Luwiy tu Mefi-boset
9
1 Itzun bantz opon jun kꞌej yi jakol Luwiy: “¿At poloꞌ jun xonl kꞌajtzun Saúl yi baꞌn noꞌc tan ẍchꞌeyeꞌn tan tuꞌ yi inyol yi nsuknak tetz kꞌajtzun Jonatán?” 2 At jun mos yi martomaꞌ yi kꞌajtzun Saúl yi na biꞌaj Siba. Nintzun ben mantar Luwiy tan ẍchakleꞌn. Itzun yi toponeꞌn nintzun ben jakol Luwiy tetz:—¿I peꞌ aẍaꞌtz yi Siba?
—I inaꞌtz Taꞌ, nin in jun ẍchakumuꞌ, stzun iꞌ bantz.
3 Beneꞌn tzun jakol yi rey tetz:
—¿At poloꞌ jun xonl kꞌajtzun Saúl yi at rmeril yil noꞌc tan ẍchꞌeyeꞌn tan jaleꞌn kꞌej Ryos waꞌn?
—At jun cyꞌajl kꞌajtzun Jonatán, yi yeꞌyuj yi cob tkan.
4 —¿Naꞌ tzun atit i?
—Choꞌn najlij iꞌ le amaꞌl Lodebar, xe najbil Maquir, yi cyꞌajl yaj Amiel, stzun Siba bantz.
5 Cawuneꞌn tzun yi rey Luwiy tan sajeꞌn chakij yi jun yajaꞌtz. 6 Itzun yi tponeꞌn Mefi-boset, yi cyꞌajl kꞌajtzun Jonatán, yi mam kꞌajtzun Saúl swutz Luwiy, nintzun cu jokloktz tan takꞌleꞌn kꞌej iꞌ.
—¡Mefi-boset!
—Inaꞌtz Taꞌ, in jun ẍchakumuꞌ.
7 Beneꞌn tzun tlol Luwiy tetz:
—Quil cxob Mefi-boset, na nocopon tan awuchꞌeyeꞌn tan tuꞌ yi inyol yi in suknak tetz kꞌajtzun ataj Jonatán. Swakꞌeꞌ junt tir cyakil yi xtxꞌotxꞌbeꞌn kꞌajtzun acyꞌeꞌx Saúl. Ej nin ilenin baꞌn cẍwan swuchꞌ.
8 Cweꞌn tzun mejlok Mefi-boset swutz Luwiy, nintzun taltz tetz:
—¿Iluꞌ inrey, mbitzuntz na el kꞌajabuꞌ sweꞌj? Na yi in wetz quiꞌc muꞌẍ tal niꞌ weri inxac na qui na chinxon tan tuꞌ yi yeꞌyuj wukan.
9 Qui nin oc Luwiy tan xtxumleꞌn yi yol Mefi-boset, ma na ben mantar tan ẍchakleꞌn tzaj Siba, yi mosbeꞌn Saúl, nintzun taltz tetz:
—I bin jaluꞌ Siba, na chintzan tan takꞌleꞌn tetz Mefi-boset, cyakil yi amaꞌl yi at tzaj tkꞌab kꞌajtzun Saúl, yi apatrónbeꞌn. 10 Chaꞌstzun te yi aẍ scyuchꞌ yi eꞌ anitxajil, tajweꞌn tan itoqueꞌn tan cojleꞌn yi txꞌotxꞌ, nin tan tocseꞌn wutz, nin tan jeꞌseꞌn yi cosech. Xconk tzun tan chicꞌaꞌcheꞌn yi eꞌ xonl yi apatrón. Ma yi iꞌ tetz, yi Mefi-boset ilenin swank swuchꞌ.
Ma yi Siba, yi at oꞌlaj cyꞌajl tu junak mos, talol tetz yi rey:
11 —Baꞌn bin Taꞌ tzimbneꞌ taneꞌn cyakil yi caꞌwluꞌ quib yi ntaluꞌ swetz, stzun Siba bantz.
Ma tetz Mefi-boset ilenin choꞌn waneꞌn iꞌ tuchꞌ yi rey, chi ik jun cyꞌajl iꞌ. 12 Nchaꞌtz at jun tal cyꞌajl Mefi-boset yi na biꞌaj Micaía. Ej nin cyakil yi eꞌ yi najlcheꞌ xe caꞌl Siba, eꞌ cuꞌn ẍchakum Mefi-boset ban. 13 Ma yi Mefi-boset, tan tuꞌ yi yeꞌyuj yi cob tkan, choꞌn tzun najeweꞌntz Jerusalén, na ilenin choꞌn na wan iꞌ tu yi rey.