Yi xubseꞌn Luwiy te yi xnaꞌn Betsabé
11
1 Itzun bantz tul yi tiemp yi txant tan xeꞌteꞌn yi cresum, yi tiemp yi na cheꞌl yi eꞌ rey tan oyintziꞌ scyuchꞌ yi eꞌ cyetz sanlar, nintzun ben ẍchakol Luwiy yi Joab scyuchꞌ yi eꞌ mas wiꞌtz ajcaw scyetz yi eꞌ sanlar tan chixiteꞌn cuꞌn yi eꞌ amonita. Choꞌn tzun eꞌ cweꞌn solteꞌjil yi tnum tetz Rabá. Ma tetz Luwiy choꞌn cyajeꞌn cyen le tnum Jerusalén.a 2-4 Itzun bantz le jun cweꞌn kꞌej yi nsken el watl Luwiy te yi ujleꞌn yi na ban, choꞌn tzun na xon cuꞌntz wi yi tetz caꞌl yi beneꞌn xmayil jun xnaꞌn yi chin yubeꞌn nin iꞌ yi na tzan tan jichiꞌn. Yi jun xnaꞌnaꞌtz na tzan tan banleꞌn taneꞌn yi cstumbr yi na bajij scyeꞌj yi eꞌ xnaꞌn yi na icyꞌ yi chitxꞌajoꞌn scyeꞌj. Beneꞌn tzun mantar tan Luwiy tan jakleꞌn yi naꞌj scyetz iꞌ yi jun xnaꞌnaꞌtz. Itzun yi pakxeꞌn tzaj yi eꞌ aj mantaril cyalol tzuntz tetz Luwiy yi biꞌ yi jun xnaꞌnaꞌtz. Iꞌtz Betsabé, meꞌl Eliam, nin iꞌ txkel Urías, jun scyeri yi eꞌ aj Hit. Cawun tzun Luwiy tan tuleꞌn yi jun xnaꞌnaꞌtz swutz iꞌ. Ej nin yi tuleꞌn, nintzun eꞌ witbej quib tuchꞌ. Kalenaꞌs tzun pakxeꞌn yi xnaꞌnaꞌtz xe tetz caꞌl.
5 Toqueꞌn quen tzun lacꞌpuj jun niꞌ te xnaꞌn nin ben mantar iꞌ-tz teꞌj Luwiy tan talcheꞌn yi nsken tekaj pwokil jun niꞌ. 6 Nintzun ben ort taꞌn tetz Joab tan ẍchakleꞌn tzaj Urías yi aj Hit. Ej nin yaꞌstzun tulej Joab. 7 Yi tuleꞌn Urías, nintzun ben swutz Luwiy. Jakol tzun Luwiy tetz iꞌ yi ẍeꞌn taneꞌn stziblal Joab scyuchꞌ yi eꞌ mas sanlar, nin yi mbi na bajij tul yi oyintziꞌ yi na tzan. 8 Yi tbital Luwiy yi xtxolbilaꞌtz tetz iꞌ cawuneꞌn nintzun Luwiy tan beneꞌn iꞌ xe tetz caꞌl tan ujleꞌn.
Yi teleꞌn tzaj Urías swutz yi rey, nintzun ben mantar tan Luwiy tan tponseꞌn balaj cumir le caꞌl Urías tetz jun oy. 9 Ma tetz Urías qui nin aj iꞌ xe yi tetz caꞌl, ma na choꞌn bajeꞌn akꞌbal tan iꞌ ẍchixoꞌl yi eꞌ sanlar yi ateꞌ tan qꞌuicyꞌlomiꞌn swutz yi caꞌl rey. 10 Itzun yi tbital yi rey Luwiy yi qui nin aj Urías xe yi tetz caꞌl beneꞌn tzun jakol iꞌ tetz:
—¿Urías, mbi tzuntz yi qui nin ncxaꞌk xe anajbil tan ujleꞌn muꞌẍ tal, na nim tkanil abeꞌ tan awuleꞌn tzoneꞌj?
11 Stzaꞌwel tzun iꞌ:
—Max cꞌuꞌluꞌ taꞌ, poro yi caẍaꞌ yi wiꞌnin xanil tuml yi eꞌ sanlar cwent Israel tu Judá, choꞌn ateꞌ jakꞌ scabteꞌ tuꞌ tan watl. Nchaꞌtz Joab scyuchꞌ yi eꞌ mas bajxomuꞌ, yi choꞌn ateꞌ jak caꞌwlu, choꞌn na chiwit xoꞌl wutz. ¿Naꞌ tzun inil wetz tan xconeꞌn incaꞌl waꞌn tan waꞌaꞌn, nin tan ucꞌaꞌiꞌn nin tan kawitbej kib tu wuxkel? ¡Sak swutz Ryos yi quil tzimban yi jun ajtzaꞌklaꞌtz!
12 Caweꞌn tzun Luwiy tetz:
—Baꞌn bin ẍcyaj tzoneꞌj tetz jaluꞌ. Ej nin ek swakꞌeꞌ amaꞌl tzatz tan apakxeꞌn.
Cyajeꞌn cyen tzun Urías le tnum Jerusalén jalen le junt eklok. 13 Xtxocol tzun Luwiy, yi Urías tan waneꞌn nin tan ucꞌaꞌeꞌn tuchꞌ. Toqueꞌn tzun aꞌ twiꞌ Urías, na yaꞌstzun tajbil Luwiy. Yi toqueꞌn akaleꞌn nintzun ben Urías tan watl le chicaꞌl yi eꞌ sanlar. Qui nin xaꞌk iꞌ tan watl xe yi tetz caꞌl.
14 Ej nin yi junt eklok toqueꞌn tzun Luwiy tan stzꞌibeꞌn nin jun cart tetz Joab. Choꞌn tzun beneꞌn tabnal teꞌj Urías tan tkꞌol iꞌ tetz Joab. 15 Tul yi jun cartaꞌtz stzꞌibaꞌn yi caꞌwl yi na tal: “Chakwoknin Urías kale atit yi ẍchamil yi oyintziꞌ, colwok quen iꞌ ẍchuc bantz sloꞌoneꞌn nin tan quimeꞌn.” 16 Chaꞌstzun te yi toqueꞌn Joab tan oyintziꞌ solteꞌj yi tapijil tnum, choꞌn tzun cawuneꞌn tetz Urías tan beneꞌn swutz cuꞌn yi oyintziꞌ kale ateꞌt yi eꞌ contr yi chin cham nin eꞌ tan oyintziꞌ. 17 Ej itzun yi cyeleꞌn tzaj yi eꞌ contraꞌtz yi ateꞌ tan colcheꞌn yi tnum tan oyintziꞌ scyeꞌj yi eꞌ sanlar yi choꞌn ateꞌ jak caꞌwl Joab, wiꞌnin tzun eꞌ, eꞌ quimtz tul yi jun oyintziꞌaꞌtz nin ẍchixoꞌl yi eꞌaꞌtz yi eꞌ quim, at Urías. 18 Beneꞌn tzun jun cart tan Joab tetz Luwiy tan talcheꞌn tetz cyakil yi puntil yi ẍeꞌn cuꞌn ban yi oyintziꞌ. 19 Nchaꞌtz taltz tetz yi chakum yi tzꞌicyꞌan nin yi jun cartaꞌtz: “Yil tzaj wiꞌ ayol tetz yi rey tan talcheꞌn cyakil yi mbajij, 20 qui cunin batz tzꞌul colp wiꞌ skeꞌj, nin sjakeꞌ tzaj tzatz, ‘¿Nxac tzun nchibentz nakajil cuꞌn yi tapijil yi tnum? ¿Qui peꞌ na el itxum tetz yi at rmeril chicꞌoxtzaj kacontr eꞌchk takleꞌn skibaj? 21 Na yaꞌstzun mbajij jalen yi tnum Tebes yi xcyeweꞌn jun xnaꞌn tan biyleꞌn cuꞌn kꞌajtzun Abimelec, yi cyꞌajl Jerobaal. Na yi jun xnaꞌnaꞌtz yi at wi tapij nin saj cꞌoxol jun caꞌ tibaj tan biyleꞌn cuꞌn. ¿Nxac tzun chibeneꞌn nakajil cuꞌn yi tapij?’ Kalenaꞌs tzun baꞌn tzawalnin tetz: ‘Nchaꞌtz yi Urías yi aj Hit, ja quim. Nin iꞌ jun scyeri yi eꞌ ajcaw squibaj eꞌ sanlaruꞌ.’ ”
22 Beneꞌn tzun yi chakumaꞌtz, nin yi tponeꞌn nintzun taltz tetz Luwiy cyakil yi xtxolbil yi tal Joab tetz. Nin bintzi cunin sajeꞌn tzun colp wiꞌ Luwiy te Joab nin taltz tetz yi chakum:
—¿Nxac tzun nchibentz nakajil cuꞌn yi tapijil yi tnum? ¿Qui peꞌ na el itxum tetz yi at rmeril chicꞌoxtzaj kacontr eꞌchk takleꞌn skibaj? Na yaꞌstzun mbajij jalen yi tnum Tebes yi xcyeweꞌn jun xnaꞌn tan biyleꞌn cuꞌn kꞌajtzun Abimelec, yi cyꞌajl Jerobaal. Na yi jun xnaꞌnaꞌtz yi at wi tapij ja saj cꞌoxol jun caꞌ tibaj tan biyleꞌn cuꞌn. ¿Nxac tzun chibeneꞌn nakajil cuꞌn yi tapij?
23 Beneꞌn tzun tlol yi chakumaꞌtz tetz:
—Yi cyeleꞌn tzaj yi eꞌ kacontr tan oyintziꞌ skej wi ẍkꞌajlaj, txant nin qui nchixcyeꞌ skeꞌj, poro nin jal muꞌẍ kachamil tan oyintziꞌ, nin ja kaxcyeꞌ tan chipakxeꞌn junt tir te yi sawanil yi tnum. 24 Yaꞌstzun yi cyoqueꞌn yi eꞌ cꞌoxol flech yi ateꞌeꞌn wi tapij tan chiloꞌonseꞌn yi eꞌ sanlaruꞌ, nin at cobox yi ja chiquim. Nin ẍchixoꞌl yi eꞌaꞌs yi eꞌ quim, at Urías yi aj Hit.
25 —Buen, alcyen bin tetz Joab, yi quil bisun takꞌun yi mbi mbajij, na yaꞌstzun na bajij tul jun oyintziꞌ. Ntin alcyen tetz yi tajweꞌn tan toqueꞌn il iꞌ tan jaleꞌn mas yi chichamil tan cambajeꞌn yi tnum, jalen yil xit taꞌn. Ma aẍ atz quiwsaj Joab.
26 Yi tbital Betsabé yi nsken quim yi tchmil juk tzun kꞌej bantz tan bis oꞌkl teꞌj. 27 Ma yi ticyꞌeꞌn yi jun tiempaꞌtz tetz bis oꞌkl, cawuneꞌn tzun Luwiy tan tzajeꞌn yi jun xnaꞌnaꞌtz xe yi tetz caꞌl, nin oc tetz txkel, nin jaleꞌn nin ban tal Betsabé. Poro yi Kataj Ryos qui nin tzatzin te yi tajtzaꞌkl Luwiy.