Yi joyol Luwiy puntil tan tponseꞌn kloꞌ junt tir yi caẍaꞌ jalen Jerusalén
6
1 I tzun bantz nin tzun eꞌ cuꞌ molol junt tir Luwiy cyakil yi eꞌ sanlar yi txaꞌijcheꞌt tan chixconeꞌn cwent Israel. Yi cyajlal yi eꞌ sanlaraꞌtz iꞌtz junaklaj mil. 2 Choꞌn tzun cyoponeꞌntz le amaꞌl cwent Judá yi na biꞌaj Baala, na nin bixeꞌ-tz taꞌn tan ticyꞌleꞌn tzaj yi caẍaꞌ kale at cuꞌn eꞌchk caꞌwl Kataj, tan toponeꞌn Jerusalén. Yaꞌs tzun yi caẍaꞌaꞌtz kale na naꞌwsit yi biꞌ Kataj Ryos yi cyaꞌl jun na xcyeꞌ quen teꞌj, yi jun Ryosaꞌtz, yi choꞌn at cꞌolchbil ẍchixoꞌl yi eꞌ querubim. 3-4 Choꞌn cyajnak cyen yi caẍaꞌaꞌtz le caꞌl Abinadab, yi ateꞌn wi jun juꞌwutz. Choꞌn tzun jeꞌn nin yi caẍaꞌaꞌtz cyaꞌn tibaj jun acꞌaj careꞌt yi ocnin wacẍ tan juteꞌn. Bajx cheꞌ tzun yi cob cyꞌajl Abinadab, yi Uza tu Ahío, ẍchiwutz yi wacẍ tan ẍchajleꞌn chibeꞌ. Bajxij Ahío swutz yi caẍaꞌ. 5 Nin benakeꞌ nin Luwiy scyuchꞌ cyakil yi eꞌ sanlar tan bitz, nin tan bixl tetz cuꞌn cyakil chichamil tan takꞌleꞌn chikꞌajsbil tetz Ryos te yi xomcheꞌ te yi caẍaꞌaꞌtz. Wiꞌnin chibeneꞌn tan bitz te yi eꞌchk arpa tu eꞌchk salterio, nin pandero tu castañuela nin eꞌchk platillo. 6 Ma yi cyoponeꞌn le amaꞌl yi na aꞌlchij “Er tetz Nacón”, nin tzun ben Uza tan stzꞌamleꞌn yi caẍaꞌ tetz Ryos, tan qui teleꞌn trimp, na txant qui eꞌ je tzotp yi eꞌ wacẍ. 7 Poro nin jeꞌ lajpuj wiꞌ Kataj te Uza tan paj yi mben iꞌ tan stzꞌamleꞌn yi caẍaꞌ. Taꞌsteꞌn tzun jeꞌn pacꞌlok xlaj yi caẍaꞌ. Nin jun cuꞌn ban, nin el cuꞌn swutz.8 Ma yi Luwiy nin tzun jeꞌ lajpuj muꞌẍ wiꞌ iꞌ, na nin quim Uza tan Ryos. Chaꞌstzun te toqueꞌn cyen biꞌ yi luwaraꞌtz tan Luwiy tetz Pérez-uza, nin iteꞌn nin biꞌ yi amaꞌlaꞌtz jaluꞌ. 9 Nin tzun oc jun chin xoꞌw tetz Luwiy te jun kꞌejaꞌtz, tan paj yi xtxolbil yi ban Kataj Ryos te Uza: “¡Siquier nink tzinnimsaj wib tan ticyꞌleꞌn nin yi caẍaꞌ tetz Kataj!” stzun iꞌ bantz. 10 Nin tan paj yi quiꞌt takꞌ tib tan ticyꞌleꞌn nin yi caẍaꞌ le tnum tetz Luwiy, nin tzun cawuntz tan beneꞌn ticyꞌleꞌn xe caꞌl Obed-edom, jun yaj yi aj Gat. 11 Ox tzun xaw ban yi caẍaꞌ xe caꞌl yi yajaꞌtz, nin takꞌ Kataj yi banl tibaj iꞌ tuml yi najal.
Yi beneꞌn tcyꞌal Luwiy yi caẍaꞌaꞌtz le tnum Jerusalén
12 Yi tbital yi rey Luwiy yi nsken takꞌ Kataj banl tibaj Obed-edom tuml yi eꞌ najal iꞌ nin nchaꞌtz tibaj cyakil yi tetz meꞌbiꞌl tan tuꞌ yi at cyen caẍaꞌ Kataj scyuchꞌ, nin tzun xtxum Luwiytz tan beneꞌn tan ticyꞌleꞌn tzaj yi caẍaꞌ, tan tponeꞌn le tetz tanum. Beneꞌn tzuntz tan ticyꞌleꞌn tzaj tan toponseꞌn le tetz tnum nin wiꞌnin stzatzineꞌn iꞌ yi beneꞌn tcyꞌal. 13 Itzun yi jeꞌn quicyꞌal yi eꞌ ekum yi caẍaꞌ, ntintzun eꞌ xontz kakꞌ xoꞌl cyakan nin eꞌ taneꞌ-tz tan xoꞌn. Toqueꞌn tzun Luwiy tan biyleꞌn jun mam tor tu jun cneꞌr yi nternin kꞌant tetz chitxꞌixwatz swutz Kataj.
14 Ma tetz Luwiy ntin at jun xbuꞌk lino wutz tkan iꞌ nintzun oc tan bixl tan takꞌleꞌn kꞌej Kataj. 15 Beneꞌn tzun quicyꞌal Luwiy scyuchꞌ cyakil eꞌ xonl Israel yi caẍaꞌ tan chijeꞌn poneꞌn Jerusalén. Te yi na chixon na chibitzin len nin na tzan suꞌ cyaꞌn tan yi tzatziꞌn yi ateꞌ cuꞌnt. 16 Ma yi toponeꞌn yi caẍaꞌ le tnum tetz Luwiy, nin tzun eltzaj Mical yi meꞌl kꞌajtzun Saúl tan xmayeꞌn le wentanuꞌ, nin yi beneꞌn tilol yi wiꞌnin bixineꞌn nin wiꞌnin na tzꞌitpun Luwiy swutz yi caẍaꞌ, chin txꞌixwil nin ban swutz iꞌ.
17 Choꞌn tzun toponeꞌn yi caẍaꞌ Katajaꞌs cyaꞌn le jun mantial yi yaꞌtz nin xac yi bnixeꞌn tan Luwiy. Toqueꞌn tzun Luwiy tan pateꞌn txꞌixwatz tu eꞌchk oy yi na ẍchaj yi at tzatzin paz ẍchixoꞌl tu Ryos. 18 Yi bajeꞌn wiꞌ yi munl iꞌ tan pateꞌn eꞌchk txꞌixwatzaꞌtz, nin tzun takꞌ banl squibaj cyakil yi eꞌ tanum tan biꞌ Kataj Ryos, yi jun yi cyaꞌl na xcyeꞌ cyen teꞌj. 19 Nin tzun takꞌ Luwiy jujun pam tu cob torta scyetz cyakil wunak, jun yi banijt tan dátiles cuꞌn, nin junt yi banijt tan pasas. Yi wiꞌt bajeꞌn cyaꞌn, nin tzun eꞌ ajtz xeꞌak chicaꞌl.
20 Nchaꞌtz nin ben Luwiy xe tetz caꞌl tan takꞌleꞌn chibanl yi eꞌ tetz najal. Poro nin el tzaj Mical yi meꞌl kꞌajtzun Saúl tan yol tetz:
—¡Chumbalaj nin ptzun mbanuꞌtz, yi iluꞌ rey, yi mbaj ẍchajol tibuꞌ ẍchiwutz yi eꞌ xun yi esclaw tu mos tuꞌ, na ja ẍchaj tibuꞌ ẍchiwutz chi jun yaj yi quiꞌc nin noc xtxꞌix!
21 —Bintzij yi ayol, chij Luwiy —ja chimbixin, poro choꞌn nchimbixin swutz Kataj Ryos, na iꞌ nchintxaꞌoneꞌn tan woqueꞌn cyen tetz rey cwent tircuꞌn Israel tetz xel kꞌajtzun ataj nin tetz xel yi eꞌ xonl iꞌ. Chaꞌstzun te na chimbixin swutz yi Wajcaw. 22 Nin sbneꞌ opon tunintz swocseꞌ wib juy swutz iꞌ. Nocopon tetz jun yi quiꞌc kꞌej. Yaꞌstzun atz atxumuꞌn poro yi eꞌ esclawaꞌtz yi na awal tzaj eꞌ teꞌn chocpon tan takꞌleꞌn inkꞌej, chij Luwiy tetz Mical.
23 Ma yi Micalaꞌtz qui nin talaj iꞌ jun tal te yi ntaxk quim.