Yi xcyeweꞌn Luwiy scyeꞌj yi eꞌ amalecita
30
1 Ej i tzun bantz le toxiꞌn keꞌj, oponeꞌn nin tzun eꞌ ban Luwiy Siclag, ma yi quilol, nsken wiꞌt chicyꞌak yi eꞌ amalecita tul cyakil amaꞌl cwent Néguev. Nin xituꞌn cuꞌn cyulej yi tnum Siclag nin nsken wiꞌt tzꞌeꞌ tircuꞌn. 2 Nchaꞌtz nin eꞌ ben ticyꞌleꞌn cyakil yi eꞌ xnaꞌn pres, scyuchꞌ chinitxajil scyuchꞌ chicyꞌeꞌx yi ateꞌ cyentz, poro cyaꞌl jun quim cyakꞌun yi eꞌ amalecita.3 Ma yi cyoponeꞌn Luwiy, nin yi quilol yi ocnak kꞌaꞌkl tircuꞌn nin yi nsken wiꞌt chiben ticyꞌleꞌn chinajal pres, 4 wiꞌnin chibisuneꞌn nin wiꞌnin chiẍchꞌineꞌn tan oꞌkl jalen yi bajeꞌn chiwalor. 5 Nchaꞌtz nsken wiꞌt chiben ticyꞌleꞌn yi cob txkel Luwiy yi Ahinoam yi aj Jezreel tu Abigail yi txkelbeꞌn kꞌajtzun Nabal yi aj Carmel.a 6 Wiꞌnin tzun bisuneꞌn Luwiy taꞌn. Nin jalt nin tan cyoqueꞌn yi eꞌ yi xomcheꞌ teꞌj tan biyleꞌn cuꞌn iꞌ tan cꞌub, na nsken wiꞌt jeꞌ lajpuj chiwiꞌ tan paj yi chibeneꞌn ticyꞌleꞌn chinitxajil pres. Poro ilen nin kꞌukeꞌ cꞌuꞌl Luwiy te Ryos. 7 Beneꞌn tzun tlol tetz yi paleꞌ Abiatarb yi cyꞌajl kꞌajtzun Abimelec:
—Banaj jun pawor swetz, cyꞌaj tzaj noc yi efod, chij Luwiy tetz.
—¿Wajcaw, baꞌn peꞌ kol kaben tan chitzꞌamleꞌn yi jun kꞌuꞌj alkꞌomaꞌtz? ¿Kaxcyek peloꞌ tan chitzꞌamleꞌn? chij Luwiy tetz Kataj.
—Xomwok nin wutz chicoc, na cxcyekwok tan chitzꞌamleꞌn, nin cxcyekwok tan chicolpeneꞌl tzaj yi eꞌ inajal ẍchikꞌab, chij Kataj.
9 Lajkeꞌl nin tzun eꞌ beneꞌn Luwiytz scyuchꞌ yi kak cient yaj yi xomcheꞌ teꞌj, nin eꞌ opontz le amaꞌl Besor kale na xoneꞌt jun tal neꞌẍ aꞌ. 10 Choꞌn tzun eꞌ cyajeꞌn cyen cob cient-tz yi nsken wiꞌt chikꞌeꞌxij, na qui jal chiwalor tan quicyꞌeꞌn. Ma Luwiy scyuchꞌ yi cyaj cient, eꞌ icyꞌtz tan chibeneꞌn tan chitzꞌamleꞌn chicontr. 11 Nimix tiemptz cyaꞌn tan xoꞌn yi chinojeꞌn cyen cobox ẍchꞌeyum Luwiy te jun aj Egipto yi coylij wi chꞌim, nin opontz cyaꞌn swutz Luwiy. Poro te ntaxk opon cyaꞌn chin tajweꞌn cunin cyakꞌol muꞌẍ waꞌ tan jaleꞌn walor iꞌ. 12 Nin cyakꞌ jun piẍ tort yi wutz ibẍ cuꞌn tetz, tu cob tort yi wutz uva cuꞌn yi skejt. Yi wiꞌt waneꞌn, nin tzun jal muꞌẍ walor yi jun aj Egiptojaꞌtz, na nsken wiꞌt el oxix kꞌej taꞌn tu oxix akꞌbal yi qui na wan nin quiꞌc muꞌẍ tcꞌaꞌ. 13 Jakol tzun Luwiy tetz:
—¿Altzaj swetz naꞌ scyetz iꞌ apatrón? ¿Nin naꞌ ncẍsiteꞌt? chij Luwiy tetz.
—In bin aj Egipto, nin in mos jun amalecita, poro ja el oxix kꞌej yi ja chin cyaj cyen colil yi impatrón tan paj yi ja chinyabtij. 14 Nin choꞌn xkaꞌkeꞌn tan majleꞌn eꞌchk takleꞌn le amaꞌl yi at cweꞌn tziꞌn chiꞌamaꞌl yi eꞌ cereteo. Nchaꞌtz chiꞌamaꞌl yi eꞌ aj Judá tu chiꞌamaꞌl yi eꞌ xonl kꞌajtzun Caleb. Nchaꞌtz oc cyen kꞌaꞌkl yi tnum Siclag kaꞌn, stzun yi yajaꞌtz bantz.
15 —¿Tzabneꞌ peꞌ pawor swetz tan woponseꞌn kale ateꞌt yi jun kꞌuꞌj alkꞌomaꞌtz? chij Luwiy tetz.
—Baꞌn tzimban pawor teruꞌ, poro ko jun cuꞌn ltaluꞌ swutz Ryos yi quil tzꞌocuꞌ tan imbiyleꞌn cuꞌn, nin yi quil chinjatxuꞌ tetz impatrón. Nchimben tzun tan ẍchajleꞌn yi beꞌ teruꞌ kale ateꞌ, stzun yi aj Egiptojaꞌtz.
16 Nin eꞌ opontz kale ateꞌt yi eꞌ alkꞌomaꞌtz. Nsken tzun el chichitol quibtz tan ujleꞌn, nin benakeꞌ nin tan waꞌaꞌn nin xcꞌalaꞌiꞌn nin wiꞌnin tzatzin na bajijtz ẍchixoꞌl tan yi eꞌchk takleꞌn yi baj chicambal le chiꞌamaꞌl yi eꞌ filistey nin le chiꞌamaꞌl yi eꞌ aj Judá. 17 Cyoqueꞌn tzun Luwiytz tan oyintziꞌ scyuchꞌ. Jalchan chixeꞌteꞌn tan chibiyleꞌn cuꞌn, nin jalen cweꞌn kꞌej chixcyeweꞌn. Cyaꞌl nin tzun jun ẍchixoꞌl yi eꞌ alkꞌomaꞌtz itzꞌij cyentz, ntin yi cyaj cient yi xicyeꞌt nin eꞌ, na yi eꞌ cyetz eꞌ xcyeꞌ tan cyeleꞌn ojk teꞌjak chicamey.
18 Ma Luwiy, eꞌ xcyeꞌ tan colpeꞌn junt tir yi eꞌchk takleꞌn yi el chimajol yi eꞌ amalecitaꞌtz. Nchaꞌtz xcyeꞌ iꞌ tan chicolpeꞌn yi cob txkel. 19 Quiꞌc jun takleꞌn yi quiꞌk eꞌ xcyeꞌ tan colpeꞌn, ma na ja chicambaj junt tir tircuꞌn. Nchaꞌtz quiꞌc nin jun nitxaꞌ nka jun tijl cꞌuꞌlal nink txꞌakxij, nka nink quim, ma na tircuꞌn xcyeꞌ Luwiy tan chicolpeꞌn. 20 Nchaꞌtz cambaj Luwiy cyakil awun yi el chimajol yi eꞌ alkꞌomaꞌtz, chi taneꞌn cneꞌr tu wacẍ. Nin yi eꞌ yi na chitzantz tan chilajeꞌn tzaj cyakil yi eꞌchk awunaꞌtz ja cyal: “Tircuꞌn yi awuneꞌj yaꞌstzun yi ja xtxꞌac Luwiy.”
21 Ma yi cyoponeꞌn Luwiy kale eꞌ cyajeꞌt cyen yi cob cient tuchꞌ yi qui nin chitxꞌaj tan chixomeꞌn nin scyeꞌj, yi ateꞌ cyen stziꞌ yi aꞌ Besor, nin tzun eꞌ eltzajtz tan chicꞌulcheꞌn. Nin tzun tziwunin Luwiytz scyetz. 22 Poro at eꞌ ẍchixoꞌl yi eꞌ yi xomcheꞌ te Luwiy yi juntlen cyajtzaꞌkl, nin chin xoꞌwbil nin eꞌ, na nin cyal: “Quiꞌc cuj tan kakꞌol jun takleꞌn scyetz yi eꞌ yi quinin chitxꞌaj tan chixomeꞌn nin skeꞌj. Ma na ntin kakꞌeꞌ quixkel tu chinitxaꞌ, nin junawes tajweꞌn tan cyeleꞌn skaxoꞌl,” cheꞌch coboxaꞌtz bantz.
23 —Axwok jun cꞌoloj wamiw, chij Luwiy, —baꞌnt cuꞌn quil kaban yi jun ajtzaꞌklaꞌtz, na ja oc Kataj tan kuchꞌeyeꞌn, nin qui nin ntakꞌ iꞌ amaꞌl tan kaquimeꞌn. Nchaꞌtz ja takꞌ iꞌ amaꞌl sketz tan kaxcyeweꞌn tan chibiyleꞌn yi jun kꞌuꞌj alkꞌomaꞌtz yi eꞌ oc tan kelseꞌn cuꞌn kloꞌ swutz. 24 Baꞌnt cuꞌn cyaꞌl jun xom wiꞌ te jun ajtzaꞌklaꞌtz, na yil jatxlij yi eꞌchk takleꞌn yi nkacambaj, nicyꞌ nin tuꞌ nkaben. Na iteꞌn nin chikꞌejaꞌtz yi eꞌ yi nchicyaj cyen tan qꞌuicyꞌleꞌn beꞌch ketz, scyuchꞌ yi eꞌuꞌ yi nẍchaꞌkuꞌ tan oyintziꞌ, stzun Luwiy bantz.
25 Jetzaꞌtz tzun xconeꞌn yi jun ajtzaꞌklaꞌtz ẍchixoꞌl yi eꞌ xonl Israel, nin iẍnin na bajijeꞌt jaluꞌ.
26 Ej ma yi cyoponeꞌn Luwiy le tnum Siclag, nin tzun octz tan jatxleꞌn eꞌchk oy scyetz yi eꞌ tamiw, chi taneꞌn yi eꞌ wiꞌ banl wiꞌ yi ateꞌ jalen Judá. Takꞌ iꞌ jun part scyetz, te yi jun cꞌoloj yi xcyeꞌ iꞌ tan cambeꞌn scyeꞌj yi contr. Nchaꞌtz ben tlol yi xtxolbileꞌj tetz yi eꞌ ẍchakum tan talcheꞌn scyetz yi eꞌ wiꞌ banl wiꞌaꞌtz: “ ‘Je jun oyeꞌj tetz cyeruꞌ, iꞌtz jun part te yi ja chinxcyeꞌ tan majleꞌn len scyetz yi eꞌ contr Kataj Ryos,’ yaꞌs tzun tzitalwok scyetz,” stzun Luwiy ban nintz scyetz yi eꞌ ẍchakumaꞌtz.
27 Iteꞌn nin ban iꞌ-tz scyeꞌj yi eꞌ wiꞌ banl wiꞌ cwent Betel, nin yi eꞌ yi ateꞌ Ramot cwent Néguev. Nin nchaꞌtz ben oy taꞌn tulak eꞌchk amaꞌl chi taneꞌn Jatir, 28 Aroer, nin le tnum Sifmot, nin le tnum Estemoa, 29 nin le tnum Racal. Nchaꞌtz ben oy taꞌn scyetz yi eꞌ wiꞌ banl wiꞌ yi ateꞌ tulak eꞌchk tnum cwent Jerameel ẍchixoꞌl yi eꞌ quenita. 30 Nin ben oy taꞌn le tnum Horma, tu Corasán, nin le tnum Atac tu Hebrón. 31 Ben len eꞌchk oy taꞌn lakak amaꞌl kale eꞌ icyꞌakeꞌt tan ew ib scyuchꞌ yi eꞌ yi xomcheꞌ teꞌj.