CAꞌP SAMUEL
Yi tponeꞌn stziblal twiꞌ Luwiy yi nsken quim yi rey Saúl
1
1 I tzun bantz te yi nsken wiꞌt quim Saúl, nin te yi nsken xcyeꞌ Luwiy scyuchꞌ yi eꞌ sanlar tan chixiteꞌn cuꞌn yi eꞌ amalecita, nintzun eꞌ pakxij junt tir le tnum Siclag tetz cobox kꞌej. 2 Ma le toxiꞌn kꞌej, nin tzun opon jun yaj yi nternin katzaꞌlt yi beꞌch tetz, nin chin puklajt nin xoꞌl wiꞌ tan ẍchajleꞌn yi wiꞌnin na bisun. Yi jun yajaꞌtz choꞌn teleꞌn ojkuj le amaꞌl kale ateꞌ pont Saúl scyuchꞌ yi eꞌ sanlar. Nin yi toponeꞌn swutz Luwiy nin tzun cuꞌ mejloktz jalen yi cweꞌn pon yi wiꞌ wuxtxꞌotxꞌ, tan takꞌleꞌn kꞌej Luwiy.3 —¿Yaj, naꞌ ncẍsiteꞌt? chij Luwiy tetz.
—Yi in wetz ja neꞌl tzaj colpuj le kacampament yi oꞌ xonl Israel, chij yi yajaꞌtz.
4 —¡Poro altzaj swetz yi mbiꞌtz mbajij! Txol tzaj swetz, chij Luwiy.
—Yi xtxolbil iꞌtz, yi ja keꞌl ojkuj ẍchiwutz kacontr le oyintziꞌ, nin wiꞌnin almaꞌ mban. Ej nin ja cheꞌl cuꞌn rey Saúl swutz, tu Jonatán yi cyꞌajl, chij yi yajaꞌtz.
5 —Poro ẍeꞌn na el atxum tetz yi ko ja wiꞌt chiquim Saúl tu Jonatán, chij Luwiy tetz yi yaj.
6 —Yi mero puntil iꞌtz atin cunin wetz wi yi juꞌwtz Gilboa, yi mbeneꞌn wilol yi na xcon yi lans Saúl taꞌn tetz xtxꞌamij. Nin txant tan cyoponeꞌn yi eꞌchk careꞌt tetz oyintziꞌ cwent yi eꞌ filisteyaꞌtz scyuchꞌ yi eꞌ yi xoꞌn cuntuꞌ quitaneꞌn tan stzꞌamleꞌn iꞌ. 7 Te yi jun tkujaꞌtz nin tzun xmayin tzaj iꞌ-tz wutz coc, nin chinsaj chakoltz. Ja tzun nopontz teꞌj tan ẍchꞌeyeꞌn kloꞌ. 8 Nintzun njak iꞌ swetz yi naꞌ scyetz in, nintzun wal tetz yi in jun amalecita. 9 Talol tzuntz swetz: “Banaj pawor tan imbiyleꞌn cuꞌn na chin qꞌuixcꞌuj nin atin cuꞌnt, nin iẍnin itzꞌineꞌt,” stzun iꞌ bantz swetz.
10 Ej nin tzun ncuꞌ imbiyoltz, na tech cuꞌn tib yi quiꞌt tzꞌitzꞌij. Nin tzun meꞌl incyꞌal yi coron yi ateꞌn teꞌj wiꞌ tu yi jun yubel yi at cuꞌn skul kꞌab, tan wakꞌol teruꞌ, iluꞌ jun cꞌoloj wajcawil,a chij yi amalecitaꞌtz bantz tetz Luwiy.
11 Ej cweꞌn tzun ritꞌol Luwiy yi beꞌch tetz tan paj bis oꞌkl. Nchaꞌtz eꞌ ban yi eꞌ yi xomcheꞌ teꞌj. 12 Wiꞌnin oꞌkl nin wiꞌnin chunaꞌn bajij yi quibital yi nsken wiꞌt quim Saúl tu Jonatán yi cyꞌajl. Nin yi nsken wiꞌt cheꞌl cuꞌn yi eꞌ sanlar tetz Israel swutz, yi eꞌ sanlar tetz Ryos. Wiꞌnin tzun chibisuneꞌn nin mucꞌ Luwiy weꞌj jalen yi toqueꞌn akaleꞌn te jun kꞌejaꞌtz tan paj yi mbi cuꞌn bajij te Saúl tu Jonatán. 13 Jakol tzun Luwiy tetz yi jun xicyaꞌtz yi oponsan rason twiꞌ iꞌ:
—Yi aẍatz ¿naꞌ ncẍsiteꞌt? chij Luwiy.
—Yi in wetz in jun awer nak ẍchixoꞌluꞌ, in jun amalecita, chij yi chakum.
14 —¡Nxac manimsaj awib tan biyleꞌn cuꞌn yi yaj yi bixbaꞌnt tan Ryos tetz rey! chij Luwiy.
15 Sajeꞌn tzun ẍchakol Luwiy jun scyeri eꞌ yi ateꞌ jakꞌ caꞌwl, nin tzun cawunintz tetz:
—¡Biy cuꞌn yi juneꞌj! chij.
—Aẍteꞌn aj paj te yi cẍcupon biyij, na ja awal tan atziꞌ yi aẍteꞌn mbiyon cuꞌn yi kareyil, yi txaꞌijt tan Ryos, chij Luwiy bantz.
Yi chunaꞌn tu yi oꞌkl yi bajij tan paj chiquimeꞌn Saúl tu Jonatán
17 Ma Luwiy, nintzun tzaj buꞌk jun bitz tetz talmaꞌ yi cyaꞌn chunaꞌn taꞌn, tan paj yi nsken chiquim Saúl tu Jonatán yi cyꞌajl. 18 Nintzun cawun Luwiy tan toqueꞌn chichusleꞌn yi eꞌ aj Judá, tan taꞌweꞌn yi jun bitzaꞌtz yi cyaꞌn chunaꞌn taꞌn. Ej nin yi jun bitzaꞌtz yi na biꞌaj “Yi cꞌoxol flech”, choꞌn tzꞌibaꞌn cyen tul yi liwr yi na biꞌaj “Justo”.b
19 “¡Cyakil yi oꞌ xonl Israel, ja el kakꞌej wiꞌwtz xoꞌl wutz! Wech na at eꞌ yi chin cham nin eꞌ tan oyintziꞌ, poro ja cheꞌl cuꞌn swutz.
20 Cyaꞌl ben tan xtxoleꞌn scyetz yi eꞌ filistey le tnum Gat nin cyaꞌl tzꞌoc tan xtxoleꞌn tulak eꞌchk beꞌ le tnum Ascalón, bantz quil chitzatzin yi eꞌ xnaꞌn filistey, bantz quil chitzꞌitpun tan tzatzin na yi eꞌaꞌtz, quiꞌc Ryos tetz cyalmaꞌ.
21 ”Quiꞌtk cuꞌ jun tzꞌujeꞌ aꞌbal wiꞌak yi eꞌchk juꞌwtzaꞌtz cwent Gilboa, nin quiꞌtk cuꞌ kꞌab cheꞌw tibaj, na yi jun amaꞌlaꞌtz iꞌtz jun amaꞌl tetz quimichil. Na tul yi jun amaꞌlaꞌtz ja baj chiyakꞌpul kacontr yi makbil chiflech yi eꞌ yi chin cham nin tan oyintziꞌ Na tul yi jun amaꞌlaꞌtz ja tzꞌilin yi makbil flech Saúl, nin quiꞌt na txekun tan paj yi yakꞌpeꞌn tetz.
22 ”Yi na chipakxtzaj Saúl tu Jonatán tul jun oyintziꞌ, ilenin nojnak ẍchꞌel tu xepuꞌil chiwankil chicontr te chispar nin teꞌjak chiflech. Wech yi eꞌ contraꞌtz, chin wiꞌtz aj biyonl nin eꞌ.
23 Ja kapekꞌ te Saúl, nin ja kapekꞌ te Jonatán. Junit eꞌ te yi itzꞌeꞌt tzaj. Nin junit nin eꞌ yi eꞌ quimeꞌn. Chin lajkeꞌl nin nchoyintzin chi jun qꞌuil qꞌuitx. Nin at mas chichamil chi chichamil eꞌ león.
24 ”Axwok jun cꞌoloj meꞌl Israel, okꞌenwok te Saúl, na tan iꞌ, ja oc balaj beꞌch itetz. Nin tan iꞌ ja oc balaj xbuꞌk yi lino cuꞌn, yi oro cuꞌn yubel stziꞌak.
25 ¡Wech na chin cham nin eꞌ, poro ja chisotz tul oyintziꞌ! ¡Lastum, ja el cuꞌn Jonatán swutz, ja el cuꞌn swutz jalen wiꞌwtz!
26 ”¡Wiꞌnin na cẍjoyon swetz Jonatán! ¡Wiꞌnin nchimpekꞌ tzaweꞌj, aẍ jun cꞌoloj witzꞌun! ¡Chumbalaj nin xtxaxl awalmaꞌ banak sweꞌj! Ilenin ja cxeꞌl cuꞌn te ayol. Na baꞌn kꞌukeꞌ kacꞌuꞌl teꞌj. Mas tcuꞌn ja kꞌukeꞌ incꞌuꞌl te ayol, swutz jun yol yi na suk jun xnaꞌn tetz tchmil.
27 Lastum ja cheꞌl cuꞌn swutz yi eꞌ yi chin cham nin eꞌ. Lastum na xituꞌn cuꞌn nsaj eꞌchk chimaꞌcl.”