Yi toqueꞌn Luwiy tetz rey cwent Judá
2
1 Ej i tzun yi bajeꞌn wiꞌ yi jun chunaꞌnaꞌtz, nin tzun jak Luwiy tajtzaꞌkltz tetz Kataj:—Iluꞌ jun cꞌoloj Wajcaw, ¿Tajweꞌn peꞌ tan imbeneꞌn le jun tnum cwent Judá? chij Luwiy.
—Tajweꞌn tan abeneꞌn, chij Kataj.
—Wajcaw, ¿mbi tnumil cwent Judá nchimbeneꞌt? chij Luwiy.
—Tajweꞌn tan abeneꞌn Hebrón, chij Kataj bantz tetz.
2 Chibeneꞌn tzun Luwiytz scyuchꞌ yi cob txkel, Ahinoam yi aj Jezreel tu Abigail, yi txkelbeꞌn kꞌajtzun Nabal yi aj Carmel. 3 Nchaꞌtz nin eꞌ ben tcyꞌal yi eꞌ tamiw yi ilen nin xomcheꞌ teꞌj, scyuchꞌ chinajal. Choꞌn tzun cyoponeꞌntz tan chinajaneꞌn le tnum Hebrón. 4 Nin tzun opon chimolol quib cyakil yi eꞌ yaj yi eꞌ aj Judá le tnumaꞌtz, nintzun bixeꞌ Luwiytz cyaꞌn tetz chireyil.
Yi tbital Luwiy scyetz yi eꞌ wunak, yi iꞌtz yi eꞌ aj Jabes cwent Galaad mukun yi wankil kꞌajtzun Saúl, 5 nin tzun eꞌ ben cobox chakumtz taꞌn tan talcheꞌn scyetz yi eꞌ aj Jabes: “Takꞌ tzaj Kataj wiꞌnin banl talmaꞌ squibuꞌ, na yi eꞌ cyeruꞌ ja chimukuꞌ wankil kꞌajtzun kareyil. 6 Nchaꞌtz nink tzꞌoc Kataj tan chiqꞌuicyꞌleꞌnuꞌ nin quiꞌk cheꞌluꞌ teꞌj cꞌuꞌl iꞌ. Ma yi in wetz ilen nin quil cheꞌluꞌ te incꞌuꞌl, nin ilen nin tzimbneꞌ jun baꞌn scyeruꞌ, na chumbalaj nin yi cyajtzaꞌkluꞌ yi nchimukuꞌ yi wankil kꞌajtzun kareyil. 7 Poro quiwit, quil chibisunuꞌ, quiꞌc na ban ko ja quim yi rey Saúl. Na yi eꞌ aj Judá ja wiꞌt noꞌc cyakꞌun tetz wiꞌtz chireyil,” stzun Luwiy bantz scyetz yi eꞌ chakum tan chitxolil scyetz yi eꞌ aj Jabes.
Yi oyintziꞌ yi jal ẍchixoꞌl yi eꞌ aj Israel scyuchꞌ yi eꞌ aj Judá
8 I tzun bantz yi Abner cyꞌajl Ner yi wiꞌtz cyajcawil yi eꞌ sanlar kꞌajtzun Saúl, nin tzun ben tcyꞌal iꞌ yi Is-boset, yi cyꞌajl kꞌajtzun Saúl le tnum Mahanaim. 9 Choꞌn tzun bixeweꞌntz taꞌn tetz rey cwent Gesuri, Jezreel, Efraín, Benjamín nin cwent tircuꞌn Israel. 10 At tzun Is-boset tul caꞌwunak yob yi xeꞌteꞌntz tan cawuꞌn cwent Israel, nin cob yob ban iꞌ tan cawuꞌn. Ma yi eꞌ xonl kꞌajtzun Judá yi cyetz chireyil bantz iꞌtz Luwiy. 11 Juk tzun yob tu kak xaw ban Luwiy tan cawuꞌn cwent Judá, nin yi bajx tnum kale najeweꞌt iꞌ tan cawuꞌn iꞌtz Hebrón.
12 Ej nin tzun eꞌ eltzaj Abner le tnum Mahanaim tan cyoponeꞌn le tnum Gabaón, na iꞌ yi wiꞌtz bajxom squibaj yi eꞌ sanlar cwent Is-boset, yi rey tetz Israel. 13 Ma tetz Joab yi aj Judá, tal Sarvia, nin eꞌ eltzajtz le tnum Hebrón na iꞌ yi wiꞌtz bajxom squibaj yi eꞌ sanlar cwent rey Luwiy. Choꞌn tzun chicꞌulul quibtz kale atit jun cuꞌlbil aꞌ cwent Gabaón. Choꞌn tzun baj cweꞌn chinucꞌul quibtz tan oyintziꞌ, jun txꞌakaj le jun xlaj yi cuꞌlbil aꞌaꞌtz, ma junt txꞌakaj le jalajt. 14 Nin tzun tal Abner jun xtxolbil tetz Joab:
—Quiꞌ peꞌ atz yil chicyꞌ tzaj yi eꞌ acꞌajeꞌt tan oyintziꞌ skawutz, chij iꞌ.
—Baꞌn atit, chij Joab.
15 Ej chaꞌstzun te ẍchixoꞌl yi eꞌ sanlar cwent Benjamín tu Is-boset yi cyꞌajl kꞌajtzun Saúl, nin eꞌ icyꞌ coblaj chakum cyaꞌn ẍchiwutz. Nchaꞌtz eꞌ ban yi eꞌ sanlar yi ateꞌ jak caꞌwl Luwiy, nin eꞌ icyꞌ coblaj chakum cyaꞌn ẍchiwutz. 16 Chicyakil cunin tzun yi eꞌ chakumaꞌtz eꞌ ben niltz tan chitzꞌamleꞌn chicontr. Itzun xiꞌil chiwiꞌ chicontr txꞌamx cyaꞌn, jujun chan te jujun. Nin ben chikopol chispartz jak cyempl. Nin tan yi xtxolbilaꞌtz cyakil yi eꞌ chakumaꞌtz eꞌ quim lentz. Chaꞌstzun te nin oc biꞌ yi jun luwaraꞌtz tetz Helcat-hazurima, cwent Gabaón. 17 Chin xoꞌwbil nin ban yi oyintziꞌaꞌtz tul yi jun kꞌejaꞌtz, na nin tzꞌakon Abner scyuchꞌ cyakil yi eꞌ sanlar cwent Israel, cyakꞌun yi eꞌ sanlar Luwiy yi eꞌ aj Judá. 18 Xomcheꞌ yi ox tal Sarvia le oyintziꞌaꞌtz yi na chibiꞌaj: Joab, Abisai tu Asael. Yi Asaelaꞌtz elnak nin tcyaꞌj, chi na ojkel jun masat xoꞌl chꞌim. 19 Beneꞌn tzun xomok iꞌ-tz wutz coc Abner tan stzꞌamleꞌn kloꞌ. Qui nin takꞌ iꞌ amaꞌl tetz tan teleꞌn ojkuj. 20 Ma yi xmayineꞌn tzaj Abner wutz coc, nin tzun taltz:
—¡Aẍ bin loꞌ aꞌtz Asael! chij Abner.
—¡Inaꞌtz! chij iꞌ.
21 Sajeꞌn tzun tlol Abner:
—Quiꞌt cxom tzaj wutz incoc tan intzꞌamleꞌn. Baꞌnt cuꞌn joyaj puntil tan stzꞌamleꞌn jun inchakum nin majlen yi eꞌchk takleꞌn yi cyꞌaꞌn taꞌn, chij Abner.
Poro yi Asael, quinin cutzaj xtxumuꞌn, ma nin xom nin tan stzꞌamleꞌn kloꞌ Abner. 22 Sajeꞌn tzun tlol junt tir Abner:
—¡Qui na waj yil cxom tzaj tan intzꞌamleꞌn, ko quiꞌ atz cxeꞌlpon cuꞌn waꞌn swutz! Nin kol cxquim waꞌn quil tzatzin yi awutzicy Joab sweꞌj, chij Abner.
23 Poro tan paj yi quinin oc yol Abner te wiꞌ Asael, sajeꞌn tzun xuyul Abner yi wiꞌ yi tetz lans wutz cꞌuꞌl Asael. Cyecyen tunintz twankil Asael nin elpon wutz coc. Choꞌn nin quimeꞌn cyentz kale cweꞌt trimp. Nin cyakil yi eꞌ yi xomcheꞌ tzaj nin tzun na chitxcyeꞌ cuꞌntz tan xmayeꞌn yi wankil Asael yi nsken quim. 24 Ma yi eꞌ stzicy Asael yi Joab tu Abisai, qui nin tzun eꞌ txcyeꞌ cuꞌn, ma na nin eꞌ xom nin tan stzꞌamleꞌn Abner. Nsken cuꞌ kꞌej yi cyoponeꞌn wi juꞌwutz Ama, yi at swutzoꞌc tzaj yi tnum Gía, tul yi beꞌ yi na ben le amaꞌl yi tzꞌinunin tuꞌ cwent Gabaón. 25 Choꞌn tzun chimolol quib yi eꞌ aj Benjamín scyuchꞌ Abner wi jun juꞌwutz, nin junit kꞌuꞌj eꞌ bantz tan chibnol list quib tan oyintziꞌ junt tir. 26 Ẍchꞌineꞌn tzaj tzun Abner scyetz Joab:
—¿Qui poloꞌ tzaj yi jun oyintziꞌaꞌtz yi at skaxoꞌl? ¿Qui peꞌ na el atxum tetz yi jun ajtzaꞌklaꞌtz ntin stkꞌeꞌ wiꞌnin bis oꞌkl sketz kacyakil cuꞌn? ¡Baꞌnt cuꞌn alaj scyetz yi eꞌ yi xomcheꞌ tzaweꞌj tan quiꞌt cyoqueꞌn tan chibiyleꞌn cuꞌn chixonl! chij Abner ban tzajtz.
27 Beneꞌn tzun stzaꞌwel Joab:
—Jun cuꞌn yol na wal nin tzatz tan biꞌ Kataj Ryos, yi quiꞌk nsaj awalol yi xtxolbilaꞌtz, ja kloꞌ chixeꞌtij yi eꞌ insanlar tan chibiyleꞌn cuꞌn yi eꞌ katanum jalen cuꞌn kloꞌ yil tzꞌul skil eklen, chij Joab.
28 Cawuneꞌn tzun iꞌ-tz tan cweꞌn eꞌchk chun, tan makleꞌn chiwutz yi eꞌ sanlar tan chitaneweꞌn tan oyintziꞌ. Quiꞌt tzun eꞌ ben xomoktz tan chibiyleꞌn cuꞌn yi eꞌ aj Israel. 29 Ma tetz Abner tan pakxeꞌn jalen Mahanaim nin tzun eꞌ xon tul jun akꞌbalaꞌtz cyakil yi amaꞌl cwent Arabá. Nin ja xcon eꞌchk kꞌab beꞌ cyaꞌn yi na icyꞌ cuꞌn wi aꞌ Jordán. Nchaꞌtz eꞌ icyꞌ cwent Bitrón, kalenaꞌs tzun cyoponeꞌntz le cyetz chiꞌamaꞌl, Mahanaim.
30 Nchaꞌtz Joab quiꞌt oc chꞌinchꞌuj tan stzꞌamleꞌn Abner, nin tzun octz tan chijutzꞌeꞌn cuꞌn yi eꞌ tetz sanlar, nin octz tan cyajleꞌn. Kalenaꞌtz tzun yi lajluchaxeꞌn yi eꞌ quim wajxaklaj wiꞌtz ajcaw yi ateꞌ jakꞌ caꞌwl Luwiy tuml yi Asaelaꞌtz. 31 Ma yi eꞌ yi xomij te Luwiy, ja lajluchax ẍchiwutz yi eꞌ quim ox cient tu ox cꞌal xonl kꞌajtzun Benjamín cyaꞌn, tuml yi eꞌ yi xomcheꞌ te Abner. 32 Ej ma wankil Asael, nin ben ticyꞌleꞌn jalen Belén, nin choꞌn mukxeꞌntz kale mukxeꞌt yi kꞌajtzun taj. Ma Joab scyuchꞌ yi eꞌ yaj yi xomcheꞌ teꞌj, baj cuꞌn tzun akꞌbaltz cyaꞌn tan xoꞌn, nsken ul skil yi cyoponeꞌn Hebrón.