3
1 Nim tiemp ban yi oyintziꞌ ẍchixoꞌl yi eꞌ xonl Luwiy tu yi eꞌ xonl kꞌajtzun Saúl, nin te yi teleꞌn tiemp wiꞌnin jaleꞌn chichamil yi eꞌ tu Luwiy, ma tetz kꞌajtzun Saúl wiꞌnin teleꞌn chichamil.Yi eꞌ xonl Luwiy
2 Je chibiꞌ yi eꞌ nitxajil Luwiy eꞌ jal te yi ateꞌ pon Hebrón: Yi bajx cyꞌajol na biꞌaj Amnón, tal yi txkel iꞌ yi na biꞌaj Ahinoam yi aj Jezreel. 3 Yi caꞌp na biꞌaj Quileab, tal Abigail yi txkelbeꞌn kꞌajtzun Nabal yi aj Carmel. Yi toxiꞌn na biꞌaj Absalom tal Maaca yi meꞌl Talmai, yi rey cwent Gesur. 4 Yi cyajiꞌn na biꞌaj Adonías, tal Haguit. Yi toꞌiꞌn na biꞌaj Sefatías tal Abital. 5 Yi kakiꞌn cyꞌajl na biꞌaj Itream, tal Egla, yi iꞌtz junt txkel Luwiy. Cyakil yi eꞌ cyꞌajolaꞌtz choꞌn quitzꞌeꞌn Hebrón yi tnum kale najeweꞌt Luwiy.
Yi xomeꞌn wiꞌ Abner te Luwiy
6 Ej i tzun te yi na tzan cyen cunin yi oyintziꞌ ẍchixoꞌl yi eꞌ tu Is-boset yi cyꞌajl kꞌajtzun Saúl scyuchꞌ yi eꞌ tu Luwiy, jaleꞌn nin tzun ban mas kꞌej Abner ẍchixoꞌl yi eꞌ yi xomij chiwiꞌ te Is-boset. 7 At tzun jun xnaꞌn yi iꞌtz caꞌp txkel Saúl taneꞌn, yi na biꞌaj Rizpa, meꞌl Aja, nin tzun witbej tib Abner tu jun xnaꞌnaꞌtz. Tan yi xtxolbilaꞌtz nin tzun oc Is-boset tan yajleꞌn:
—¡Nxac mawitbej awib tu yi caꞌp txkel taneꞌn kꞌajtzun intaj! chij iꞌ.
8 Sajeꞌn tzun colpuj wiꞌ Abner tan yi yol yi tal Is-boset tetz:
—¡Ẍeꞌn tzun! ¿In ptzun jun taꞌkl txꞌiꞌ, yi na xcon scyetz yi eꞌ aj Judá? Yi in wetz ja wakꞌ wib tan inxconeꞌn jakꞌ caꞌwl ataj. Nin ja wakꞌ chikꞌej yi eꞌ tetz tamiw. Nin quinin ncẍben injatxol tkꞌab Luwiy. Ma jaluꞌ, ja cẍuꞌl tan talcheꞌn swetz yi ja injuch wil teꞌj jun xnaꞌn tuꞌ. 9 Nink tzꞌoc Kataj tan incawseꞌn cunin ko quil noꞌc tan ẍchꞌeyeꞌn Luwiy tan toqueꞌn cyen tetz rey chi sukiꞌnt tan Ryos tetz. 10 Na alijt cyen tan Ryos tan teleꞌn majij yi caꞌwl tkꞌab Saúl scyuchꞌ yi eꞌ tetz xonl, nin tan takꞌleꞌn yi caꞌwl tkꞌab Luwiy tan cawuneꞌn tibaj Israel nin Judá tul yi amaꞌl cwent Dan jalen cweꞌn tziꞌn te yi amaꞌl cwent Beerseba, stzun Abner bantz.
11 Quiꞌct nin tzun jun yol tal Is-boset tetz Abner, na wiꞌnin xobeꞌn iꞌ tetz. 12 Ma tetz Abner nin tzun eꞌ ben cobox chakum taꞌn tan talcheꞌn yi xtxolbileꞌj tetz Luwiy: “¿Naꞌ scyetz taw cyakil katanum? Wetz peꞌ, nko atz. Baꞌnt cuꞌn kaban jun trat: tzinjoyeꞌ puntil bantz cyoqueꞌn cyakil yi eꞌ xonl Israel jakꞌ caꞌwluꞌ,” chij Abner bantz, tan cyalol yi eꞌ chakum tetz Luwiy.
13 Ma tetz Luwiy i tzun tal: “Baꞌn lbixeꞌ jun trat skaxoꞌl tzawuchꞌ poro kol tzacyꞌaj tzaj Mical, yi meꞌl kꞌajtzun Saúl, swetz. Ko quiꞌ baꞌnt cuꞌn quil tzachajuꞌl awib tzinwutz,” chij Luwiy. 14 Nchaꞌtz nin eꞌ ben cobox chakum tan Luwiy tan yol tetz Is-boset: “Tzꞌulkeꞌn junt tir yi wuxkel awaꞌn, yi Mical, na quimnakeꞌ jun cient filistey waꞌn tan toqueꞌn tetz wuxkel,” chij Luwiy.
15 Cawuneꞌn tzun Is-boset tan teleꞌn majij Mical tetz Paltiel, yi cyꞌajl Lais. 16 Poro yi Paltiel, nin xom nin wutz coc nin wiꞌnin tokꞌeꞌn jalen yi cyoponeꞌn le aldey Bahurim. Nin tzun cawun Abner tetz Paltiel tan pakxeꞌn.
17 Ej jiloneꞌn tzun Abner scyetz yi eꞌ wiꞌ banl wiꞌ cwent Israel: “Ja el nimix tiemp cyanuꞌ tan joyleꞌn puntil tan bixeweꞌn Luwiy tetz kareyil. 18 Ma jaluꞌ ja bin opon tiempil tan kabnol taneꞌn, na sukiꞌnt tan Kataj Ryos yi tzꞌocpon cyen Luwiy tetz wiꞌtz kareyil nin xcyek iꞌ tan kacolpeꞌn jakꞌ chicaꞌwl yi eꞌ filistey nin jakꞌ chicaꞌwl yi eꞌ mas kacontr,” stzun Abner bantz scyetz.
19 Nchaꞌtz nin jilon Abner scyetz cyakil yi eꞌ xonl kꞌajtzun Benjamín, nin tzun icyꞌtz tan tponeꞌn jalen Hebrón tan talcheꞌn tetz Luwiy yi mbiꞌtz na chitxum cyakil yi eꞌ aj Israel nin yi mbiꞌtz na chitxum cyakil yi eꞌ xonl kꞌajtzun Benjamín. 20 Junak tzun yaj xomcheꞌ te Abner yi toponeꞌn jalen Hebrón, kale najleꞌt Luwiy, nin tzun bnix jun chin waꞌaꞌn tan Luwiy scyuchꞌ cyakil yi eꞌ yi xomcheꞌ te Abner. 21 I tzun tal Abnertz tetz Luwiy:
—Ma jaluꞌ, naꞌjeꞌn, na chin tajweꞌn cunin yil chimben tan chimolcheꞌn cuꞌn cyakil yi eꞌ aj Israel, tan bnixeꞌn jun trat cyaꞌn tu yi wiꞌtz cyajcawil tan toqueꞌn cyenuꞌ tetz chireyil bantz cawuneꞌnuꞌ, quib yi cyetz cyajbil, chij Abner bantz tetz Luwiy.
Tzatzin cuꞌn chijatxol quib Luwiy tu Abner. Wiꞌnin tzatzineꞌn Abner yi pakxeꞌnt.
Yi quimeꞌn Abner tan Joab
22 Ej i tzun bantz nin tzun opon Joab scyuchꞌ yi eꞌ yi xomij chiwiꞌ te Luwiy, choꞌn eꞌ xaꞌkeꞌn tan majleꞌn eꞌchk takleꞌn yi eꞌ xcyeꞌ tan cambeꞌn scyeꞌj chicontr. Nimix nin tzun sken cyaj cyen yi tnum Hebrón tan Abner. Nin quiꞌc na bislej iꞌ jetz yi teleꞌn tzaj Luwiy tan takꞌleꞌn iꞌ tbeꞌ. 23 Ma yi cyoponeꞌn Joab le tnum scyuchꞌ cyakil yi eꞌ tetz sanlar, nin tzun tbit iꞌ yi nsken xaꞌk tzaj Abner yi cyꞌajl Ner, tan yol tetz Luwiy. Nin watok cuꞌn nchijatx quib, nin wiꞌnin tzatzineꞌn Abner yi pakxeꞌn. 24 Toponeꞌn tzun balkꞌuj Joab swutz yi rey Luwiy, i tzun taltz:
—¡Iluꞌ jun cꞌoloj kareyil! ¿Mbi ncuꞌ nucꞌuluꞌ? Na ja wit yi ja ulak nin Abner tan yol teruꞌ. ¿Nxac ntakꞌuꞌ amaꞌl tetz tan teleꞌn liwr? 25 ¿Qui peꞌ na el xtxumuꞌ tetz yi Abner yi cyꞌajl Ner, ntin ja ulak tan talcheꞌn laꞌjil teruꞌ nin tan xkꞌukeꞌnuꞌ, nin tan tilweꞌn yi mbi cuꞌn na tzanuꞌ tan banleꞌn? chij Joab tetz rey Luwiy.
26 Yi teleꞌn tzaj Joab tan yol tetz Luwiy, nin tzun eꞌ ben ẍchakol cobox ẍchakum tan stzꞌamleꞌn Abner. Choꞌn tzun stzꞌamleꞌn cyaꞌn kale atit yi julil aꞌ Sira. Nin pakxij cyaꞌn junt tir Hebrón. Ma Luwiy qui sak swutz mbi mbajij. 27 Yi toponeꞌn Abner, nin tzun ben tcyꞌal Joab iꞌ xlaj yi puertil yi tnum tan chijiloneꞌn chichuc cuntuꞌ taneꞌn. Na chijilon cuꞌntz yi beneꞌn kopol Joab jun cchiluꞌ le cꞌuꞌl Abner nin quimtz. Yaꞌstzun yi ticyꞌsal Joab cꞌuꞌl te Abner tan paj yi quimeꞌn Asael yi titzꞌun taꞌn. 28 Ma yi tbital Luwiy yi mbi cuꞌn bajij, nintzun tal: “Jun cuꞌn yol sak swutz Kataj Ryos yi quiꞌc ketz kapaj scyuchꞌ yi eꞌ yi na chicawun tzinxlaj te yi jun quimichilaꞌtz yi mban, na nkꞌeꞌtz oꞌ mbiyon cuꞌn Abner yi cyꞌajl Ner. 29 ¡Yi mero aj paj iꞌtz Joab! Nink tzꞌoc cunin cawseꞌn iꞌ tuml yi najal. Nin cyakil cunink yi eꞌ xonl yi xomt cheꞌ tzaj, nink chitij yi jun jilwutz quimichilaꞌtz. Nink chiyobtij tan lepra. Nink choꞌc tetz coꞌx. Nink chicuꞌ biyij. Nink chitij weꞌj,” chij Luwiy bantz.
30 Eꞌ Joab tu Abisai eꞌ biyon cuꞌn Abner, na tul yi oyintziꞌ yi bajij Gabaón nin cuꞌ biyol Abner yi quitzꞌun yi na biꞌaj Asael.
31 Nin tzun el jun caꞌwl tan Luwiy, scyetz Joab scyuchꞌ cyakil yi eꞌ yi xomcheꞌ teꞌj: “Ritꞌwok cuꞌn beꞌch itetz, nin tzꞌoken beꞌch iteꞌtz yi chintzolon nin, nin bisunwok tan yi quimich yi mban Abner,” chij. Ej nin xom nin yi rey Luwiy wutzcoc yi ekbil almaꞌ yi eꞌ beneꞌn tan mukleꞌn wankil Abner. 32 Choꞌn tzun mukxeꞌn cyaꞌn le tnum Hebrón. Nin tzun okꞌ rey Luwiy. Wiꞌnin ẍchꞌineꞌn tan oꞌkl swutz yi nichil Abner. Nchaꞌtz cyakil wunak eꞌ okꞌ lentz. 33 Nin je tal yi rey Luwiy tul yi chunaꞌn yi ban iꞌ:
¡Abner! yi quimichil yi nnojquen tzawutz chin txꞌixwil nin.
¿Ẍeꞌn mban yi mawakꞌ awib tkꞌab jun chin biyol nakaꞌtz?
¡Lastum! Ja cẍeꞌl cuꞌn swutz chi na quim jun yaj ẍchikꞌab yi eꞌ yi chin txuc nin cyajtzaꞌkl. 34 Ja cẍsotz yaj, wech na qui cꞌalij cheꞌ akꞌab, nin qui cꞌalij cheꞌ awukan tan caren.
¡Ja cẍquim chi na quim jun ẍchikꞌab biyol nak yi chin juntlen nin cyajtzaꞌkl! stzun yi rey Luwiy bantz tul yi chunaꞌn.
Nchaꞌtz wiꞌnin cyokꞌeꞌn yi eꞌ wunak bantz. 35 Nin tzun cuꞌ chiwutz cyakil tetz Luwiy tan waneꞌn muꞌẍ tal te ntaxk oc akaleꞌn, poro bixeꞌ jun yol taꞌn:
—¡Nink tzꞌok Kataj Ryos tan incawseꞌn cunin, kol baj jun piẍ pam waꞌn nka alchok takleꞌnil te ntaxk cuꞌ kꞌej! chij iꞌ.
36 Cyakil cunin tzun eꞌ wunak el chitxumtz tetz yi bis yi at cuꞌnt yi rey Luwiy, nin baꞌn ban ẍchiwutz yi xtxolbilaꞌtz, na cyakil yi mbi cuꞌn na ban yi rey, tircuꞌn wunak na chitzatzin len teꞌj. 37 Te jun kꞌejaꞌtz cyakil yi eꞌ xonl Israel el chitxum tetz yi nkꞌeꞌtz Luwiy biyon cuꞌn nka txumul tetz tan biyleꞌn cuꞌn Abner yi cyꞌajl Ner.
38 Beneꞌn tzun tlol yi rey scyetz yi eꞌ wiꞌtz ajcaw yi ateꞌ jakꞌ caꞌwl:
—Sak ẍchiwutzuꞌ yi jaluꞌ ja quim jun chin wiꞌtz ajcaw skaxoꞌl ketz yi oꞌ xonl Israel, nin iꞌtz jun chumbalaj yaj. 39 Bintzij, in yi rey yi txaꞌij chint tan Ryos. Poro jaluꞌ qui na pujx waꞌn mbil tzimban scyeꞌj yi eꞌ tal wanub Sarvia-aꞌtz,a yi ntin biyol nakiꞌn cyaꞌn. Qui na nimsaj incꞌuꞌl tan banleꞌn taneꞌn. ¡Nink tzꞌoc Kataj Ryos tan chicawseꞌn cunin yi eꞌ yi mbnon yi jun ajtzaꞌklaꞌtz, yi chin juntlen nin!