Yi bixeweꞌn Luwiy tetz wiꞌtz rey squibaj cyakil eꞌ xonl Israel
5
1 Itzun yi wiꞌt bajijeꞌn yi xtxolbilaꞌtz, chibeneꞌn tzun chimolol quib cyakil yi coblaj kꞌuꞌj xonl Israel jalen Hebrón, tan yol tetz Luwiy: “Max cꞌuꞌluꞌ Taꞌ. Katanum kib tuchꞌuꞌ, na junit kaẍchꞌel. 2 Yi ketz kamantar tan talcheꞌn teruꞌ iꞌtz: Bintzij nin yi kꞌajtzun Saúl, ja xcon cyen tetz kareyil, poro qui nin bajx cuꞌn iꞌ skawutz. Ma iluꞌ teruꞌ ja bajx cunuꞌ skawutz yi nkaben tulak eꞌchk oyintziꞌ. Nchaꞌtz bixbaꞌnt tan Ryos yi iluꞌ teruꞌ tzꞌocopon cyenuꞌ tan cawuꞌn squibaj cyakil cuꞌn oꞌ xonl Israel,” cheꞌch bantz tetz.3 Yaꞌstzun yi xtxolbil yi nxcon cyakꞌun eꞌ wiꞌ banl wiꞌ scyeꞌj yi coblaj kꞌuꞌj xonl Israel yi chijiloneꞌn tu yi rey Luwiy le tnum Hebrón. Ej nintzun bnix jun trat tan Luwiy scyuchꞌ yi eꞌ wiꞌ banl wiꞌaꞌtz, nin oc Ryos taꞌn tetz testiwil yi trat. Bixeweꞌn tzun Luwiy cyaꞌn tetz wiꞌtz chireyil squibaj cyakil yi eꞌ xonl Israel. 4 Nsken tzun tzꞌak junaklaj yob tan Luwiy yi toqueꞌn tetz rey, nin caꞌwunak yob ban iꞌ tan cawuꞌn squibaj yi eꞌ xonl Israel. 5 Juk tzun yob tu niꞌcy cawuneꞌn iꞌ le tnum Hebrón squibaj yi eꞌ aj Judá. Ma yi toponeꞌn iꞌ Jerusalén yaꞌstzun toqueꞌn tetz chirey cyakil eꞌ xonl Israel scyuchꞌ eꞌ aj Judá. Cawuneꞌn tzun iꞌ squibaj tetz junaklaj tu ox yob.
Yi cambal Luwiy yi juꞌwtz Sión yi cyaꞌl na ocpon teꞌj
6 I tzun bantz nin tzun eꞌ ben yi rey Luwiy scyuchꞌ yi eꞌ sanlar jalen le tnum Jerusalén tan chixiteꞌn cuꞌn yi eꞌ jebuseo yi najlcheꞌ le jun tnumaꞌtz. Nin tan paj yi kꞌuklij chicꞌuꞌl yi eꞌ jebuseo te yi quiꞌc rmeril tan chixcyeweꞌn Luwiy tan cyocomponeꞌn tul yi tnumaꞌtz na tapij cuꞌn solteꞌj, eꞌ xbajtzijeꞌn nin scyetz: “¿I peꞌ axwokaꞌtz yi na itaj cxoꞌc tzajwok tan kabiyleꞌn cuꞌn? Ploj itajtzaꞌkl, na chixcyek yi eꞌ kamoyiꞌẍ scyuchꞌ yi eꞌ kacoꞌx tan ilajeꞌn len,” cheꞌch ban tzaj. 7 Poro xcyeꞌ Luwiy scyuchꞌ yi eꞌ tetz sanlar tan cambajeꞌn yi tnumaꞌtz yi at wi juꞌwtz Sión, yi tapij cuꞌn solteꞌj, nin yi biꞌ jaluꞌ iꞌtz yi “Yi tnum tetz Luwiy”. 8 Ej nin te yi tiempaꞌtz yi na tzan kbal oyintziꞌ scyeꞌj yi eꞌ jebuseo, nin tal Luwiy scyetz yi eꞌ tetz sanlar: “¿At peꞌ eꞌ skaxoꞌl yi na chiꞌch chicꞌuꞌl scyeꞌj yi eꞌ jebuseo chi wutaneꞌn wetz? Ko at, tajweꞌn bin koꞌc tul yi beꞌ aꞌ yi na icyꞌ jakꞌ chitnumil tan kajeꞌn poneꞌn tul yi tnum. Baꞌn tzun kicyꞌseꞌ kacꞌuꞌl scyeꞌj yi eꞌ moyiꞌẍaꞌtz scyuchꞌ yi eꞌ coꞌxaꞌtz, yi chin juntlen nin tzinwutz,” stzun Luwiy. Chaꞌstzun te nin aꞌlchij yi xtxolbil: “Quiꞌc rmeril tan toqueꞌn jun coꞌx nka jun moyiꞌẍ le caꞌl Kataj.” 9 Yi wiꞌt cambal Luwiy yi juꞌwtzaꞌtz yi tapij cuꞌn solteꞌj, nin tzun oc biꞌ-tz yi tnum taꞌn tetz “Yi tnum tetz Luwiy”. Nin tzun bnix mas tapij taꞌn solteꞌj cyakil yi luwaraꞌtz yi na xeꞌt tzaj te yi jocoꞌj yi nojsij jalen te yi caꞌl tetz rey.
Yi cyoponeꞌn cobox ẍchakum Hiram swutz Luwiy
10 Ej wiꞌnin tzun jaleꞌn kꞌej Luwiy, tu ẍchamil. Nchaꞌtz ilen nin xomij Kataj teꞌj, yi Kataj Jehová yi cyaꞌl na xcyeꞌ quen teꞌj. 11 Chaꞌstzun te yi rey tibaj yi tnum Tiro yi na biꞌaj Hiram, nin tzun eꞌ opon cobox ẍchakum taꞌn swutz Luwiy scyuchꞌ cobox seꞌol tzeꞌ tu seꞌol cꞌub, nin cyꞌaꞌn xan tzeꞌ cyaꞌn, tan banleꞌn yi palacio tetz yi rey Luwiy. 12 Teleꞌn tzun xtxum Luwiytz tetz yi bintzij nin Ryos bixban iꞌ tetz rey tibaj Israel, nin yi ja takꞌ Kataj amaꞌl tan cawuneꞌn, nin tan quichꞌeyeꞌn yi eꞌ xonl Israel yi tanum Kataj.
Yi coboxt nitxajil Luwiy
13 I tzun te yi nsken wiꞌt opon Luwiy Jerusalén tan taꞌteꞌntz, nin tzun eꞌ oc coboxt txkel iꞌ-tz, nin nchaꞌtz coboxt xnaꞌn tetz txkel iꞌ taneꞌn, nin tzun eꞌ jal mas nitxajil scyeꞌjak. 14 Nin yi chibiꞌ yi eꞌ nitxajilaꞌtz yi eꞌ jal Jerusalén iꞌtz: Samúa, Sobab, Natán, Salomón, 15 Ibhar, Elisúa, Nefeg, Jafía, 16 Elisama, Eliada nin Elifelet.
Yi xcyeweꞌn Luwiy scyeꞌj yi eꞌ filistey
17 I tzun yi quibital yi eꞌ filistey yi nsken wiꞌt bixeꞌ Luwiy tetz rey cwent Israel, cyoponeꞌn tzun nil tircuꞌn eꞌ tan joyleꞌn iꞌ, poro nin nin tbit Luwiy yi cyajtzaꞌklaꞌtz nin tzun el tewal tib tul jun chin caꞌl yi cyaꞌl jun tzꞌocopon teꞌj. 18 Chibeneꞌn tzun yi eꞌ filistey ẍchiwutz, nin tzun chicambaj cyakil yi amaꞌl cwent Refaim. 19 Jakol tzun Luwiy tetz Kataj:
—Iluꞌ jun cꞌoloj Wajcaw ¿Baꞌn peꞌ kol chimben tan oyintziꞌ scyeꞌj yi eꞌ filisteyaꞌtz? ¿Stkꞌeꞌ peꞌuꞌ amaꞌl swetz tan intxꞌaconeꞌn scyeꞌj? chij iꞌ.
—Quiloꞌk tan oyintziꞌ scyeꞌj, nin swakꞌeꞌ amaꞌl tzatz tan axcyeweꞌn scyeꞌj, chij Kataj.
20 Choꞌn tzun toponeꞌn Luwiytz le luwar cwent Baal-perazim,a nin tul yi amaꞌlaꞌtz yaꞌstzun xcyeweꞌt iꞌ tan chixiteꞌn cuꞌn yi eꞌ filisteyaꞌtz. Chaꞌstzun te tlol iꞌ: “Chi na el cuꞌn jun chumam tzanlaꞌ yaꞌstzun chin tulej Kataj ẍchixoꞌl yi eꞌ incontr, na ja chinxcyeꞌ tan chixiteꞌn cuꞌn.”
Toqueꞌn tzun biꞌ yi amaꞌlaꞌtz tan Luwiy tetz Baal-perazim. 21 Nin yi eꞌ filistey cyaj cyen tuꞌ chicolil eꞌchk chiryosil yi banij quitaneꞌn, nin tzun eꞌ oc Luwiy scyuchꞌ yi eꞌ yaj yi xomcheꞌ teꞌj tan chimolcheꞌn cuꞌn tircuꞌn.
22 Poro nin eꞌ opon junt tir yi eꞌ filistey tan cambeꞌn cyakil yi ẍkꞌajlaj cwent Refaim. 23 Chaꞌstzun te jiloneꞌn junt tir Luwiy tetz Kataj tan jakleꞌn tajtzaꞌkl. Tzajeꞌn tzun tlol Ryos tetz:
—Baꞌnt cuꞌn quil cẍben ẍchiwutz cuꞌn tan oyintziꞌ scyeꞌj, ma na jatxwok cuꞌn itib tan itoqueꞌn solteꞌj yi amaꞌl kale ateꞌt nakajil eꞌchk wiꞌ tzeꞌ balsamo. 24 Nin yil tzitbitwoknin yi na ẍchꞌin cyekꞌekꞌ xoꞌlak eꞌchk xak tzeꞌ tetz wiꞌ balsamo chi jun cꞌoloj sanlar yi na chixon, kalenaꞌs tzun cxbenwok tan oyintziꞌ wutz chicoc, na yaꞌstzun techl yi bajẍchin tziwutz tan chibiyleꞌn cuꞌn yi eꞌ filistey.
25 I nin tzun tulej Luwiytz quib yi tal Kataj tetz, nin tzun eꞌ xcyeꞌ-tz tan chilajeꞌn len yi eꞌ filistey tul amaꞌl yi na xeꞌtij Gabaón jalen te yi cyoponeꞌn yi amaꞌl Gezer.