Yi eꞌchk txꞌacoꞌn yi ban Luwiy scyuchꞌ yi eꞌ tetz sanlar tulak chin oyintziꞌ
8
1 Yi xoneꞌn tiemp nintzun txꞌacon Luwiy scyeꞌj yi eꞌ filistey, nin eꞌ oc jak tetz caꞌwl. Nin el tcyꞌal yi caꞌwl yi at chikꞌab. 2 Nchaꞌtz txꞌacon iꞌ scyeꞌj yi eꞌ aj Moab. Ej nin cawunin scyetz tan chicweꞌn joklok, txoliꞌn eꞌ ban wuxtxꞌotxꞌ, nin xcon jun akwil tan maꞌleꞌn naꞌj scyetz eꞌ yi ẍchiquimok, nin naꞌj scyetz eꞌ yi ẍchiclaxok tkꞌab quimichil. Cyakil yi eꞌ yi eꞌ baj cuꞌn tcꞌuꞌl cob jaꞌ tetz yi akwil, quimich ẍchiwutz mban, ma cyakil yi eꞌ yi eꞌ baj cuꞌn tul jun jaꞌ tetz yi akwil, yaꞌstzun eꞌ, eꞌ clax. Yaꞌstzun ban iꞌ-tz tan cyoqueꞌn yi eꞌ aj Moab jak tetz caꞌwl nin tan ẍchojleꞌn alcawal tetz.3 Nchaꞌtz xcyeꞌ iꞌ teꞌj Hadad-ezer cyꞌajl Rehob, yi chireyil yi eꞌ aj Soba, jun amaꞌl cwent Siria. Xcyeꞌ Luwiy te Hadad-ezeraꞌtz te yi beneꞌn iꞌ jalen jeꞌn tziꞌn tzi aꞌ Eufrates tan cyoqueꞌn yi eꞌ wunak yi najlcheꞌ-tz jak caꞌwl iꞌ junt tir. 4 Tul yi jun oyintziꞌaꞌtz ja cambaj Luwiy jun mil tu juk cient sanlar yi ateꞌeꞌn tib chej, nin junak mil sanlar yi xoꞌn cuntuꞌ quitaneꞌn. Ntin xcon yi chej taꞌn yi na taj tan juteꞌn jun cient careꞌt tetz oyintziꞌ. Ma yi eꞌ mas chej eꞌ loꞌon cyen taꞌn, bantz quiꞌc meril tan chixconeꞌn tan oyintziꞌ.
5 Cyoponeꞌn tzun yi eꞌ sanlar aj Siria cwent Damasco tan ẍchꞌeyeꞌn kloꞌ Hadad-ezer yi rey Soba, poro nin oc Luwiy tan oyintziꞌ scyuchꞌ nin xcyeꞌ iꞌ tan chiquimseꞌn junak cob mil aj Siria-aꞌtz. 6 Toqueꞌn tzun Luwiy tan chijatxleꞌn cuꞌn cobox kꞌuꞌj sanlar tulak eꞌch amaꞌlaꞌtz cwent Damasco. Tan yi xtxolbilaꞌtz ja choꞌc yi eꞌ aj Siria jakꞌ caꞌwl Luwiy. Nin ja chichoj alcawal tetz. Wiꞌnin jaleꞌn kꞌej Luwiy tan eꞌchk oyintziꞌaꞌtz na xomij Ryos teꞌj, alchok na aj nint. 7 Nchaꞌtz cambaj iꞌ yi eꞌchk makbil flech yi oro cuꞌn, yi xconak cyakꞌun yi eꞌ wiꞌtz chibajxom yi eꞌ yi ateꞌ tzaj jak caꞌwl Hadad-ezer, nin choꞌn tzun tponeꞌn eꞌchk makbil flechaꞌtz taꞌn jalen Jerusalén. 8 Nchaꞌtz cambaj iꞌ wiꞌnin brons yi at tul yi cob tnum yi na chibiꞌaj Beta tu Berotai yi ateꞌ tzaj jak caꞌwl Hadad-ezer.
9 Ej nin yi tbital Toi, yi rey tetz amaꞌl cwent Hamat, yi nsken txꞌacon Luwiy teꞌj Hadad-ezer, 10 nin tzun ben ẍchakol iꞌ yi tetz cyꞌajl swutz yi rey Luwiy tan toyeꞌn balaj oy tetz yi oro cuꞌn tu sakal nin tetz brons tan tyoẍiꞌn tetz yi txꞌacoꞌn yi mban Luwiy te jun reyaꞌtz. Na nchaꞌtz Toi, nsken cyen choyintzin tu yi jun Hadad-ezeraꞌtz. 11 Toqueꞌn tzun Luwiy tan xanseꞌn yi eꞌchk oyaꞌtz bantz toyeꞌn tetz Ryos, tuml cyakil yi oro, tu yi sakal yi nsken cambaj iꞌ lakak eꞌchk amaꞌl tu eꞌchk tnum yi ocnak jakꞌ tetz caꞌwl. 12 Iꞌtz yi tnum tetz Edom, tetz Moab, tetz Amnón, tu chiꞌamaꞌl yi eꞌ filistey tu chiꞌamaꞌl yi eꞌ xonl Amalec, nchaꞌtz cyakil yi cambaj iꞌ tul yi oyintziꞌ tuchꞌ yi rey Hadad-ezer, cyꞌajl Rehob, rey tetz Soba.
13 Ej nin jal mas kꞌej Luwiy yi xcyeweꞌn iꞌ scyeꞌj yi eꞌ aj Edom. Na xcyeꞌ iꞌ tan chisotzajeꞌn waxaklaj mil chisanlar le jocoꞌj yi na biꞌaj “Tetz Atzꞌum”. 14 Nin nchaꞌtz cyaj cyen cobox kꞌuꞌj tetz sanlar iꞌ tan cawuneꞌn tul yi amaꞌl cwent Edom. Tan yi xtxolbilaꞌs, cyakil cuꞌn yi eꞌ aj Edom eꞌ oc jakꞌ caꞌwl Luwiy, na ilenin xomij Ryos te Luwiy, alchok amaꞌl kale na beneꞌt iꞌ.
Yi chibiꞌ yi eꞌ bajxom yi ateꞌ jakꞌ caꞌwl Luwiy
15 Cawuneꞌn tzun Luwiy squibaj cyakil yi eꞌ xonl Israel. Chumbalaj nin ban iꞌ tan chicaweꞌn, na ilenin ja lajluchax yi tzꞌaknakil tu jicyuchil yi caꞌwl yi xcon taꞌn squibaj yi eꞌ tetz tanum. 16 Yi yaj Joab, yi tal naꞌ Sarvia, iꞌ bajxom ẍchiwutz cyakil yi eꞌ sanlar cwent Israel. Ma yi yaj Josafat yi cyꞌajl Ahilud, iꞌ yi tajtzꞌib yi rey Luwiy. 17 Ma yi yaj Zadoc, cyꞌajl Ahitob, tu Ahimelec cyꞌaj Abiatar, yaꞌstzun yi eꞌ paleꞌ. Ma yi yaj Seraías, yaꞌstzun tzꞌibanl tetz cyakil eꞌchk takleꞌn yi na bajij tul yi jun tiempaꞌtz. 18 Ma yi yaj Benaía, cyꞌajl Joiada, iꞌ yi bajxom scyetz yi eꞌ aj Creta yi qꞌuicyꞌlom yi rey Luwiy. Ma yi eꞌ cyꞌajl Luwiy eꞌ cuꞌn akꞌol ajtzaꞌkl.