Yi toqueꞌn Natán tan makleꞌn wutz Luwiy
12
1 Itzun bantz, nin ben ẍchakol Kataj Ryos Natán, yi elsanl stziꞌ iꞌ tan xajseꞌn Luwiy. Yi tponeꞌn Natán swutz Luwiy nintzun tal jun eltzaj wutzil tetz:—Yi xtxolbileꞌj iꞌtz tetz cob yaj yi najlcheꞌ tul jun tnum. At jun yi ric nin jun yi meꞌbaꞌ. 2 At wiꞌnin awun tuchꞌ yi ric. At cneꞌr nin at wacẍ. 3 Ma tetz tal meꞌbaꞌ juneꞌn ẍutuj neꞌẍ cneꞌr at, yi ja xcyeꞌ tan lokꞌcheꞌn. Iꞌ chꞌuysan. Ma yi tal cneꞌraꞌtz choꞌn najlij xe tal pach scyuchꞌ yi eꞌ nitxajil yaj. Na wan te yi mbi na baj cyaꞌn, nin na ucꞌaꞌ te cyetz chicꞌaꞌ. Nin ja wit wutz cꞌuꞌl yi yaj. ¡Yi jun yajaꞌtz wiꞌnin nlokꞌ wutz yi jun tal ẍutuj cneꞌraꞌtz, chi ik jun meꞌal! 4 Itzun bantz tponeꞌn jun txocum yi yaj yi chin ric nin tan xajseꞌn iꞌ. Poro yi jun ricaꞌtz qui nin nimsaj cꞌuꞌl tan biyleꞌn cuꞌn jun scyeri yi eꞌ tetz tawun tan banleꞌn jun waꞌn tetz yi xtxocum, ma choꞌn beneꞌn tan majleꞌn yi jun tal neꞌẍ cneꞌr yi choꞌn at tuchꞌ yi tal meꞌbaꞌ, nin cuꞌ quimsal tan banleꞌn yi cumir tetz xtxocum.
5 Yi tbital Luwiy yi xtxolbil nintzun saj jun chin chiꞌch cꞌuꞌlal tetz tan tuꞌ yi yaꞌtz mban yi ric. Nintzun tal tetz Natán:
—¡Jun cuꞌn, sak swutz Ryos, yi jun yi mban yi jun ajtzaꞌklaꞌtz tajweꞌn cuꞌn tan quimeꞌn! 6 ¡Ej nin tajweꞌn cuꞌn tan ẍchojol cyaj tir yi jamel yi jun tal neꞌẍ cneꞌr! Na yi il yi ncuꞌ nucꞌul na ẍchaj yi qui nin mmeꞌl kꞌajab siquier muꞌẍ tal te yi tal meꞌbaꞌ.
7 Beneꞌn tzun tlol Natán tetz Luwiy:
—¡Itzun aẍ aꞌtz, yi jun yajaꞌtz! Nin je yol kaRyosil, yi oꞌ xonl Israeleꞌj: “In intxaꞌoneꞌn aẍ tan awoqueꞌn tetz chireyil yi eꞌ xonl Israel. Nin ja ẍclax waꞌn tkꞌab yi ẍchiꞌchbeꞌn cꞌuꞌl kꞌajtzun rey Saúl. 8 Nchaꞌtz ja wakꞌ yi caꞌwl iꞌ takꞌab, scyuchꞌ yi eꞌ txkelbeꞌn. Nin ja wakꞌ cyakil yi amaꞌl yi at cwent Israel tu Judá tan acawuneꞌn tibaj. Ja wakꞌ wiꞌnin eꞌchk takleꞌn tzatz, nin ja kloꞌ wakꞌ mas. 9 ¿Ma na nxac tzun meꞌl kꞌej incaꞌwl awaꞌn? ¿Nxac tzun mbnix yi eꞌchk takleꞌn awaꞌn yi qui na chimpekꞌ teꞌj? Na ja cẍcawun tan cweꞌn biyij Urías yi hitita, nin ja xcon yi eꞌ amonita awaꞌn tan quimseꞌn cuꞌn, nin ja el amajol yi txkel iꞌ tan toqueꞌn tetz awuxkel. 10 Ma jaluꞌ tan tuꞌ yi yaꞌtz maban, yi meꞌl kꞌej incaꞌwl awaꞌn, na ja el amajol yi txkel Urías, yi hitita, tan toqueꞌn tetz axnaꞌnil, ilenin sjalok oyintziꞌ xe anajbil.” 11 Ej nin jun cuꞌn yol na talnin Ryos tzatz: “Cyakil yi oyintziꞌ tu chiꞌch cꞌuꞌlal yi sjalok tzaweꞌj, ntaꞌsteꞌn nin sjalokeꞌt xe anajbil. Tzawutz cuꞌn swakꞌeꞌ yi eꞌ axnaꞌnil tetz jun acyꞌajl, nin tzꞌelepon atxꞌix taꞌn, na skꞌej cuꞌn chiwitbej quib. 12 Yi aẍatz ja bnix yi ayaꞌbl awaꞌn ewun cuntuꞌ, ma in wetz, tzꞌelepon atxꞌix waꞌn skꞌejl cuꞌn, nin ẍchiwutz cuꞌn cyakil yi eꞌ xonl Israel,” stzun Kataj bantz tetz Luwiy tan Natán yi eltzanl stziꞌ Ryos.
13 —Bintzi nin ja injuch wil swutz Kataj, stzun Luwiy.
—Bintzi yaꞌtz maban, poro scuyeꞌ Ryos apaj, na quil cẍquim taꞌn. 14 Poro tan tuꞌ yi ja el kꞌej Kataj Ryos awaꞌn ẍchiwutz yi eꞌ kacontr, squimok chan yi tal niꞌ yi mitzꞌij, stzun Natán bantz tetz Luwiy.
15 Ej yi tajeꞌn Natán xe tetz caꞌl, ninin oc lacꞌp jun chumam yaꞌbil te yi niꞌ tan Kataj, yi jun niꞌaꞌtz yi njal tan Luwiy te yi txkel Urías. 16 Toqueꞌn tzun Luwiy tan nachleꞌn Kataj tib yi niꞌ, nin ja mucꞌ iꞌ weꞌj, nin choꞌn na wit iꞌ wuxtxꞌotxꞌ tuꞌ. 17 Itzun yi quilol yi eꞌ wiꞌ banl wiꞌ yi najlcheꞌ le balaj caꞌl tetz Luwiy, ja chiben tan cuꞌswutzil tetz Luwiy tan witeꞌn wi tetz xtxꞌach, poro qui nin cujijtz. Nchaꞌtz qui nin wan iꞌ scyeꞌj yi na chiwan cyetz. 18 Ma yi teleꞌn juk kꞌej ja quim yi niꞌ, poro ja chixob yi eꞌ bajxom tan talcheꞌn tetz Luwiy yi nsken quim yi niꞌ, na eꞌ octz tan xtxumleꞌn: “Qui nin moꞌc yi kayol te wiꞌ Luwiy te yi itzꞌ tzaj yi niꞌ, peor binaꞌtz jaluꞌ yi ja wiꞌt quim. ¿Ẍeꞌn tzun kaban tan talcheꞌn tetz yi ja wiꞌt sotz yi niꞌ? Na qui cunin batz tan yi sotzaj cꞌuꞌlal yi at cuꞌnt, tzꞌelepon xyaꞌy wiꞌ. Ej nin cuquen yi mbi sban iꞌ.” 19 Yi nachoneꞌn Luwiy yi na chijilon squibil quib yi eꞌ bajxomaꞌtz, teleꞌn tzun xtxum tetz yi nsken quim yi niꞌ. Ej nin ben jakol scyetz:
—¿Ja ptzun quim incyꞌajl?
—Ja, ja wit sotz, taꞌ, cheꞌch ban nintz.
20 Kalenaꞌs tzun jeꞌn xtxicbal tib Luwiy wuxtxꞌotxꞌ, nin octz tan jichiꞌn, nin nchaꞌtz ja oc perfum teꞌj tu yi balaj beꞌch tetz, nin ja ben iꞌ le templo tan cꞌuꞌlajeꞌn Ryos. Yi teleꞌn tzaj nintzun ajtz xe yi tetz caꞌl, nin jak muꞌẍ cumir, nin wantz.
21 —¿Mbi na elepont yi ajtzaꞌkl yi na tzanuꞌ tan banleꞌn? Na te yi itzꞌ tzaj yi cyꞌajluꞌ, yi iluꞌ teruꞌ ja mucꞌuꞌ weꞌj, nin wiꞌnin ja okꞌuꞌ te iꞌ. Ma jaluꞌ, te yi ja wiꞌt sotz yi cyꞌajluꞌ, ja wek tibuꞌ nin ja wanuꞌ, cheꞌch yi eꞌ bajxom tetz Luwiy, na ja cheꞌl yab te tajtzaꞌkl.
22 —Te yi ntaxk sotz incyꞌajl, bintzi nin ja inmucꞌ weꞌj, nin ja nokꞌ te iꞌ, na ja intxum yi qui cunin batz tzꞌelepon kꞌajab Ryos sweꞌj, nin stkꞌeꞌ iꞌ amaꞌl tan tuleꞌn yos tu incyꞌajl. 23 Poro jaluꞌ yi ja wit aj tcyꞌal Ryos iꞌ mbiꞌ ekaꞌn taꞌn yi nink chimbisun nin yi nink tzinmucꞌ weꞌj, na ja el intxum tetz yi quil chinxcyeꞌ tan titzꞌeꞌn junt tir iꞌ ẍchixoꞌl almaꞌ, ma na i in wetz, nopontz kale atit iꞌ. Poro yi iꞌ tetz, quiꞌc rmeril nink tzꞌul tan wilweꞌn junt tir, stzun Luwiy bantz.
Yi titzꞌeꞌn Salomón
24 Yi teleꞌn cobox kꞌejtz, nintzun oc Luwiy tan mayseꞌn cꞌuꞌl Betsabé. Ja xaꞌk iꞌ tan xajseꞌn Betsabé, nin ja chiwitbej quibtz, nin jaleꞌn nin ban junt cyꞌajl Luwiy te xnaꞌnaꞌtz. Ej nin yi biꞌ yi niꞌ mban tan iꞌ iꞌtz Salomón. Wiꞌnin pekꞌeꞌn Kataj Ryos te yi jun tal niꞌaꞌtz. 25 Ej, nintzun tal Kataj Ryos tetz Natán tan beneꞌn tan talcheꞌn tetz Luwiy, yi tetz xtxumuꞌn. Yi wit tbital Luwiy yi yol Kataj Ryos, ja oc yi biꞌ Jedidíasa taꞌn tetz yi niꞌ.
Yi cambal Luwiy yi tnum tetz Rabá
26 Te yi na bajij yi xtxolbilaꞌtz, yaꞌstzun na tzan cuꞌn Joab tan oyintziꞌ te yi tnum tetz Amón yi na biꞌaj Rabá. Te yi txant cuntuꞌ tan cambal iꞌ yi tnum kale na najleꞌt yi rey, 27 nintzun ben jun stziblal tan Joab tetz Luwiy: “Txant cuntuꞌ tan incambal yi Rabá, na ja wiꞌt incambaj yi amaꞌl yi na xcon tan colcheꞌn yi aꞌ yi na xcon tetz yi tnum. 28 Chaꞌstzun te baꞌn yi nink tzꞌocuꞌ tan chimolcheꞌn cuꞌn cyakil yi eꞌ sanlar, tan tuleꞌnuꞌ tan oyintziꞌ te Rabá bantz cambaluꞌ, na qui na yub yi ko in cuntuꞌ chinxcyeꞌ scyeꞌj. Na ko yaꞌtz sban, tzꞌocopon tzun imbiꞌ tetz taw yi tnum,” chij.
29 Toqueꞌn tzun Luwiy tan chimolcheꞌn cyakil yi eꞌ tetz sanlar nin eꞌ bentz tan oyintziꞌ te yi tnum Rabá, nin xcyeꞌ iꞌ tan cambajeꞌn. 30 Itzun yi toqueꞌn iꞌ tul caꞌlil chiryosil, nintzun el tcyꞌal yi coron yi ateꞌn twiꞌ chiryosilaꞌtz yi oro cuꞌn, yi at chin balaj cꞌub teꞌj. Ej nin yi talal yi jun coronaꞌtz iꞌtz ox arow. Teleꞌn tzaj tzun tcyꞌal Luwiy jun balaj cꞌub te yi jun coronaꞌtz, nin oc tkꞌol te yi tetz coron. Nchaꞌtz eꞌ cambaj wiꞌnin eꞌchk takleꞌn yi at wiꞌnin walor nin ajtz cyaꞌn le cyetz chitanum. 31 Ma yi eꞌ amonita yi qui nin eꞌ quim tul oyintziꞌ, eꞌ eltzaj tcyꞌal Luwiy tul yi tnum nin cawun scyetz tan cyakꞌujeꞌn tan eꞌchk maꞌcl chitaneꞌn eꞌchk seruch, tu asarón nin cxbil. Nin at eꞌ yi eꞌ oc tan banleꞌn lagris kale atit yi chujil lagris. Iteꞌn nin xtxolbilaꞌtz ban Luwiy scyeꞌjak yi eꞌchk mas tnum yi choꞌn ateꞌ cwent Amón. Kalenaꞌtz tzun pakxeꞌn Luwiy, scyuchꞌ yi eꞌ tetz sanlar, jalen Jerusalén.