Yi cabeꞌn chicꞌuꞌl yi eꞌ filistey te Luwiy
29
1 I tzun bantz nin tzun cuꞌ chimolol quib cyakil yi eꞌ sanlar filistey le amaꞌl cwent yi tnum Afec. Ma yi eꞌ xonl Israel choꞌn tzun chicweꞌntz tan chꞌiwaꞌn stziꞌ jun aꞌ yi na itzꞌijtz cwent Jezreel. 2 I tzun yi chibeneꞌn yi eꞌ wiꞌtz ajcaw filistey scyuchꞌak jujun kꞌuꞌj chisanlar, nin tzun eꞌ xom nin yi rey Aquis scyuchꞌ yi eꞌ tetz sanlar wutz chicoc. Nchaꞌtz eꞌ xomnin Luwiy scyuchꞌ yi eꞌ tetz sanlar teꞌj. 3 Cyoqueꞌn tzun yi eꞌ wiꞌtz cyajcawil yi eꞌ mas sanlar filistey tan xochoꞌn tetz yi chireyil, yi Aquis:—¿Nxac na chixom tzaj yi eꞌ hebrey skaxoꞌl? cheꞌch tetz.
—Yi jun yajeꞌj iꞌtz Luwiy, iꞌ jun wiꞌtz ajcaw banak jakꞌ caꞌwl Saúl yi rey cwent Israel. Poro ja el coboxix yob taꞌn swuchꞌ. Nin jetzaꞌtz yi ticyꞌeꞌn tzaj, qui nin njal jun paltil iꞌ tzinwutz, stzun Aquis bantz.
4 Sajeꞌn tzun colpuj chiwiꞌ yi eꞌ ajcaw teꞌj Aquis, i tzun cyaltz:
—Bneꞌuꞌ bin pawor tan chilajeꞌn nin le chi amaꞌl yi ntakꞌuꞌ scyetz, na qui na kaj yil chixom tzaj skeꞌj tan oyintziꞌ. Na ko tzun choꞌc tan contriꞌn skeꞌj te yi na katzan tan oyintziꞌ. Na tan jaleꞌn balajil Luwiy swutz yi tetz reyil, ntin na taj yil ẍchajpon chiwiꞌ yi eꞌ ketz kasanlareꞌj swutz Saúl. 5 Na i iꞌaꞌtz yi jun yi wiꞌnin chibitzineꞌn yi eꞌ xonl Israel teꞌj tul chibixl, nin je ncyaleꞌj: “Juneꞌn mil kacontr nchiquim tan Saúl, ma tetz Luwiy lajuj mil nchiquim taꞌn,”a cheꞌch tzun yi eꞌ wiꞌtz cyajcawil yi eꞌ sanlar filistey bantz tetz chireyil.
6 Ej ẍchakol tzun Aquis yi Luwiy i tzun taltz tetz:
—¡Sak swutz Ryos, nin na el intxum tetz yi aẍatz aẍ jun yaj yi quiꞌc muꞌẍ paltil! Nin wiꞌnin na chintzatzin tzaweꞌj tan yi balajil awajtzaꞌkl te yi ncẍaꞌtij skaxoꞌl tzoneꞌj. Quiꞌc jun apaltil jajk jal waꞌn jetz yi awuleꞌn cunin skaxoꞌl. Poro qui na chipekꞌ yi eꞌ wiꞌtz cyajcawil kasanlar tzaweꞌj. 7 Chaꞌstzun te mas balaj yil cẍpakxij. Cheb cuꞌn cẍben. Baꞌn cẍaꞌj, bantz quil jeꞌ lajpuj mas chiwiꞌ, chij Aquis tetz Luwiy.
8 —Iluꞌ jun cꞌoloj wajcaw, ¿mbiꞌtz wil? ¿Mbiꞌtz jun takleꞌn ploj ja tiluꞌ sweꞌj yi ja cuꞌ tul tan qui imbeneꞌn tan oyintziꞌ scyeꞌj yi eꞌ contruꞌ? chij Luwiy tetz.
9 —Jun cuꞌn na el intxum tetz yi niꞌcuꞌn abalajil tu jun ángel tetz Ryos, poro ja wiꞌt bixeꞌ cyakꞌun yi eꞌ wiꞌtz cyajcawil eꞌ kasanlar yi quiꞌc cuj tan abeneꞌn skaxoꞌl tan oyintziꞌ. 10 Chaꞌstzun te, chin jalchan cunin eklen yil jeꞌul kꞌej baꞌn cxpakxijwok scyuchꞌ yi eꞌ yi xomcheꞌ tzaweꞌj, stzun Aquis bantz.
11 Ej i tzun le junt eklok chin jalchan cunin tzun chicꞌaseꞌn Luwiytz, nin tzun eꞌ pakxij junt tirtz le chitanum yi eꞌ filistey, ma yi eꞌ sanlar filistey beneꞌn nin ateꞌt ẍchiwutz tan cyoponeꞌn Jezreel.