Yi sukil Ryos banl tib Luwiy
7
1 I tzun bantz yi nsken wiꞌt jal tzatzin paz tan Kataj ẍchixoꞌl yi eꞌ xonl Israel scyuchꞌ yi eꞌ mas jilwutz wunak yi ateꞌ solteꞌj, nin yi nsken opon yi rey tan najeweꞌn le palacio, 2 nintzun jilon Luwiy tetz Natán, yi elsanl stziꞌ Ryos:—I bin jaluꞌ Natán, choꞌn najlchin tul yi jun balaj caꞌleꞌj, yi xan tzeꞌ cuꞌn. Ma yi caẍaꞌ kale at cuꞌn eꞌchk caꞌwl Kataj choꞌn at tul jun mantial tuꞌ. ¿Baꞌn peꞌ le wutz teruꞌ yil noꞌc tan banleꞌn jun balaj caꞌl tan toqueꞌn yi caẍaꞌaꞌtz tul? stzun Luwiy tetz Natán.
3 —Baꞌn bin, baꞌn tzꞌocuꞌ tan banleꞌn yi caꞌl Kataj yi txumijt tanuꞌ, na xomij Kataj tan ẍchꞌeyeꞌnuꞌ, chij Natán bantz.
4 Poro yi toqueꞌn akaleꞌn nin tzun jilon Kataj tetz Natán: 5 “Baꞌn cẍben tan xtxoleꞌn yi xtxolbileꞌj tetz yi inchakum Luwiy. Nin alaj tetz, yi yaꞌstzun yol Jehová yi iRyosil: ‘Nkꞌeꞌtz aẍ cẍocpon tan banleꞌn jun incaꞌl tan innajeweꞌn tul. 6 Na jetzaꞌtz yi cyeleꞌn tzaj yi eꞌ axonl waꞌn jakꞌ caꞌwl eꞌ aj Egipto jalen jaluꞌ, quiꞌc jun tir jajk chin najan xe jun balaj caꞌl, ma na ntin ja naꞌtij tul mantial tuꞌ. 7 Nin tul cyakil yi tiemp yi ja naꞌtij ẍchixoꞌl yi eꞌ axonl, quiꞌc jun tir jajk wal tetz jun ajcaw yi ja bixeꞌ waꞌn tan chicaweꞌn yi eꞌ intanum, tan toqueꞌn tan banleꞌn jun incaꞌl, yi xan tzeꞌ cuꞌn, tan innajeweꞌn tul.’
8 ”Nchaꞌtz alaj tetz yi inchakum Luwiy yi iꞌtz yi in, yi in Jehová, yi jun yi cyaꞌl na xcyeꞌ quen teꞌj, yi na chintzan tan talcheꞌn nin yi xtxolbileꞌj tetz: ‘Ja cẍeꞌl tzaj waꞌn te yi awakꞌun tetz pstor cneꞌr, nin tan axomeꞌn wutz chicoc yi eꞌ awawun, bantz acyajeꞌn cyen tetz wiꞌtz bajxom scyeꞌj eꞌ intanum, yi eꞌ xonl Israel. 9 Ja chinxom tzaweꞌj, alchok amaꞌlil kale na ncẍaꞌj nint. Nin tircuꞌn yi eꞌ acontr yi eꞌ oc tan oyintziꞌ tzaweꞌj, ja cheꞌl cuꞌn waꞌn swutz. Nin ja jal wiꞌnin akꞌej waꞌn, chi taneꞌn chikꞌej yi eꞌ lmak wunak yi ateꞌ beneꞌn tziꞌn wi munt. 10 Nin nkꞌeꞌtz ntinaꞌtz, ma na ja bixeꞌ jun amaꞌl waꞌn scyetz cyakil yi eꞌ atanum, nin choꞌn nin nchopontz waꞌn tan chinajeweꞌn tul. Cyaꞌl jun na tzan tan ixuxeꞌn, nin quiꞌt na chopon yi eꞌ mal nak tan ibuchleꞌn, chi banak cyen tul yi tiemp 11 tetz yi eꞌ pujul xtisyaꞌ, yi eꞌ cawun tibaj yi eꞌ atanum Israel. Quiꞌt lwakꞌ amaꞌl scyetz acontr tan cyoqueꞌn tan axuxeꞌn. Ej nin ilenin ẍchijalok axonl waꞌn yil ẍchicawunk. 12 Nin yil sken cẍquim, nin yi nsken ẍmukxij xlaj amam ateꞌ, tzimbixbajeꞌ jun axonl yil tzꞌoc cyen tetz rey. 13 Iꞌ tzun tzꞌocpontz tan banleꞌn yi jun incaꞌlaꞌtz, nin scawunk iꞌ tetz ben kꞌej ben sak. 14 Nocpon tetz taj iꞌ, nin iꞌ tzꞌocpon tetz incyꞌajl. Poro kol tzꞌoc jun axonl tan juchleꞌn jun til tzinwutz, nocpon tzuntz tan cawseꞌn nin sloꞌonk waꞌn, chi na ban jun yaj te cyꞌajl. 15 Ej nin quil tzincyꞌajlen yi banl walmaꞌ tzawibaj, chi mimban quen te Saúl, na yi teleꞌn yi banl walmaꞌ tibaj, choꞌn tzun wakꞌoltz tzatz, na ja cẍoꞌc cyen waꞌn tetz rey. 16 Tetz ben kꞌej ben sak sjalok jun axonl waꞌn yi at derech tan cawuꞌn,’ ” stzun Kataj bantz tetz Natán tan tlol tetz Luwiy.a
17 Toqueꞌn tzun Natán tan xtxoleꞌn tetz Luwiy, quib yi baj tbital tetz Kataj Ryos. 18 Ej nin yi wiꞌt tbital Luwiy yi xtxolbilaꞌtz, nin tzun bentz tan yol tu Kataj Ryos le mantial Kataj. I tzun taltz tetz: “Iluꞌ Cawl wetz, iluꞌ inRyosil, max cꞌuꞌluꞌ. Quiꞌc ekaꞌn waꞌn, nin quiꞌc ekaꞌn cyaꞌn eꞌ inxonl, poro ja wiꞌt jal kakꞌej tanuꞌ. 19 Iluꞌ Kataj Ryos, ja jilonuꞌ te yi mbi cuꞌn sbajok scyeꞌj yi eꞌ inxonl yi ẍchicawunk tzantzaj. Ej nin cyakil yi xtxolbilaꞌtz iꞌtz yi caꞌwluꞌb yi na tzanuꞌ tan kachusleꞌn te yi tajbiluꞌ. Ej nin iꞌtz tetz cyakil wunak yi ateꞌ beneꞌn tziꞌn, na iluꞌ teruꞌ, iluꞌ Cawl ketz kacyakil cuꞌn. 20 Poro in tuꞌ jun xconsbeꞌtzuꞌ. Nin quiꞌc mas yol na jal waꞌn tan tyoẍineꞌn teruꞌ Taꞌ, na ilijt cyakil intxumuꞌn tanuꞌ. 21 Poro yi iluꞌ teruꞌ ja banuꞌ yi teruꞌ tajbiluꞌ nin ja lajluchax yi eꞌchk takleꞌn balaj yi na tzanuꞌ tan sukeꞌn swetz. 22 Chumam nin yi teruꞌ kꞌejuꞌ Taꞌ, nin iluꞌ Cawl ketz. Ej nin quiꞌc nin junt at beneꞌn tziꞌn cheꞌnk chi iluꞌ teruꞌ, na quiꞌc junt Ryos at, nin yaꞌtz elnak katxum tetz. 23 Ma yi oꞌ ketz yi oꞌ xonl Israel, oꞌ tanumuꞌ. Ej nin quiꞌc junt jilwutz wunak chi kutaneꞌn ketz yi ja keꞌl tzaj colpuj tanuꞌ chikꞌab yi eꞌ aj Egipto, bantz koqueꞌn tetz mero tanumuꞌ. Ja jal yi kꞌejuꞌ beneꞌn tziꞌn tan eꞌchk balaj milawr yi mbanuꞌ skeꞌj. Ej nin tan tetzaluꞌ yi teruꞌ amaꞌluꞌ, ja cheꞌl lajuꞌn yi eꞌ wunak yi ateꞌ, scyuchꞌ chiryosil. Ej nin ja cheꞌl tzaj tanuꞌ te yi na chitzan kamam kateꞌ tan cyoqueꞌn tul. 24 Bixbaꞌnt tanuꞌ tan koqueꞌn yi oꞌ xonl Israel tetz mero tanumuꞌ, tetz ben kꞌej ben sak. Ej nin bixbaꞌnt tanuꞌ tan toqueꞌnuꞌ tetz kaRyosil.
25 ”Chaꞌstzun te iluꞌ Kataj Jehová, lok tzꞌel cunuꞌ te yi yoluꞌ yi ja wiꞌt sukuꞌ tetz yi ẍchakumuꞌeꞌj. Ej nink tzꞌel cunuꞌ te yi yoluꞌ yi ja wiꞌt sukuꞌ scyetz eꞌ inxonl. 26 Ilen nink lok tzꞌakꞌlij kꞌej yi biꞌuꞌ Taꞌ, nin ilen nink tzꞌaꞌlchij yi iluꞌ yi Ryos yi cyaꞌl na xcyeꞌ quen teꞌj. Iluꞌ kaRyosil yi oꞌ xonl Israel, ma yi in wetz, in tuꞌ xconsbeꞌtzuꞌ. Lok tzꞌocuꞌ tan chibixbajeꞌn yi eꞌ inxonl tetz rey sbneꞌ opon tunintz. 27 Yi iluꞌ teruꞌ Taꞌ, iluꞌ yi Ryos yi na xcyeꞌ te cyakil, nin ja wiꞌt taluꞌ tetz yi ẍchakumuꞌeꞌj, yi jun cuꞌn, sjalok eꞌ inxonl yi ẍchicawunk sbneꞌ opon tunintz. Chaꞌstzun te yi ja nimsaj incꞌuꞌl tan cꞌucheꞌn yi paworeꞌj teruꞌ Taꞌ. 28 Bintzi cunin iluꞌ inRyosil, nin cyakil xtxolbil yi ja wiꞌt sukuꞌ swetz tzꞌelepon cuꞌnuꞌ teꞌj. 29 Chaꞌs tzun te, lok takꞌ tzajuꞌ yi banluꞌ squibaj eꞌ inxonl nin lok cheꞌ qꞌuicyꞌlejuꞌ sbneꞌ opon tunintz, na yi iluꞌ teruꞌ Taꞌ, iluꞌ Cawl ketz, nin ja wiꞌt sukuꞌ cyakil eꞌchk takleꞌnaꞌtz swetz,” stzun Luwiy bantz tetz Kataj.