Yi cweꞌn biyij Is-boset
4
1 I tzun bantz yi tbital Is-boset yi nsken cuꞌ biyij Abner le tnum Hebrón, nin tzun saj jun chin xoꞌw teꞌj. Nchaꞌtz eꞌ ban cyakil yi eꞌ aj Israel, cyakil cunin eꞌ, eꞌ xob lentz. 2 Te yi tiempaꞌtz at tzun cob yaj, aj oyintziꞌinl yi ateꞌ jak caꞌwl Is-boset. Yi cob yajaꞌtz eꞌ len cuꞌn ajcaw scyeꞌj cob kꞌuꞌj sanlar yi ja chixcon tan majleꞌn eꞌchk takleꞌn scyeꞌj yi eꞌ wunak yi nkꞌeꞌtz eꞌ xonl Israel. Baana biꞌ jun nin Recab biꞌ yi junt. Yi cob yajaꞌtz eꞌ len cuꞌn cyꞌajl Rimón yi aj Beerot, nin eꞌ xonl kꞌajtzun Benjamín. 3 Nin yi tnum Beerot-tz choꞌn at cwent yi eꞌ xonl kꞌajtzun Benjamín. Na nsken wiꞌt cheꞌl ojk yi eꞌ xonl Beerotaꞌtz jalen Bitaim, kale najlcheꞌt chi awer nak taneꞌn jaluꞌ.4 Ma kꞌajtzun Jonatán yi cyꞌajl kꞌajtzun Saúl, at tzun jun cyꞌajl cyajnak cyen yi na biꞌaj Mefi-boset, yi at muꞌẍ yanaꞌsil te cabil tkan. Na te yi at tzaj tul oꞌ yob nintzun opon tziblal chiwiꞌ yi qꞌuicyꞌlom tetz, yi nsken cuꞌ biyij Jonatán tu taj le amaꞌl Jezreel. Beneꞌn tzun yi mos yi na tzan tan qꞌuicyꞌleꞌn yi niꞌaꞌtz tan xitxꞌleꞌn tzaj, nin tzun el ojktz tuchꞌ tan ew ib. Poro tan paj yi ojkeꞌl nin tzun el stzakpul yi niꞌ. Nintzun qꞌuixpij tkantz, nin oc cyentz tetz coꞌx.
5 Inti yi cob cyꞌajl Rimónaꞌtz yi aj Beerot, yi Recab tu Baana, nin tzun eꞌ bentz xe caꞌl Is-boset, nin tzun eꞌ opontz chajcuꞌn kꞌej, te yi oril yi wiꞌnin tzꞌaꞌ. Ma tetz Is-boset benak nin iꞌ-tz tan watl, na nsken wiꞌt wan. 6 Ma yi xnaꞌn yi qꞌuicyꞌlom tetz yi caꞌl, nintzun octz tan telseꞌn stzꞌisil muꞌẍ triw, poro tan paj tzꞌaꞌ, sajt quen tu watl. Nin tan yi xtxolbilaꞌtz eꞌ cyecyen tunin Recab tu yi titzꞌun Baana, nin cyaꞌl jun iꞌlon chiwutz yi cyocomponeꞌn kale na witeꞌt Is-boset. 7 Choꞌn tzun coylij Is-boset wi xtxꞌach le witbil yi cycomponeꞌn xe caꞌl. Nin tzun cuꞌ chibiyoltz, nin el chikuxul yi wiꞌ nin ben quicyꞌaltz. Ej nin baj cuꞌn akꞌbal cyaꞌn tan xoꞌn tul yi beꞌ yi na icyꞌ cuꞌn xlaj yi aꞌ tetz Jordán. 8 Na yi cyajbil iꞌtz tan takꞌleꞌn yi wiꞌ Is-boset tetz Luwiy, jalen Hebrón. Yi cyoponeꞌn nin tzun cyaltz:
—Iluꞌ jun cꞌoloj kajcawil, ja ul yi wiꞌ Is-boset kaꞌn, yi cyꞌajl kꞌajtzun Saúl yi contruꞌ banak, yi junaꞌtz yi joynak puntil tan biyleꞌn cunuꞌ. Poro yi jaluꞌ ja takꞌ Kataj Ryos amaꞌl tan ticyꞌsaluꞌ cꞌuꞌluꞌ te kꞌajtzun Saúl scyuchꞌ yi eꞌ xonl iꞌ, cheꞌch bantz.
9 —Sak cuꞌn swutz Kataj Ryos yi Ryos yi itzꞌ nin tetz, yi jun yi ja chinclax taꞌn tkꞌab eꞌchk sotzaj cꞌuꞌlal, sak cuꞌn swutz iꞌ yi cxelponwok cuꞌn swutz waꞌn. 10 Na at tzaj jun yaj yi opon tzinwutz le tnum Siclag tan talcheꞌn yi nsken quim yi rey Saúl. Le wutz tetz tajtzaꞌkl yi iꞌtz jun balaj tziblal yi chintzatzink teꞌj, nin lwakꞌ jun oy tetz. Poro qui nin el xtxum iꞌ, yi ko squimok waꞌn tan yi tziblal yi ul taꞌn tan paj yi mbi mban iꞌ. 11 Nin iteꞌn nin tzimbneꞌaꞌs tziteꞌj. Na chin juntlen nin ban itajtzaꞌkl, na yi yaj yi nquim itaꞌn quiꞌc tetz til. Nin choꞌn coylij tan ujleꞌn wi soc xe yi tetz caꞌl. Chaꞌstzun te tajweꞌn cuꞌn cxelponwok cuꞌn swutz. Tzichojeꞌ itil tan paj yi ncuꞌ ibiyol Is-boset.
12 Cawuneꞌn nin tzun Luwiy scyetz yi eꞌ wiꞌtz cyajcawil yi eꞌ sanlar yi ateꞌ jakꞌ caꞌwl iꞌ tan chibiyleꞌn cuꞌn. Yi chiquimeꞌn nintzun el chicꞌaplul chikꞌab tu quikan, nin jeꞌ chꞌimbaꞌntz nakaꞌjil yi pilaꞌil aꞌ yi at le tnum Hebrón. Ma yi wiꞌ Is-boset choꞌn tzun cweꞌn chimukultz kale mukxnakeꞌt yi wankil kꞌajtzun Abner le tnum Hebrón.