Yi chitxꞌaconeꞌn Luwiy scyeꞌj yi eꞌ aj Siria scyuchꞌ yi eꞌ amonita
10
1 Itzun bantz yi teleꞌn tiemp nintzun quim Nahas, yi chireyil yi eꞌ amonita. Cyajeꞌn cyen tzun yi tetz cyꞌajl yi na biꞌaj Hanún tetz xel. 2 Xtxumul tzun Luwiy yi baꞌn yi nink ẍchaj yi banl talmaꞌ tetz Hanún quib yi mban cyen yi tetz taj, yi kꞌajtzun Nahas. Beneꞌn tzun ẍchakol iꞌ-tz cobox wiꞌtz ajcaw tan talcheꞌn jun yos tetz Hanún nin tan ẍchajleꞌn yi na bisun tan yi il yi nnoj cyen swutz yi taj. Pero yi cyoponeꞌn yi eꞌ ajcawaꞌtz le chitanum yi eꞌ amonita, nin eꞌ oc yi eꞌ wiꞌtz bajxom cwent eꞌ amonita tan yol tu Hanún, yi chireyil. Je ncyaleꞌj: 3 “¿Na peꞌ tocsaj teruꞌ yi ja chuꞌl yi eꞌ ẍchakum Luwiy ntin tan mayseꞌn cꞌuꞌluꞌ nin tan takꞌleꞌn kꞌej yi kꞌajtzun tajuꞌ? Quiꞌ bin, na ja chuꞌl tan kaxkꞌukeꞌn nin tan tilweꞌn yi ẍeꞌn cuꞌn taneꞌn katnumil, bantz cyuleꞌn tzantzaj tlen tan kaxiteꞌn cuꞌn,” cheꞌch bantz.4 Yi tbital Hanún yi xtxolbilaꞌs, cawuneꞌn tzuntz tan cyoqueꞌn yi eꞌ ẍchakum Luwiy xetzeꞌ nin tan xconeꞌn jun joꞌbil tan telseꞌn jalaj ntziꞌ te yi chixmatziꞌ, nin tan ritꞌleꞌn cuꞌn jalaj te yi beꞌch cyetz yi at scyeꞌj jalen te chicux. Nintzun cyal scyetz: “Quiloꞌk wok kale ncxsajeꞌtwok.” 5 Itzun yi tbital Luwiy cyakil yi xtxolbil yi mbajij scyeꞌj yi tetz ẍchakum, beneꞌn tzun ẍchakol iꞌ coboxt tan chicꞌulcheꞌn, na nachon iꞌ teꞌj yi at wiꞌnin txꞌixweꞌn scyetz. Ej nin cawunintz tan chicyajeꞌn cyen Jericó jalen cuꞌn yil chꞌuy junt tir yi chixmatziꞌ. Kalenaꞌs chipakxij Jerusalén.
6 Ma yi eꞌ amonita, nintzun el chitxum tetz, yi na chiꞌch cꞌuꞌl Luwiy scyeꞌj tan yi jun yab ajtzaꞌkl yi cuꞌ chibnol, nintzun eꞌ choj jun chin cꞌoloj sanlar cwent Siria tan quichꞌeyeꞌn, yi choꞌn eꞌ sajeꞌn le amaꞌl Bet-rehob tu Soba. Ej nin nchaꞌtz eꞌ choj junt mil sanlar yi choꞌn ateꞌ jak caꞌwl chireyil yi eꞌ aj Maaca. Nchaꞌtz jal coblaj mil sanlar tetz Is-tob. 7 Poro yi tbital Luwiy, yi yaꞌtz taneꞌn chitxumuꞌn, nintzun ben ẍchakol iꞌ Joab scyuchꞌ yi eꞌ sanlar yi ateꞌ jak caꞌwl tan oyintziꞌ scyuchꞌ. 8 Cyeleꞌn tzaj tzun yi eꞌ amonita tan oyintziꞌ scyuchꞌ yi eꞌ aj Israel swutz cuꞌn yi tnum. Ma yi eꞌ sanlar cwent Siria yi choꞌn ateꞌ jak caꞌwl Soba, tu yi eꞌ sanlar tetz Rehob nin chiban list quib tan oyintziꞌ wutz wutz. Nchaꞌtz xomcheꞌ yi eꞌ sanlar cwent Is-tob tu Maaca scyeꞌj. 9 Itzun yi teleꞌn xtxum Joab tetz yi cyajbil yi eꞌ contr iꞌtz tan oyintziꞌ ẍchiwutz nin wutz chicoc, jeꞌn tzun xtxaꞌol iꞌ yi eꞌ tetz sanlar yi chin cham nin eꞌ tan oyintziꞌ scyuchꞌ yi eꞌ aj Siria. 10 Ma yi eꞌ mas choꞌn cyajeꞌn jakꞌ caꞌwl yi tetz titzꞌun Abisai tan toqueꞌn tan oyintziꞌ scyuchꞌ yi eꞌ amonita. 11 Ej itzun taltz tetz: “Kol chixcyeꞌ yi eꞌ aj Siria sweꞌj cxuꞌl tan wuchꞌeyeꞌn tan oyintziꞌ scyeꞌj. Ej nin kol chixcyeꞌ yi eꞌ amonita tzaweꞌj nopontz tan awuchꞌeyeꞌn. 12 Quiwit atz, koyintzink tetz cuꞌn kalmaꞌ tan colcheꞌn yi ketz kaꞌamaꞌl nin tan colcheꞌn yi eꞌchk tnum cwent kaRyosil, nin baꞌn sban Ryos yi tetz tajbil.”
13 Chibeneꞌn tzun Joab tan oyintziꞌ scyuchꞌ yi eꞌ tetz sanlar scyeꞌj yi eꞌ aj Siria, nin eꞌ el ojk ẍchiwutz. 14 Itzun yi beneꞌn quilol yi eꞌ amonita yi wiꞌnin cyeleꞌn ojk yi eꞌ aj Siria, nchaꞌtz eꞌ cyetz, eꞌ el ojk ẍchiwutz Abisai, nin choꞌn tzun cyocomponeꞌn tan ew ib tul yi tnum. Chimakxeꞌn tzun Joab tan oyintziꞌ scyeꞌj yi eꞌ amonita-aꞌtz. Ej nin kalenaꞌs tzun eꞌ pakxij Jerusalén.
15 Yi teleꞌn coboxt kꞌej, ja el chitxum yi eꞌ aj Siria tetz, yi nsken txꞌakon yi eꞌ xonl Israel scyeꞌj, cweꞌn tzun chichamol quib junt tir tan oyintziꞌ te Israel. 16 Beneꞌn tzun mantar tan Hadad-ezer tan chichakleꞌn tzaj yi eꞌ aj Siria yi choꞌn najlcheꞌ jalaj icyꞌen yi tzanlaꞌ Eufrates. Choꞌn tzun cyuleꞌntz Helam. Yi chibajxom iꞌtz Sobac, yi wiꞌtz ajcaw squibaj yi eꞌ sanlar tetz Hadad-ezer. 17 Yi tbital Luwiy yi mbi na chitxum yi eꞌ aj Siria, cweꞌn tzun chimolol quib cyakil yi eꞌ sanlar tetz Israel nin eꞌ icyꞌtz wi tzanlaꞌ Jordán, tan cyoponeꞌn Helam. Tul yi jun amaꞌlaꞌtz yaꞌs tzun yi cyoqueꞌn yi eꞌ aj Siria tan oyintziꞌ scyeꞌj Israel. 18 Wiꞌtzbil tlen tetz yi oyintziꞌ ja cheꞌl ojk yi eꞌ aj Siria, na ja xcyeꞌ Luwiy tan chibiylen cuꞌn caꞌwunak mil sanlar yi ateꞌeꞌn te chej, tu juk cient careꞌt tetz oyintziꞌ, yi jutuꞌn tan chej. Ej nin ja xcyeꞌ Luwiy tan biyleꞌn cuꞌn Sobac yi cyajcawil yi eꞌ sanlar tetz Siria tul yi jun oyintziꞌaꞌtz. 19 Itzun yi quilol cyakil yi eꞌ rey yi xomij chiwiꞌ teꞌj Hadad-ezer yi nsken chitxꞌacon yi eꞌ xonl Israel scyeꞌj, nintzun cu tzaj chitxumuꞌn, nin eꞌ oc tan joyleꞌn puntil tan jalen paz scyuchꞌ, nin eꞌ oc jakꞌ chicaꞌwl. Ej nin tan tuꞌ yi mbi cunin mbajij, yi eꞌ rey tetz Asiria ja chixob tan quichꞌeyeꞌn junt tir yi eꞌ amonita.