaluꞌ, mas tcuꞌn sbneꞌ yi tiluꞌ tzinwutz swutz yi jun ajtzaꞌklaꞌtz yi ja bnix tanuꞌ sweꞌj.
Poro qui nin oc te wiꞌ Amnón yi tajtzaꞌkl Tamar, 17 ma na oc tan ẍchakleꞌn tzaj yi tetz mos, nin cawunin tetz:
—¡Lajlen yi jun xnaꞌneꞌj tzoneꞌj, nin joplen yi puert swutz iꞌ tan qui toqueꞌn tzaj junt tir!
18 Toqueꞌn tzun yi mos Amnón tan lajeꞌn len Tamar, nin oc tan lamcheꞌn cuꞌn yi puert. Ma yi tetz Tamar at quen jun jilwutz beꞌchok teꞌj, yi chin yubeꞌn nin, yi ntin na xcon cyakꞌun yi eꞌ meꞌl rey yi ntaxk cyech wutz jun yaj. 19 Jeꞌn tzun tkꞌol iꞌ tzaꞌj te wiꞌ, nin octz tan ritꞌeꞌn cuꞌn yi beꞌch tetz. Ej nin ewaꞌn wutz taꞌn, nin wiꞌnin tokꞌeꞌn te yi na xon tbeꞌ. 20 Ma yi cweꞌn chicꞌulul quib tbeꞌ tu Absalom, nintzun ben jakol iꞌ tetz Tamar:
—Amnón loꞌ nxcyeꞌ tan apoꞌtzeꞌn. Baꞌn tcuꞌn quil tzawal jun yol te yi mbajij tzaweꞌj, na itzicy itib tuchꞌ. Baꞌn tcuꞌn yi quil tzatxum, na ntin bis stkꞌeꞌ tzatz.
Ma yi nachoneꞌn Tamar teꞌj yi cyaꞌl jun na el kꞌajab teꞌj, choꞌn tzun najeweꞌntz xe caꞌl Absalom, yi stzicy. 21 Itzun yi tbital Luwiy cyakil cuꞌn yi mbi mbajij te Tamar, nintzun saj colp wiꞌ te Amnón, poro quiꞌc nin jun yol tal tetz tan makleꞌn wutz, na iꞌ yi bajxnak ẍchixoꞌl yi eꞌ cyꞌajl iꞌ, nin wiꞌnin okꞌleꞌn wutz taꞌn. 22 Nchaꞌtz Absalom, quiꞌc nin jun yol tal tetz Amnón tan makleꞌn wutz, poro tcꞌuꞌl cuntuꞌ, wiꞌnin ẍchiꞌcheꞌn cꞌuꞌl teꞌj, tan yi teleꞌn xtxꞌix yi tanub taꞌn.
Yi ticyꞌsal cꞌuꞌl Absalom te Amnón
23 Itzun yi teleꞌn cob yob yi bajeꞌn yi xtxolbilaꞌseꞌj, choꞌn ateꞌ yi eꞌ mos tetz Absalom tan telseꞌn yi xiꞌil yi tetz cneꞌr, tul yi amaꞌl yi na biꞌaj Baal-hazor, nakajil yi chitnumil yi eꞌ aj Efraín. Beneꞌn tzun mantar Absalom scyeꞌj yi eꞌ mas cyꞌajl yi rey Luwiy tan cyoponeꞌn tan jun waꞌaꞌn tuchꞌ. 24 Nchaꞌtz xaꞌk iꞌ tan yol tu yi rey, itzun taltz:
—Na chitzan yi eꞌ inmos tan telseꞌn chixiꞌil yi eꞌ cneꞌr. Chaꞌstzun te ja intxum jun balaj waꞌaꞌn nin yi wajbil iꞌtz, yi nink tzꞌoponuꞌ, iluꞌ inrey, scyuchꞌ yi eꞌ wiꞌtz bajxom yi na chicawun xlajuꞌ tan waꞌaꞌn swuchꞌ, nin wiꞌnin chintzatzink yi nink choponuꞌ, na tzun ẍchaj yi na tzanuꞌ tan takꞌleꞌn inkꞌej.
25 —Baꞌn atxumuꞌn poro quiꞌc loꞌ rmeril tan koponeꞌn cyakil oꞌ na iꞌtz jun chumam gast tetz tzatz.
Wiꞌnin cuꞌswutzil ban Absalom tetz yi rey, poro qui nin cujij yi rey. Ntin takꞌ yi banl tetz.
26 —Ko quinin amaꞌl wutz teruꞌ taꞌ, ¿qui poloꞌ ltakꞌuꞌ amaꞌl tetz yi wutzicy Amnón tan tponeꞌn skeꞌj te yi jun tzatzinaꞌtz?
—¿Mbi tzun na awaj tetz Amnón? stzun yi rey bantz.
27 Poro chin chꞌinchꞌuj nin ban Absalom tan cuꞌswutzil tetz yi rey tan tponeꞌn Amnón, scyuchꞌ yi eꞌ mas titzꞌun te yi jun tzatzinaꞌtz. Wiꞌtzbil tlen tzun tkꞌol amaꞌl scyetz yi eꞌ tetz cyꞌajl tan chibeneꞌn.
Sken tzun bnix jun balaj waꞌaꞌn tan Absalom, 28 nin nsken cawun iꞌ scyetz yi eꞌ tez chakum: “Yi tzitilnin yi nsken oc aꞌ twiꞌ Amnón baꞌn tzun tzitaltzaj swetz. Ej nin yil walnin tzitetz tan cweꞌn biyij, quil tzicabeꞌ icꞌuꞌl tan quimseꞌn cuꞌn. Quil cxobwok tan banleꞌn yi mbi na wal nin tzitetz, na in na chincawun nin teꞌj. Quiws bin wok itib, nin lok jal ichamil tan banlen taneꞌn incaꞌwl,” chij Absalom bantz.
29 Nin tzun eꞌ oc yi eꞌ ẍchakum Absalom tan banleꞌn yi tetz tajbil, yi nsken tal scyetz. Nin tzun cuꞌ chibiyol Amnón. Yi quilol yi eꞌ mas cyꞌajl yi rey yi mbi mbajij, nintzun eꞌ baj jeꞌ-tz tibaj chimulaꞌ, nin eꞌ el ojktz.
30 Itzun te yi na chixoneꞌt yi eꞌ cyꞌajolaꞌtz tbeꞌ nintzun opon jun yoltz twiꞌ Luwiy yi nsken xcyeꞌ Absalom tan chibiyleꞌn cuꞌn cyakil yi eꞌ tetz cyꞌajl. Cyaꞌl jun nclax cyen, chij yi jun yolaꞌtz. 31 Jeꞌn tzun txiclok yi rey nin octz tan ritꞌeꞌn cuꞌn yi tetz beꞌch tetz tan ẍchajleꞌn yi wiꞌnin na bisun, nin ben jokloktz wuxtxꞌotxꞌ. Nchaꞌtz eꞌ ban cyakil yi eꞌ wiꞌtz bajxom yi ateꞌ cuꞌntz te iꞌ, eꞌ octz tan ritꞌeꞌn cuꞌn beꞌch cyetz. 32 Ma Jonadab, yi cyꞌajl Simea, yi stzicy Luwiy, nintzun jilontz. Je yol iꞌeꞌj:
—Iluꞌ jun cꞌoloj rey, max cꞌuꞌluꞌ taꞌ, quil xtxumuꞌ yi jak chiquim cyakil eꞌ cyꞌajluꞌ. Ma na ntin Amnón yi ncuꞌ biyij, na yaꞌtz nin xtxumbeꞌn tetz tan Absalom jetz yi teleꞌn xtxꞌix yi tanub Tamar tan Amnón. 33 Chaꞌstzun te quil xtxumuꞌ yi jak chiquim cyakil yi eꞌ cyꞌajluꞌ ma na ntin Amnón. 34 Ma yi Absalom, ja wiꞌt el ojk, stzun Jonadab.
Itzun yi bajijeꞌn yi xtxolbilaꞌseꞌj, beneꞌn tilol yi sanlar yi na tzan tan qꞌuicyꞌlomiꞌn tib yi caꞌl rey yi txant tan chicweꞌn muleꞌn jun cꞌoloj wunak. Choꞌn chicweꞌn tzaj wi juꞌwutz te yi beꞌ yi na saj le tnum Horonaim.c Beneꞌn tzun yi jun qꞌuicyꞌlomaꞌtz tan talcheꞌn tetz yi rey yi ja til jun cꞌoloj wunak yi na chixon tul yi beꞌ yi choꞌn na saj wiꞌwtz.
35 Beneꞌn tzun tlol Jonadab tetz yi rey Luwiy:
—Iluꞌ jun cꞌoloj inreyil, le wutz wetz wajtzaꞌkl, yaꞌstzun yi eꞌ cyꞌajluꞌ yi tzan cyuleꞌn.
36 Te yi na tzaj cuꞌn wiꞌ chiyol, oponeꞌn nin eꞌ ban yi eꞌ cyꞌajl Luwiy. Wiꞌnin cyokꞌeꞌn yi cyoponeꞌn. Nchaꞌtz Luwiy scyuchꞌ yi eꞌ ajcaw yi ateꞌ xlaj iꞌ tan cawuꞌn, nintzun eꞌ okꞌ cuꞌntz te Amnón.
37-38 Ma tetz Absalom sken el ojk. Choꞌn tzun tponeꞌn kale najleꞌt yi rey cwent Gesur,d yi na biꞌaj Talmai, yi cyꞌajl Amihud. Choꞌn tzun taꞌteꞌn iꞌ ox yob le jun amaꞌlaꞌtz.
Ma tetz Luwiy cyakil nin kꞌej na okꞌ tan paj yi sotzeꞌn Amnón.
39 Itzun yi maysal tib Luwiy te yi il yi mbajij te Amnón nintzun el talmaꞌ tan tilweꞌn wutz kloꞌ yi cyꞌajl Absalom.